कारागारमे मृत्यु हुइल भरत चौधरीके परिवारहे आर्थिक सहयोग डेना निर्णय
पहुरा समाचारदाता
धनगढी, २७ पुस । सुदूरपश्चिम प्रदेश सरकारके मन्त्रिपरिषद्को बैठक सम्पन्न हुइल बा । बैठकसे टमान महत्वपूर्ण निर्णय करले बा ।
मन्त्रिपरिषद्के बैठकसे साउन २३ गते कैलाली कारागारमे दुई समूहबीच हुइल झडपमे ज्यान गुमाइल कैदीबन्दी भरत चौधरीके परिवारहे आर्थिक सहायता उपलब्ध करैना निर्णय कर्ले बा । यि अघि साउन २५ गते सुदूरपश्चिम प्रदेशके मुख्यमन्त्री कमल बहादुर शाहके उपस्थितिमे बैठल प्रदेश सुरक्षा समितिके बैठक से मृतक चौधरीके परिवारहे पाँच लाख रुपैयाँ राहत प्रदान कैना निर्णय करल रहे ।
अस्टे, अट्वार बैठल मन्त्रिपरिषद् बैठकसे सुदूरपश्चिम प्रदेशमे सडक मर्मत प्रणालीहे संस्थागत रूप मे लागू कैना सडक मर्मत समूह निर्देशिका स्वीकृत कर्ले बा । प्रदेश सरकारसे निर्माण करल कालोपत्रे सडकके नियमित मर्मतसम्भारके लाग मर्मत समूहमार्फत सडक मर्मत कार्य कैना बा। प्रदेश सरकारसे प्रत्येक वर्ष करिब २ सय किलोमिटर कालोपत्रे सडक निर्माण करटी आइल बा। यैसिक नियमित मर्मत तथा सम्भार करेबेर सडकके आयु लम्म हुइना अपेक्षा प्रदेश सरकारसे करले बा।
ओस्टेक, बैठकसे सुदूरपश्चिम प्रदेश वृत्ति मार्ग निर्देशन सेवा सञ्चालन कार्यविधि, २०८२ स्वीकृत कैना निर्णय कर्ले बा । सथे, सुदूरपश्चिम जनस्वास्थ्य सेवा ऐन, २०७६ हे संशोधन कैनाबनल विधेयक प्रदेश सभामे पेश कैना स्वीकृति प्रदान करल बा ।
