पाइलट मिलन चौधरीहे सम्मान
पहुरा समाचारदाता
धनगढी, २५ पुस । कैलालीके धनगढी उपमहागरपालिका–५, हसनपुरके पाइलट मिलन चौधरीहे सम्मान करल बा ।
बातचित घर धनगढी आपन ३७औं श्रृंखलाके अवसरमे उहाँहे सम्मान करल हो । बातचित घरके बरघरिया ठाकुर करिया प्रधान, किसन्वा माधब चौधरी उहाँहे खादामाला ओ सम्मान पत्र सहित सम्मान करल रहिट । उहाँ फिलिपिन्सके टप फ्लाइट एकेडेमीसे पाइलट कोर्स पूरा करल हुइट ।
सम्मानपाछे पाइलट चौधरी अपने छोट रहल बेला बाबाहे मेसिनरीसँग खेलल् डेखके आपन फेन मेसिनरी ओर आकार्षण बह्रल अनुभव सुनैलै । ओहकान बाबा किसन चौधरी धनगढी मोटरसाइकल ग्यारेज ढारल रहिट । उहाँ घरपरिवारके साथ सहयोगसे अपने पाइलट बन्ना सफल हुइल फेन सुनैलै ।
धनगढी स्थित एक्सिस विद्याश्रमसे एसएलसी उतीर्ण करल उहाँ काठमाण्डौंके नेपाल मेगा कलेजसे विज्ञान विषयमे प्लस टु उतीर्ण कैके पाइलटके लाग फिलिपिन्स गैल रहिट । २०१ घण्टा प्लेन उडाके कमर्सियल पाइलटके लाइसेन्स प्राप्त करल चौधरी देशमे प्लेन उडैना सुनाइल रहिट ।
कुछ दिन आघे थारू समुदायसे पहिल महिला पाइलट बनके इतिहास रचल ओ समुदायके इज्जत बह्राइल कहटी बातचित घर धनगढी उपमहानगरपालिका १३ कैलाली गाउँके टीका चौधरीहे फेन सम्मान करल रहे । बातचित घरके बरघरिया करिया प्रधान मिलन ओ टीका सिङ्गो थारू समुदायके इज्जत बह्राइल कहटी प्रशंसा फेन करल रहिट ।
उहे बिच माघके शुभकामना आदानप्रदान फेन करल रहे । कार्यक्रममे ओम आशा अस्पतालके सञ्चालक जगतराम चौधरी, डाक्टर ललित चौधरी, दुज्जी चौधरी, मजागाउँ होमस्टेके कल्पना चौधरी लगायत पाइलट चौधरीहे बधाई सहित माघके शुभकामना डेहल रहिट ।
