कैलालीमे कठ्वा तस्करी बह्रल

पहुरा समाचारदाता
धनगढी, २८ पुस । कैलालीके टमान ठाउँमे कुछ दिन यहोँर कठ्वा तस्करी बह्रल बा । कैलालीके चुरे लगायत टमान ठाउँमे कठ्वा तस्करी बह्रल हो । चुरेमे ढेर मात्रामे जिन्ना (साल) कठ्वा तस्करी हुइल भेटागैल बा एक महिनामे वन कार्यालयसे चुरके टमान क्षेत्रसे ढेर परिमाणके सालके चिरान करल कठ्वा बरामद करले बा ।

डिभिजन वन कार्यालय कैलालीसे चुरेके टमान स्थानसे एक महिनाके अन्तरालमे ५३१ दशकलव ४८ क्यूफिट सालके चिरान करल कठ्वा बरामद हुइल जानकारी डेले बा । सोम्मारके कार्यालयमे पत्रकार सम्मेलन कैटी वरिष्ठ डिभिजनल वन अधिकृत रामविचारी ठाकुर चुरे गाउँपालिका क्षेत्रमे रहल सामुदायिक बन्वासे ६ चो तथा गौरीगङ्गा नगरपालिका वडा नम्बर ६ से एकचो सहित एकमहिनामे सात ठाउँसे साल कठ्वा बरामद हुइल बटाइल बा ।

वरिष्ठ डिभिजनल वन अधिकृत ठाकुर अगहन २६ गते अपने कार्यालयमे हाजिर हुइल ओ ओकरपाछे चुरे–५ मौरीगाउँसे वेवारिसे अवस्थामे रहल १४९ दशमलव ९८ क्यूफिट चिरान साल थान २३० बरामद हुइल बटैलै । ओस्टके, पुस १२ गते गौरीगङ्गा नगरपालिका–६ से २५ दशमलव २८ क्युफिट सिसौ, हातेआरा थान एक, एक थान किप्याड मोबाइल ओ गोदावरी नगरपालिका–७ के श्यामबहादुर चौधरी ओ प्रेम चौधरीहे नियन्त्रणमे लेहल बटैले बटै ।

डिभिजन वन कार्यालय कैलालीसे पुस १९ गते चुरे–२ के टमान तीन स्थनसे सालके कठ्वा बरामद करल बा । चुरे–२ के एक सामुदयिक वन क्षेत्रसे ५९ दशमलव १९ क्युफिट सालके ६८ थान चिरान काठ बरामद करल जनाइल बा । ओस्टके, उहे दिन फरक–फरक दुई स्थानसे क्रमशः ३६ दशमलव ८९ तथा ५१ दशमलव ५१ क्युफिट कठ्वा वेवारिसे अवस्थामे फेला परल बटाइल बा । डिभिजन वन कार्यालयसे पुस २० गते चुरे–२ से सालके २७७ थान चिरान काठ बरामद करल ओ उक्त काठके परिमाण १३९ दशमलव ९७ क्युफिट रहल ठाकुर बटैलै ।