थारु समुदायके संस्कृति ओ परम्परा पुस्तान्तरणमे जोड
पहुरा समाचारदाता
धनगढी, २६ पुस । थारु समुदायके सस्कृति ओ परम्पराहे जोगाइक नयाँ पुस्तामे पुस्तान्तरण एक कार्यक्रममे जोड डेहल बा ।
धनगढी उपमहानगरपालिका नगर स्तरीय भल्मन्सा समितिके शनिच्चरके रोज धनगढीमे आयोजना हुइल हुइल माघ शुभकामना आदनप्रदान कार्यक्रमके सहभागीहुक्रे उ बाट बत्वाइल रहिट ।
धनगढी उपपमहानगरपालिकाके नगर उप प्रमुख कन्दकला कुमारी रानाके प्रमुख आतिथ्यतामे हुइल कार्यक्रममे उहाँ थारु, रानाथारु समुदायमे रहल रितिसंस्कृति परम्पराहे संरक्षण ओ संम्बद्र्धन करेक लाग लौवा पुस्तान्तरण कैना जरुरी रहल बटैली । उहाँ कहली, ‘हमार परम्परागत पहिचान झल्कना कला, संस्कृति हेरेटी जाइटा, उहीहे संरक्षण कैना एक ठो केल्ह उपाय लौवा पुस्ताहे हस्तान्तरण कैना हो । दस्तावेजीकरण करेनैसेक्लेसे लोप हुके पहिचानफे हेराजाई ।
धनगढी उपमहानगरपालिका वडा नम्बर ८ के वडा अध्यक्ष जुगराम चौधरी भल्मन्सामे यूवा पिढीहे ल्याने पर्ना बटैलै । थारु समुदायके यहाँके भुमिपुत्र रहल मने अपने ठाउँमे भुमिसे बञ्चित हुइटी गैल ओरसे शिक्षामे जोर डेहे पर्ना उहाँ बटैलै ।
थारु समुदायसे उप्पर तहमे पहुँच नैरहल, बेरोजगार हुइलक कारण भुमि बेचके भोज विहा, औषधी उप्पर, पह्राई खर्च उहीसे निकारे परल बटैलै ।
थारु कल्याण कारिणी सभाके केन्द्रीय उपाध्यक्ष प्रभातकुमार चौधरी भल्मन्सा परिवर्तनके बाहक रहल बटैलै । भल्मन्साहुक्रे न्यायिक तहके भूमिका निर्वाह करलफे उहाँ बटैलै । थारु समुदायके हक अधिकारके लाग एक जुट हुइपर्ना बटैलै ।
थारु समुदायके अगुवा, बुद्धिजिवी यज्ञराज चौधरी भल्मन्साके भुमिका सरकार सक्कुमे तह रहल कानूनी मन्यता नैपाइल बटैलै । यिहीहे कानूनी मन्यता डिहाइक लाग दवाव आवश्यक रहल बटैलै ।
थारु टिभिके कार्यकारी प्रमुख कुन्ना नारायण चौधरी भल्मन्साहुकनके माग अभिन सम्बोधन करेनैसेकल बटैलै । कार्यक्रममे भल्मन्सा शिवरानारायण चौधरी अब्बे समय परिवर्तन हुसेकल ओरसे सक्कु जानेक भावना बोकेसेक्ना व्यक्ति छनौट करेपर्ना बटैलै । पत्रकार प्रेम चौधरी भल्मन्साहुकनहे आपन क्षेत्रधिकारमे पर्ना मुद्दा केल्ह मिलैना आग्रह करलै ।
कार्यक्रम नगर स्तरीय भल्मन्सा समितिके संयोजक रोहितकुमार चौधरीके अध्यक्षतामे हुइल कार्यक्रममे उहाँ भल्मन्सामे यूवाहुकनहे आघे बह्रैना आश्यक रहल बटैलै । अब्बे प्रविधि भारी फडको मारसेकल ओरसे पहिले भल्मन्सा ओकर प्रयोग करेसिखेपर्ना या ओस्टे व्यक्तिनहे आघे सारेपर्ना बटैलै । थारु समुदायमे वेतिथि बह्रल कहटी बाल, विवाह, लागुऔषध दुव्र्यशनी नियन्त्रण करटी शिक्षामे जोर डेहे पर्ना बटैलै ।
भल्मन्सा छनौट करेबेर राज्यके संरचनाके आाधारमे छनौट करके समिति बनाके आघे बह्रलेसे मजा हुइना उहाँ बटैलै । कार्यक्रममे स्वागत मन्तव्य नगर भल्मन्सा समितिके उपाध्याक्ष राम नारायण चौधरी करल रहिट । कार्यक्रमके संचालन सचिव बिन्तीराम चौधरी करले रहिट । कार्यक्रममे धनगढी उपमहानगरपालिकाके सक्कु वडाके भल्मन्साहुकनके सहभागिता रहे ।
