धनगढी नगर विकास समितिसे नेपाल पर्यटन बोर्डके प्रादेशिक कार्यालय स्थापना कैना भवन उपलब्ध करैना

पहुरा समाचारदाता
धनगढी, २८ पुस । नेपाल पर्यटन बोर्डके सुदूरपश्चिम प्रदेश कार्यालय धनगढीमे स्थापना कैना सम्बन्धमे धनगढी नगर विकास समिति ओ नेपाल पर्यटन बोर्डबीच समझदारीपत्रमे हस्ताक्षर हुइल बा ।

नेपालहे आकर्षक पर्यटन गन्तव्यके रूपमे स्थापित करटी पर्यटन व्यवसायके विकास, विस्तार ओ प्रवद्र्धन कैना उद्देश्यसे सुदूरपश्चिम प्रदेशमे बोर्डके कार्यालय स्थापना कैना निर्णयअनुसार उ समझदारी करल हो । बोर्डके आर्थिक वर्ष २०८२÷८३ के बजेट विनियोजनअनुसार धनगढीमे प्रदेश कार्यालय स्थापना कैना तयारी आघे बढाइल जनैले बा ।

समझदारीअनुसार धनगढी नगर विकास समितिसे प्रदेश कार्यालय सञ्चालनके लाग कम्तीमे तीन कोठा ओ शौचालयसहितके भवन उपलब्ध करैना बा । साथे, भवनमे विद्युत्, खानेपानी ओ ढल व्यवस्थाके उपयुक्त व्यवस्था हुईपर्ना उल्लेख बा ।

ओस्टेक करके, नेपाल पर्यटन बोर्डसे कार्यालय सञ्चालनके लाग भवनके सरसफाइ, सौन्दर्यीकरण, फर्निचर तथा आवश्यक कार्यालय सामग्रीके व्यवस्थापन कैना बा । उपलब्ध भवनके मर्मतसम्भार, विद्युत्, खानेपानी, टेलिफोन ओ इन्टरनेटके शुल्क व्यहोर्ना तथा आवश्यक कर्मचारी व्यवस्थापन कैना दायित्वफे बोर्डके रना बा ।

समझदारीपत्रके अवधि हस्ताक्षर मितिसे पाँच वर्षके हुइना बा । आपसी सहमतिमे अवधि थप करे सेक्ना व्यवस्था करल बा । कौनो कारणवश कार्यालय सारेपर्ना वा भवन खाली कराईपर्ना अवस्था अइलेसे कम्तीमे एक महिनाआघे कारणसहित लिखित सूचना डेहेपर्ना प्रावधान धारल बा । समझदारीपत्रमे उल्लिखित विषयमे कौनो संशोधन वा थप स्पष्टता आवश्यक परलेसे दुनु पक्षके आपसी सहमतिमे करे सेक्ना जनाइल बा । समझदारीपत्रमे धनगढी नगर विकास समितिके अध्यक्ष गोपाल हमाल ओ नेपाल पर्यटन बोर्डके कार्यकारी प्रमुख दीपकराज जोशी हस्ताक्षर करले बटै ।

सुदूरपश्चिम प्रदेशमे पर्यटन प्रवद्र्धनहे संस्थागत रूपसे आघे बह्रैना दिशामे यी कदम महत्वपूर्ण मानल बा ।