निर्वाचन करैना उत्साहित बटै युवा

पहुरा समाचारदाता
धनगढी, २८ पुस । जेनजी युवा पुस्ताके ऐतिहासिक आन्दोलनपाछे मुलुकमे पहिल चो हुई जैटी रहल निर्वाचन सफल पारेक लाग उहे पुस्ताके युवा उत्साहित डेखल बटै । अइना फागुन २१ गते हुइना प्रतिनिधि सभा सदस्य निर्वाचनहे निर्वाचन प्रहरी बनके सफल बनाइक लाग युवा पुस्ता उत्साहित डेखल बटै ।

निर्वाचन प्रहरीमे भर्नाके लाग जिल्ला प्रहरी कार्यालयमे आवेदन पेश कैना ओइनके भीड लग्टी रहल बा । कैलालीमेफे निर्वाचन प्रहरीमे भर्ना हुइक लाग युवा पुस्ताके आकर्षण डेखल बा । कलेज अध्ययन करटी रहल, अध्ययनपाछे बेरोजगार रहल, नेपाली सेना, प्रहरीके जागिरके लाग तयारी करटी रहल युवायुवतीके जिल्ला प्रहरी कार्यालय परिसरमे भीडभाड हुइटी रहल बा ।

जनताके सुरक्षा करके निर्वाचन सफल बनाइक लाग निर्वाचन प्रहरी हुई आवेदन डेहे आइल नेपाल प्रहरीके तयारी करटी रहल नगेन्द्र सिंह बटैलै । “अपन कर्तव्य पूरा करके उ करलवाफत प्राप्त हुइना रकम लेके गुजाराके लागफे आवेदन डेहे आइल हुँ”, उहाँ,“ काहेकी, अब्बे बेरोजगार बटु ।”

क्याम्पस अध्ययन करटी रहल युवा पुस्ता प्रायः बेरोजगार रहल कारण ढेर जैसिन युवा निर्वाचन प्रहरीमे भर्नाके लाग आवेदन डेहे अइटी रहल बटै । अब्बे लोकसेवाके विज्ञापन नैखुलल ओरसे लोकसेवा तयारी करटी रहल निर्वाचन प्रहरी बनेक लाग आवेदन डेहे अइटी रहल जनाइल । “एक महिनासम लोकसेवाके कौनो फे विज्ञापन नैहो”, सिंह ठप्लै,“खाली बैठनासे बरु एक महिनाके फे यहोर आवेदन डेहे लागल हो ।” जेनजी पुस्ताके भारी आन्दोलनके कारण मुुलुकमे हुइल परिवर्तनपाछे हुई लागल निर्वाचन सफल पर्ना महत्वपूर्ण जिम्मेवारी अपनेहुकनके काँधमे रहल युवा पुस्ताके कहाई बा ।

जेनजी आन्दोलनसे ल्यानल परिवर्तन पश्चात हुई जैटी रहल निर्वाचन सफल बनाइक लाग निर्वाचन प्रहरीमे आवेदन डेहे आइबेर बहुट खुशी लग्टी रहल बझाङसे कैलाली पुगल राजेश विक बटैलै । “महीहे खुशी लग्टी रहल बा । उत्साहितफे बटु”, उहाँ कहलै, “मै इमानदारितापूर्वक काम कैना इच्छुक बटु ।” विक सुरक्षा क्षेत्रओर अपन रुचिफे रहल सुनैटी अब्बे बेरोजगार रहल कारण आवेदन डेहे आइल उल्लेख करलै । “अनुभवफे हुइठ”, उहाँ कहलै ।

कैलालीमे निर्वाचनमे सहयोगके लाग चार हजार ९८ निर्वाचन प्रहरी भर्ना कैना जिल्ला प्रहरी कार्यालय जनैले बा । माघ १ गतेसम आवेदन लेना प्रवक्ता एवम् प्रहरी नायब उपरीक्षक राजकुमार सिंह जानकारी डेलै । उहाँ चार दिनमे दुई हजारसे ढेरके आवेदन परल कहटी ठप्लैे, “आवेदन डेना समय सेकलपाछे छनोेट प्रक्रिया सुरु हुइना बा ।” निर्वाचन प्रहरीमे भर्नाके लाग आवेदन डेहे आइल युवा पुस्ता ।