श्रीराम जानकी सामुदायिक वनके ११औं वार्षिक साधारण सभा

पहुरा समाचारदाता
पहलमानपुर, ५ माघ । कैलालीके घोडाघोडी नगरपालिका वडा नम्बर ११ मुर्गाहुवा स्थित श्रीराम जानकी सामुदायिक वन उपभोक्ता समुहके ११आंैं वार्षिक साधारणसभा तथा सार्वजनिक सुनुवाई कार्यक्रम सोम्मारके रोज सम्पन्न हुइल बा ।

समुहके अध्यक्ष चन्द्रबहादुर चौधरीके घरगोस्यामे हुइल कार्यक्रममे उहाँ प्राकृतिक सम्पदा बचाई सेक्लेसे केल्ह बनुवा बचैलक अर्थ लग्ना बटैलै । कार्यक्रमके वरका पहुना सिएफसिसी पहलमानपुरके अध्यक्ष पुष्कलबहादुर बम उपभोक्ताहुक्रे सामुदायिक वनके साधारण सदस्य नविकरण कैना जरुरी रहल बटैलै । विशिष्ट पहुना सव डिभिजन वन कार्यालय सुखडके वन रक्षक गोकुल थापा सामुदायिक वन भित्तरके सूचना सक्कु उपभोक्ता पत्ता पाई पर्ना जरुरी रहल बटैलै ।

घोडाघोडी नगरपालिका–११ के महिला वडा सदस्य पार्वती कठरिया वन जंगलमे हुइना चोरी शिकारी नियन्त्रणमे जोर डेहल रहि । पहुरा दैनिक पहलमानपुर समाचारदाता जीवन चौधरी सामुदायिक वनसे अपन अधिकार प्रयोग करेनैपाइल बटैलै ।
उ वनके पूर्व अध्यक्ष विहारीलाल थारु, तिल्कहनी सामुदायिक वन उपभोक्ता समुहके सल्लाहकार संयोजक चन्द्र शेखर पन्तलगायत मन्तव्य राखल रहिट ।

उ सामुदायिक वनके आर्थिक बर्ष २०८१/०८२ सालके २८ लाख ६५ हजार ८३५ रुप्या बराबरके आयव्यय विवरण लेखा समिति संयोजक प्रदेशु चौधरी प्रस्तुत करल रहिट ।

कार्यक्रममे स्वागत मन्तव्य सदस्य भागरथी विष्ट, ओ संचालन उपाध्यक्ष विरेन्द्रलाल थारु करल रहिट ।