यी दैनिकसे अभिभावक गुमाइल पीडा

कैलाली जिल्लाके धनगढीसे २०५९ सालमे दर्ता हुके अर्धबार्षिक रुपमे यी पत्रिका भुइयाँमे पौला टेकलपाछे आघे बह्रेक लाग कानूनी सल्लाहकारके रुपमे अधिवक्ता जोहरीलाल चौधरीहे अभिभावक भेटाइल ।

यी पत्रिका प्राविधिक कारण विचमे स्थागित हुइल रहे । मने पाछे यी पत्रिका दैनिक रुपमे २०६६ चैत २९ गते फेर आपन यात्रा सुरुवाट करेबेरफे उहाँ कानूनी सल्लाहकार हुइलै । यी दैनिकके यहाँसमके यात्रामे उहाँ निशुल्क सेवा प्रदान करलै । अटरा केल्ह नाही उहाँ थारु समुदायके एक अग्रणी कानूनी अभियन्ता, समाजसेवी ओ बौद्धिक व्यक्तित्व रहिट । उहाँ आपन ज्ञान, अनुभव ओ क्षमता थारु समुदायके अधिकार, पहिचान, न्याय ओ सशक्तीकरणके लाग समर्पित करलै । थारु समुदाय नम्मा समयसे सामाजिक, आर्थिक ओ राजनीतिक रूपमे सीमान्तकृत अवस्थामे रहल ओरसे उहाँ समुदायहे न्याय ओ समानताके मूलधारमे ल्यन्ना निरन्तर संघर्ष करलै ।

अधिवक्ता जोहरीलाल चौधरी थारु समुदायसे भोग्टी आइल भूमि समस्या, नागरिकता, मानवअधिकार उल्लङ्घन ओ अन्यायके विषयमे कानूनी आवाज उठैलै । उहाँ कानूनमार्फत थारु समुदायहे आपन अधिकारबारे सचेत करैटी अन्यायविरुद्ध लड्न हौसला प्रदान करलै । गरिब, अशिक्षित ओ पीडित थारु नागरिकहे निःशुल्क कानूनी सल्लाह तथा सहायता प्रदान कैना उहाँके विशेष योगदान रहल ।

उहाँ यी दैनिक लगायत थारु कल्याणकारी सभा, टमान थारु संघ–संस्थाके कानूनी सल्लाहकारके रूपमे सक्रिय भूमिका निभैटी आइल रहिट । थारु समुदायमे कानूनसम्बन्धी जानकारीके अभाव रहल डेखके उहाँ कानूनी चेतनामूलक कार्यक्रम, अन्तरक्रिया ओ प्रशिक्षणमे जोड डेहल रहिट । उहाँ थारु समुदायके लाग पुगाइल योगदान बहुआयामिक, दीर्घकालीन ओ ऐतिहासिक महत्व बा । थारु समुदायहे अन्यायविरुद्ध कानूनी रूपमे सशक्त बनैना, अधिकारप्रति सचेत करैना ओ सम्मानित पहिचान स्थापित कैना महत्वपूर्ण भूमिका निर्वाह करलै । उहाँके योगदान थारु समुदायके लाग प्रेरणाके स्रोत ओ मार्गदर्शकके रूपमे सदा स्मरणीय रही ।

आब उहाँ यी धर्तीमे नैरहिगिलै मने उहाँक अभाव सदा खडकटी रही । यी दैनिक केल्ह नाही ढेर संघसंस्था अभिभावक गुमैलस । यी दैनिक परिवार उहाँप्रति हार्दिक श्रद्धाञ्जली व्यक्त करटी, शोक सन्तप्त परिवारमे हार्दिक समवेदना प्रकट करले बा ।