कैलारीमे १६औं राष्ट्रपति रनिङ शिल्ड प्रतियोगिता सुरु
पहुरा समाचारदाता
हसुलिया, २३ पुस । कैलारी गाउँपालिकाके यौङ ब्याइज क्लवके खेलकुद मैदानमे बुधके रोजसे १६औं स्थानीय स्तरीय राष्ट्रपति रनिङ शिल्ड प्रतियोगिता सुरु हुइल बा ।
कैलारी गाउँपालिका शिक्षा, यूवा तथा खेलकुद विकास शाखाके आयोजनामे उ प्रतियोगिता सुरु हुइल हो । कैलारी गाउँपालिका अध्यक्ष राजसमझ चौधरीके प्रमुख आतिथ्यतामे सुरु हुइल उदघाटन कार्यक्रममे सम्बोधन करटी उहाँ स्वास्थ्य तथा अनुशासनके लाग खेलकुद महत्वपूर्ण रहल बटैैलै । अब्बे कैलारीमे मावि स्तरीय खेलकुद प्रतियोगिता हुइटी रहल ओ यिहीसे आघे बह्रना भारी अवसर रहल बटैलै ।
उहाँ कहलै, गाउँपालिकासे खेलकुद विकासके लाग प्रत्येक बरस बजेट विनियोजन करटी रहल ओरसे यहाँ सहभागी खेलाडीहुक्रे जिल्ला स्तरीय खेलकुद प्रतियोगितासे छनौटके लाग मजा अवसर रहल बटैलै ।
कार्यक्रममे विशिष्ट पहुना गाउँपालिका उपाध्यक्ष भगवतीकुमारी चौधरी यूवा तथा विद्यार्थीहुकन थेन ढेर प्रतिभा हुई सेकठ, उ प्रतिभाहे बाहेर ल्यन्ना अइसिन मेरके प्रतियोगिताके भारी योगदान रना बटैली ।
उहाँ कहली, गैल बरस हुइल खेलकुद प्रतियोगितामे टमान गुनासा आइल रहे । यी बरस विवादरहिट खेलकुद सम्पन्न कैबी । सहभागी विद्यार्थीनहे हदबन्दी नैलगाके उमेर अनुसार खेलकुदमे सहभागी करैनाफे उपाध्यक्ष आग्रह करली ।
कार्यक्रममे कैलारी गाउँपालिकाके प्रवक्ता तथा वडा नम्बर ७ के वडा अध्यक्ष दिपेन्द्र बहादुर बम गाउँपालिकासे शिक्षा, स्वास्थ्य संगे खेलकुलमे भारी लगानी करल बटैलै । कार्यक्रममे दिपेन्द्र माविके प्रअ विनोद भट्टराई गैल बरस अपनेहुक्रे प्रतियोगिता संचालन करल ओरसे कुछ कमी कम्जोरी हुई सेकल मने यी बरस मजासे प्रतियोगिता संचालन कैना आग्रह करलै ।
कार्यक्रममे राष्ट्रिय मावि उजलीसेमराके विद्यालय व्यवस्थापन समितिके अध्यक्ष नविन कुमार बोहराफे शुभकामना मन्तव्य राखल रहिट ।
कैलारी गाउँपालिका वडा नम्बर ३ के वडा अध्यक्ष तथा सामाजिक विकास समितिके संयोजक सन्तराम चौधरीके अध्यक्षतामे हुइल कार्यक्रमके संचालन राष्ट्रिय मावि उजलीसेमराके प्रअ जितबहादुर रावत करल रहिट ।
यी बरस हुइटी रहल १६औं स्थानीय स्तरीय राष्ट्रपति रनिङ शिल्ड प्रतियोगिताके संचालन कैना जिम्मा राष्ट्रिय मावि उजलीसेमरा पैले बा ।
कार्यक्रममे वडा अध्यक्षहुक्रे, कार्यपालिका सदस्य, कैलारी गाउँपालिका शिक्षा, यूवा तथा खेलकुद विकास शाखा प्रमुख गणेश प्रसाद मिश्र, टमान विद्यालयके विद्यालय व्यवस्थापन समितिके अध्यक्ष, प्रअ, खेल शिक्षक, कैलारी गाउँपालिकाके टमान शाखाके प्रमुखहुकनके सहभागिता रहे । १३ विद्यालयके सहभागिता रहल प्रतियोगिता पुस २५ गतेसम संचालन रना बा ।
