अन्तर पुस्ता सरोकारवाला प्यानल संवाद
पहुरा समाचारदाता
धनगढी, २४ पुस । सुशासन भ्रष्टाचार नियन्त्रण निर्वाचन प्रक्रिया, जेन्जी तथा यूवाके राजनीति सहभागिता अन्तर पुस्ता सरोकारवाला प्यानल संवाद हुइल बा ।
गैरसरकारी संस्था महासंघ सुदूरपश्चिम प्रदेशके आयोजनामे विफेक रोज सुशासन भ्रष्टाचार नियन्त्रण निर्वाचन प्रक्रिया, जेन्जी तथा यूवा पुस्ताके राजनीतिमे सभागिता अन्तर पुस्ता सरोकारवाला प्यानल संवाद हुइल हो ।
महासंघके प्रदेश अध्यक्ष देवी खनालके अध्यक्षतामे हुइल कार्यक्रममे सुदूरपश्चिम प्रदेश सरकारके सामाजिक विकास समितिके सभापति धर्मराज पाठक प्रमुख अतिथि रहल रहिट । कार्यक्रममे सम्बोधन करटी उहाँ सुशासन भ्रष्टाचार नियन्त्रण निर्वाचन प्रक्रिया, जेन्जी तथा यूवाके पुस्ताके राजनीतिमे सभागिता आवश्यक रहल बटैलै । मुलुकमे सुशासनके कमी डेखलसंगे भ्रष्टाचार मौलाइल कारण उहीहे नियन्त्रणके अब्बे आवाज उठटी रहल बटैलै ।
अन्तर पुस्ता सरोकारवाला प्यानल संवाद कार्यक्रममे पत्रकार अर्जुन शाह सहजीकरण करल रहिट । ओम्ने प्रदेश निर्वाचन आयोगके प्रमुख प्रेमराज भट्ट, नेकपा एमाले प्रदेश अध्यक्ष कृष्ण प्रसाद जैसी, नेपाली कम्युनिष्ट पार्टी जनक बुढा, नेपाली काँग्रेसके सुनिता भण्डारी, नागरिक समाज तथा इन्सेक प्रदेश संयोजक खडकराज जोशी, जेन्सी पुस्ताके सरिता जोशी भाग लेहल रहिट ।
अन्तर पुस्ता सरोकारवाला प्यानल संवादमे प्रदेश निर्वाचन आयोगके प्रमुख प्रेमराज भट्ट निर्वाचनके लाग राजनीतिक दल मुख्यपात्र रहल ओरसे यिहीहे सम्पन्न करेक लाग मजा भुमिका निर्वाह कैडेना आग्रह करलै । आयोग निर्वाचन सम्पन्न करेक लाग लागल ओरसे सक्कु जाने मिलके समन्वय करके आघे बह्रना जरुरी रहल बटैलै ।
नेकपा एमाले प्रदेश अध्यक्ष कृष्ण प्रसाद जैसी माग ओ आन्दोलनबारे जायज रहल कहटी विगतके इतिहासहे औल्यइना जरुरी रहल बटैलै । इन्सेक प्रदेश संयोजक खडकराज जोशी जेन्जी आन्दोलन पाछे बडलल राजनीतिक वातावरण, संक्रमणकालिन सत्ता, निर्वाचन लग्गे हुइटी रहल आवस्थामे बह्रटी राजनीतिक अन्यौलता, सुशासन अभिवृद्धि, भ्रष्टाचार नियन्त्रण, निर्वाचन प्रक्रिया तथा जेन्जी ओ यूवाके राजनीतिक सहभागिताबारे संवादके आवश्यकता रहल ओरसे यी कैना जरुरी रहल बटैलै ।
कार्यक्रममे गैरसरकारी संस्था महासंघके केन्द्रीय अध्यक्ष अर्जुन भट्टराई, केन्द्रीय सचिव सावित्रा घिमिरेलगायत मन्तव्य राखल रहिट । कार्यक्रममे नरदिप धामी अब्बे हुइना निर्वाचनमे मतदान स्थल अपाङतामैत्री हुई, जेन्सी यूवा पुस्ताके सन्तोष रावल विदेश रहल यूवाहुकनहेफे सहभागिता कराईपर्ना माग ओ यौनिक तथा लैङिक अल्पसंख्यक समुदायके निरङ चौधरीफे आपन बाट राखल रहिट ।
कार्यक्रमके उदेश्यबारे महासचिव भवराज रेग्मी ओ स्वागत मन्तव्य महासंघके कैलाली अध्यक्ष चेतमान साउद करल रहिट । कार्यक्रमके संचालन प्रदेश सचिव लोकमान धामी करल रहिट । कार्यक्रममे महासंघके केन्द्रीय पदाधिकारी, प्रदेश समिति ओ सुदूरपश्चिम प्रदेशके टमान जिल्लाके अध्यक्ष, प्रतिनिधि, नागरिक समाजके प्रतिनिधि, टमान सरकारी तथा गैरसरकारी संघसंस्थाके प्रतिनिधिहुकनके सहभागिता रहे ।
