थारु सांस्कृतिक प्रदर्शनी
पहुरा समाचारदाता
धनगढी, २१ पुस । कञ्चनपुर जिल्लाके बेलौरीमे थारु सांस्कृतिक प्रदर्शनी कार्यक्रम निम्जल बा ।
थारु कल्याणकारिणी सभा कञ्चनपुरके आयोजना ओ बेलौरी नगरपालिकाकाके सहयोगमे थारु समुदायके संस्कृतिहे संरक्षण ओ प्रवद्र्धनके लाग थारु सांस्कृतिके प्रदर्शनी कार्यक्रम हुइल हो । सुदूरपश्चिम प्रदेश सरकारके सामाजिक विकास मन्त्री मेघराज खडकके बरका पहुनामे थारु सांस्कृतिक प्रदर्शनी कार्यक्रम हुइल हो ।
कार्यक्रममे सम्बोधन कैटि वहाँ थारु समुदायके भाषा, कला ओ संस्कृति सुदूरपश्चिमके पहिचानहे समृद्ध बनाइल बटैलै । उहाँ एकर संरक्षण ओ प्रवद्र्धन कैना राज्यसे प्राथमिकता डेहे पर्नामे जोड डेहल रहिट ।
विशिष्ट पहुना सुदूरपश्चिम प्रदेश सभा सदस्य गीता चौधरी थारु समुदाय पुस्तौसे जगेर्ना कैटी आइल संस्कृतिहे जोगैना समुदाय स्वयं जागरुक हुइ पर्ना कहटि राज्य संरक्षण करपर्ना समेत बटैली । बेलौरी नगरपालिका नगर उपप्रमुख जोगराम चौधरी नगरपालिका स्थानीय कला ओ संस्कृतिक संरक्षणके लाग निरन्तर सहयोग करटि रहल बटैटि सांस्कृतिक प्रवद्र्धनके लाग नगरपालिका हरडम साथमे रहल बटैलै ।
कार्यक्रम सुदूरपश्चिम प्रज्ञा प्रतिष्ठानके उपकुलपति डा. टीएन जोशीे मौलिक संस्कृतिक संरक्षण करे नैसेक्लेसे संकटमे परटि जैना बटैलै । कार्यक्रमके अवसरमे उपप्रमुख जोगराम चौधरी ओ उपकुलपति डा. टीएन जोशीहे सम्मान कैगिल बा ।
थारु कल्याणकारिणी सभा जिल्ला समिति कञ्चनपुरके सभापति सानु चौधरीके अध्यक्षतामे हुइलक कार्यक्रममे स्वागत मन्तव्य उपाध्यक्ष आशाराम चौधरी करल रहिट ।
थारु समुदायके मौलिक कला, संस्कृति तथा पहिचानके संरक्षण व प्रवद्र्धन कैना उद्देश्यसे आयोजना करल प्रदर्शनीम थारु परम्परागत खानाक परिकार, हस्तकला, चित्रकला तथा विविध सांस्कृतिक सामग्री प्रदर्शनीमे ढारल रह । सांस्कृतिक कार्यक्रमम सखिया, मघौटा, झुम्रा तथा रानाथारु समुदायक होरी नाच प्रस्तुत हुइल रह । कार्यक्रममे थारु अगुवनके उल्लेखनीय सहभगिता रहल रहे ।
