धनगढीमे १६औँ राष्ट्रपति रनिङ शिल्ड सुरु

पहुरा समाचारदाता
धनगढी, ४ माघ । धनगढी उपमहानगरपालिकासे १६औँ राष्ट्रपति रनिङ शिल्ड प्रतियोगिता आयोजना करले बा ।

‘स्वास्थ्यके लाग खेलकुद, नगरके लाग खेलकुद’ कना नारासहित अँटवारसे सुरु हुइल प्रतियोगितामे २६ सामुदायिक ओ २० संस्थागत विद्यालय सहभागी हुइल बटै । माघ ८ गतेसम धनगढी रङ्गशालामे सञ्चालन हुइना प्रतियोगिता धनगढीके नगरप्रमुख गोपाल हमाल उदघाटन करल रहिट । उहाँ खेलकुद जित–हारमे केल्ह सिमित नैहुके स्वास्थ्य ओ जीवनशैलीसँग जोरेपर्ना बटैलै ।

‘खेलकुद जिटेक लाग केल्ह नैहो, स्वस्थ जीवनके लाग खेले परठ,’ उहाँ कहलै, ‘खेलकुद सदाके लाग हुई परठ । खेलकुद विद्यार्थीके लाग केल्ह नाही, सक्कुहुनके लाग आवश्यक बा ।’

उदघाटन समारोहमे उपमेयर कन्दकला रानाफे खेल ओ खेलाडीके दीर्घकालीन विकासके लाग उपमहानगरपालिका सदा साथमे रहल बटैली । उहाँ खेलकुदसे अनुशासन, नेतृत्व ओ सकारात्मक सोच विकास कैना उल्लेख करटी विद्यार्थीनहे खेलमे सक्रिय सहभागिता जनैना आग्रह करली ।

प्रतियोगिताअन्तर्गत टमान एथलेटिक्स, सामूहिक तथा व्यक्तिगत खेल समावेश करल बा । उदघाटन समारोहमे उपमहानगरपालिकाके जनप्रतिनिधि, कर्मचारी, विद्यालयके शिक्षक विद्यार्थी लगायत सरोकारवालाहुकनके उपस्थिति रहे ।