अध्यक्ष फेरसे देवी खनाल निर्वाचित
पहुरा समाचारदाता
धनगढी, २४ पुस । गैरसरकारी संस्था महासघं सुदूरपश्चिम प्रदेशके टिसरा अधिवेशन तथा छैठौं वार्षिक साधारण सभा विफेक रोज धनगढीमे सम्पन्न हुइल बा ।
महासंघके उदघाटन कार्यक्रम गैरसरकारी संस्था महासघं सुदूरपश्चिम प्रदेश अध्यक्ष देवी खनालके अध्यक्षतामे हुइल रहे । कार्यक्रममे प्रमुख अतिथि महासंघके केन्द्रीय अध्यक्ष अर्जुन भट्टराई ओ विशिष्ट अतिथि महासंघके केन्द्रीय महासचिव देवी खडका, उपमहासचिव भवराज रेग्मी, किरण थापा, केन्द्रीय सचिव सावित्रा घिमिरे, केन्द्रीय सदस्य कौशिला चौधरी, और केन्द्रीय सदस्य, जिल्ला अध्यक्षहुक्रनके सहभागिता रहे ।
कार्यक्रममे महासंघके प्रदेश सदस्य राजेन्द्र ठगुन्ना स्वागत मन्तव्य राखल रहिट । महासंघके प्रदेश अध्यक्ष देवी खनाल सांगठनिक तथा संस्थागत प्रगति प्रतिवेदन, आर्थिक प्रतिवेदन महासंघके प्रदेश कोषाध्यक्ष दुर्गा नेपाली प्रस्तुत करल रहिट ।
ओस्टेक करके टिसरा अधिवेशन तथा छैठौं वार्षिक साधारण सभासे लौवा कार्य समिति सर्वसहमते निर्वाचित हुइल बटै ।
समितिके अध्यक्ष देवी प्रसाद खनाल, उपाध्यक्षमे राजेन्द्र बहादुर ठगुन्ना, सचिवमे नरेश प्रसाद ओझा, उपसचिवमे शिवराज उपाध्याय, कोषाध्यक्ष सीमाकु्मारी चौधरी, सदस्यहुक्रे दुर्गा कुमारी नेपाली, गोविन्दराज जोशी, विमला ओझा भट्ट, शिवि लुहार सर्वसहमतसे निर्वाचित हुइल बटै ।
