युवाके राजनीतिक तगारो आर्थिक

पहुरा समाचारदाता
धनगढी, २९ पुस । आर्थिक समस्या युवाके राजनीतिक तगारो रहल धनगढीमे मंगकरे आयोजित एक कार्यक्रमके सहभागी बटैले बटै ।

राष्ट्रिय निर्वाचन पर्यवेक्षण समिति (नियोक) से आयोजना करल राजनीतिमे युवा पुस्ताके सहभागिताके चुनौती विषयके छलफल कार्यक्रमके सहभागी यैसिन बटाइल हुइट । अधिकांशसे युवा बेरोजगार रहल कारण आर्थिक समस्यासे राजनीतिमे आघे बह्रे नैसेकल बटैलै । खर्चहा निर्वाचन प्रणाली आउर भारी तगारो बनल ओइनके कहाई बा ।

बझाङके युवा भरत बोहरा युवा बेरोजगार हुइना करल कारण आर्थिक मुख्य चुनौती रहल उल्लेख करलै । उहाँ राजनीतिक दलहुक्रे अपनहे भोट बैङ्कके रुपमे केल्ह हेर्ना करल युवाहुकनके गुनासो बा करलै ।

ओस्टेक, दुसर युवा सन्तोष रावल नेपालके निर्वाचन प्रणाली अत्यन्त खर्चहा रहल कारण युवा पुस्ताहे राजनीतिमे लग्ना गाह«ो रहल बटैलै । उहाँ युवाहुक्रे बेरोजगार हुइल कारण चुनाव लरना हैसियत धारे नैसेक्ना करल कहटी ठप्लै, “युवाहे दलहुक्रे प्रचार प्रसार कैना ओ पोष्टर टँस्नामे सीमित राखल बटै ।”

बाजुराके युवा चरित्र बुढा विकट क्षेत्रमे राजनीतिक सचेतनाके कमी रहल बटैलै । दुसर युवा रेखा धानुक समुदायमे सचेतना नैहुइल कारण मजाहे सेफे हमारहे भोट डरना परिपाटी हावी रहल जिकिर करलै ।

राजनीतिक दलहुक्रे युवाके पाला नैअइना करके अपन पार्टीके आन्तरिक विधान बनाइल कारणफे युवाहे राजनीति कैना सहजुल नैरहल औंल्याइल बा । राष्ट्रिय निर्वाचन पर्यवेक्षण समिति (नियोक) के कार्यक्रम संयोजक प्रार्थना थापा राजनीतिमे नातावाद, कृपावादके कारण युवासे अवसर पाइ नैसेकल उल्लेख करलै । अभाव, अवसर नैपैना लगायतके कारणसे युवा पुस्ता डिप्रेसन ओ एनजाइटीके सिकार हुइटी रहल उहाँके कहाई बा ।

फाया नेपालके शेरबहादुर बस्नेत युवाहे राजनीति कैना सहजmुल नैहुइलफे असम्भवफे नैरहल बटैलै । नेपाल कम्युनिष्ट पार्टी (नेकपा) के निर्मल शाह अब्बेक पुस्तामे राजनीतिक खाडल रहल जिकिर करलै । राजनीति पद्धति, चेइन अफ कमाण्डमे चल्न हुइल ओरसे सिद्धान्त ओ व्यवहारमे फरक रहल उहाँके कहाई बा ।

विद्यार्थी प्राप्ती भट्ट युवा पुस्तामे राजनीति ओ कानुनके ज्ञान हुइना जरुरी रहल औंल्यइलै । दलहुक्रेफे युवाहे विश्वास कैना जरुरी रहल बटैलै । नियोकके आयोजनामे कार्यक्रम हुइल रहे । कार्यक्रममे नियोकके अध्यक्ष डा. गोपाल सिवाकोटीसे आब मुलुकके भविष्य का हुइना कना चिन्ताके विषय रहल बटैलै ।

कार्यक्रममे नियोकके कर्यक्रम कोडनेटर प्रार्थना थापा सडक, सत्ता ओ सहभागिता, राजनीतिमे यूवा सहभागिता विषयक प्रस्तुतीकरण करल रहिट । ओस्टेक सहजीकरण विकल श्रेष्ठ करल रहिट । कार्यक्रमके संचालन नियोकके प्रदेश संयोजक देवी खनाल करल रहिट।