जमुनी महिला सामुदायिक वनके १७औं वार्षिक साधारण सभा
पहुरा समाचारदाता
पहलमानपुर, २६ पुस । कैलालीके भजनी नगरपालिका वडा नम्बर ४ स्थित कुँडीमे रहल जमुनी महिला सामुदायिक वन उपभोक्ता समुहके १७औं वार्षिक साधारण सभा तथा सार्वजनिक सुनुवाई कार्यक्रम सम्पन्न हुइल बा ।
समुहके अध्यक्षता बुधराम चौधरीके अध्यक्षतामे हुइल कार्यक्रममे भजनी–४ के वडा अध्यक्ष जनताराम चौधरीके प्रमुख आतिथ्यतामे हुइल रहे । सामुदायिक वनसे सामाजिक क्षेत्रमे योगदान पुगाइल बटैलै ।
सिएफसिसि भजनीके अध्यक्ष खोजराम चौधरी कानूनी क्षेत्रमे कौनो कसर नैरख्ना बटैलै । सब डिभिजन बन कार्यालय भजनीके वन रक्षक प्रकाश विक यी सामुदायिक वन पारदर्शि हिसावसे बह्रल बटैलै । निल कण्ठ समुहके अध्यक्ष लक्षिराम चौधरी सक्कु जानेक प्रयाससे केल्ह सामुदायिक वन फस्टैना बटैलै । प्रगतीशिल सामुदायिक वनके अध्यक्ष दिपक चौधरी समावेशी हिसावसे बजेट बाँटे पर्ना बटैलै । प्रतिक्षा महिला समुहके अध्यक्ष मनसरी चौधरी, बुद्धिजीवी रामचरण चौधरी, उपभोक्ता ऐनबहादुर देउवालगायत मन्तव्य राखल रहिट ।
कार्यक्रममे पहुरा दैनिकके पहलमानपुर शाखाके प्रमुख जीवनकुमार चौधरीहे सामुदायिक वन क्षेत्रमे पुगाइल योगदानके कदर करटी दोसल्लासहिट सम्मान कैगिल बा ।
कार्यक्रममे एकल महिला परिवारके वालबालिकाहुकनहे शैक्षिक सामग्री सहयोग, आाधरभूत स्वास्थ्य चौकी धनौराहे एक थान आराम बेञ्च, एक थान सादा वेञ्चफे हस्तान्तरण करल बा ।
ओस्टेक राष्ट्रिय मावि खैलाडहे एक टेब्ुल, सव डिभिजन वन कार्यालयके एक थान टेबुल सहयोग करल बा । कार्यक्रममे समुहके सचिव साधुराम चौधरी ६ लाख ३५ हजार ९७५ रुप्या बराबरके आय व्यय विवरण सुनैले रहिट । संचालन उपभोक्ता धेनुराम चौधरी करल रहिट ।
