धनगढीमे सीप तथा रोजगार मेला सुरु

पहुरा समाचारदाता
धनगढी, ५ माघ । धनगढी उपमहानगरपालिकाके आयोजनामे सोम्मारके रोजसे धनगढीमे सीप तथा रोजगार मेला सुरु हुइल बा । मेलाके उदघाटन श्रम, रोजगार तथा सामाजिक सुरक्षा मन्त्री राजेन्द्र सिंह भण्डारी करले बटै ।

उदघाटन समारोहहे सम्बोधन करटी मन्त्री भण्डारी देशभिटर रोजगारी सिर्जना कैना सीप विकास अनिवार्य रहल बटैलै । “आजके आवश्यकता प्रमाणपत्रसेफे सीप हो,” कहटी उहाँ सीपयुक्त जनशक्ति उत्पादनमे स्थानीय तहसे खेलल भूमिकाके प्रशंसा करलै । मन्त्री भण्डारी यैसिन मेलासे युवाहे वैदेशिक रोजगारीके विकल्प डेना विश्वास व्यक्त करलै ।

कार्यक्रममे बोल्टी धनगढी उपमहानगरपालिकाके मेयर गोपाल हमाल सीप तथा रोजगार मेलामार्फत स्थानीय युवाहे आत्मनिर्भर बनैना लक्ष्य राखल बटैलै । उहाँ धनगढीहे रोजगारी सिर्जनाके केन्द्र बनैना दीर्घकालीन योजनाअनुसार सीपमूलक तालिमहे प्राथमिकता डेहल उल्लेख करलै । मेयर हमाल “सीप सिखके अपने ठाउँमे रोजगारी सिर्जना करे सेक्जाई कना सन्देश डेना मेला आयोजना करल बटैटी युवाहे अवसरके अधिकतम उपयोग कैना आग्रह करलै ।

कार्यक्रममे स्वागत मन्तव्य रख्टी उपमेयर कन्दकला कुमारी राना सीप विकाससे आर्थिक सशक्तीकरणसँगे सामाजिक रूपान्तरणमे टेवा पुगैना बटैली ।

सीप तथा रोजगार मेलामे सुदूरपश्चिम प्रदेशके ८८ पालिकामध्ये ५१ पालिकाके सहभागिता रहल आयोजक धनगढी उपमहानगरपालिका जानकारी डेले बा ।

मेलाअन्तर्गत अटोमोबाइल, निर्माण, आतिथ्य तथा सत्कार, इलेक्ट्रिकल तथा मेकानिकल, सूचना प्रविधि, शैक्षिक तथा सेवा तथा आर्ट, क्राफ्ट एण्ड डिजाइनिङ करके ७ विधाअन्तर्गत २२ फरक–फरक तालिम सञ्चालन हुइटी रहल बा ।

रोजगारी सृजना ओ आत्मनिर्भरता अभिवृद्धि कैना उद्देश्यसे टमान क्षेत्रके २२ ठो निशुल्क सीपमूलक तालिम सञ्चालन कैना हुइल बा । तालिम कार्यक्रमसे ६ सय जाने सहभागी लाभान्वित हुइना आयोजक जनैले बा ।

तलिम अटोमोबाइल, निर्माण, आतिथ्य तथा सत्कार, इलेक्ट्रिकल तथा मेकानिकल, सूचना प्रविधि, शैक्षिक तथा सेवा ओ आर्ट, क्राफ्ट तथा डिजाइनिङ क्षेत्रअन्तर्गत सञ्चालन हुई । प्रत्येक तालिममे २५ जानेक सहभागिता रना व्यवस्था करल बा कलेसे सांस्कृतिक पोशाक निर्माण तालिममे ३५ जाने समेटजाई ।

अटोमोबाइल क्षेत्रअन्तर्गत इलेक्ट्रिक कार (इभि) ओ मोटरसाइकल÷स्कुटर मर्मतसम्बन्धी तालिम सञ्चालन करजाई । निर्माण क्षेत्रमे फर्निचर, प्लम्बिङ तथा बिल्डिङ इलेक्ट्रिकल वाइरिङ तालिम समावेश करल बा ।

ओस्टेक, आतिथ्य तथा सत्कार क्षेत्रमे कफी बारिस्टा, फास्टफुड÷कुक, वेटर÷वेट्रेस ओ बेकरी तालिम सञ्चालन हुई । इलेक्ट्रिकल तथा मेकानिकल क्षेत्रमे वेल्डिङ तथा रेफ्रिजरेटर एसी प्राविधिक तालिम समेटल बा ।

सूचना प्रविधि (आइसिटी) क्षेत्रमे डिजिटल मार्केटिङ, इलेक्ट्रोनिक्स (मोबाइल÷सीसीटीभी) तथा फोटोग्राफी ओ ड्रोन अपरेशन तालिम सञ्चालन हुई । शैक्षिक तथा सेवा क्षेत्रमे ईसीडी शिक्षक, पुरोहित, लेखा व्यवस्थापन, एडभान्स ब्युटिसियन तथा हेयर कटिङ तालिम धारल बा ।

ओस्टेक करके, आर्ट, क्राफ्ट तथा डिजाइनिङ क्षेत्रमे बुटिक तथा कढाई, सांस्कृतिक पोशाक निर्माण ओ वेटबाँस क्राफ्ट तथा हस्तकला सामग्री निर्माणसम्बन्धी तालिम सञ्चालन करजैना बा ।

यी तालिमसे स्थानीय युवायुवती तथा बेरोजगार व्यक्तिहे सीपयुक्त बनाके स्वरोजगार तथा रोजगारीमे जोरना लक्ष्य लेहल आयोजकके कहाई बा । तालिम स्थलमे सुदुरपश्चिमके टमान भेगमे पैना रैथाले उत्पादन प्रबर्धन कैना उद्देश्यसे निशुल्क रुपमे स्टल उपलब्ध कराइल बा । तालिम फागुन १२ गते सम्पन्न हुइना बा । सम्पन्न पश्चात सहभागीहुक्रे अपने व्यवसाय सञ्चालन कैना वा रोजगारीके अवसर प्राप्त कैना अपेक्षा करल बा ।