राष्ट्रिय माविके ६४औं वार्षिकोत्सव

शैक्षिक गुणस्तर सुधार संयुक्त प्रयाससे केल्ह सम्भव

पहुरा समाचारदाता
धनगढी, ७ माघ । कैलाली जिल्लाके कैलारी गाउँपालिका वडा नम्बर २ स्थित उजलीसेमरामे रहल राष्ट्रिय माध्यमिक विद्यालयके ६४औं वार्षिकोत्सव समारोह तथा अभिभावक दिवस कार्यक्रम बुधके रोज सम्पन्न हुइल बा ।

विद्यालय व्यवस्थापन समितिके अध्यक्ष नविनकुमार बोहराके अध्यक्षतामे हुइल कार्यक्रममे प्रमुख अतिथि सुदूरपश्चिम प्रदेश सभा सदस्य तथा पूर्व भौतिक पूर्वाधार विकास मन्त्री घनश्याम चौधरी रहल रहिट । विशिष्ट अतिथि कैलारी गाउँपालिका उपाध्यक्ष भगवतीकुमारी चौधरी, वडा नम्बर २ के वडा अध्यक्ष विकास चौधरी, शिक्षा तथा खेलकुद शाखाके प्रमुख गणेश प्रसाद मिश्र रहल रहिट ।

कार्यक्रममे सम्बोधन करटी सुदूरपश्चिम प्रदेश सभा सदस्य घनश्याम चौधरी शैक्षिक गुणस्तर सुधार संयुक्त प्रयाससे केल्ह सम्भव रना बटैलै । उहाँ कहलै, शैक्षिक गुणस्तर सुधार कैना हो कलेसे एकल प्रयास असम्भव बा । यम्ने शिक्षक, अभिभावक, विद्यालय प्रशासनसंगे संघ, प्रदेश ओ स्थानीय तहके समन्वय आवश्यक रहल बटैलै । अपन बाल्यकालके सम्झना करैटी पहिलेक सेवा सुविधा ओ अब्बे बहुट फरक हुइल कहटी विद्यार्थीहुक्रे मजा शिक्षा पाके मजा करलेसे यी क्षेत्रके भारी मनै बन्ना बटैलै । ओस्टेक करके राष्ट्रिय माविहे प्रदेशके नमूना विद्यालय बनाइक लाग अपने पहल करके यहाँसम पुगल बटैलै । अपने क्षेत्र नम्बर ३ के प्रदेश सभा सदस्य रहल कहटी बढैपुर सुर्मिनालाके अधुरा सडक निर्माण करुवाके छोरना बटैलै ।

कार्यक्रमके विशिष्ट अतिथि गाउँपालिका उपाध्यक्ष भगवतीकुमारी चौधरी शैक्षिक सुधारके लाग गाउँपालिकासे भारी लगानी करल बटैली । उहाँ कहली, ‘पैसा लगानी करके केल्ह गुणस्तरीय शिक्षा बनाइ नैसेक्जाइठ । यम्ने सक्कु क्षेत्रके समँन्वय सहकार्य अनिवार्य रहठ । गुणस्तरीय शिक्षा ल्यानेक लाग गाउँपालिका भौतिक पूर्वाधारसंगे कम्जोर विद्यार्थीनहे अतिरिक्त कक्षाके लाग रकम विनियोजन करल मने सुधार नैहुइल हो ।

भौतिक विकास हुइटी रना मने मानविय ओ सामाजिक विकास अनिवार्य रहल उहाँ बटैलै । गाउँपालिकामे बहुमुखी क्याम्पस स्थापना हुई नैसेक्ना दुखद बाट रहल कहटी यहाँके विद्यार्थी कक्षा १२ पास करके बाहेर जैना बाध्यता रहल उहाँ बटैली ।

विशिष्ट अतिथि वडा नम्बर २ के वडा अध्यक्ष विकास चौधरी राष्ट्रिय मावि नमूना विद्यालय बनल बटैलै । उहाँ कहलै, ‘प्रदेश सरकारसेफे नमूना विद्यालय कहिके घोषणा करल ओरसे कामफे नमूना करके डेखैना जरुरी बा । उहाँ वडा कार्यालयके सहयोगमे यी विद्यालयमे एक जाने नर्स शिक्षक धारल बटैलै ।

कार्यक्रममे विशिष्ट अतिथि कैलारी गाउँपालिका शिक्षा तथा खेलकुद शाखाके प्रमुख गणेश प्रसाद मिश्र यी विद्यालय भौतिक पूर्वाधारमे पूर्ण रहल कहटी शैक्षिक उपलब्धीमे पूर्ण बनैना आवश्यक रहल बटैलै । विद्यालयके हार्डवेयर मजा रहल कहटी सफटेवेयरफे मजा बनाइपर्ना बटैलै ।

गाउँपालिकासे शैक्षिक गुणस्तर सुधार करेक लाग नियमित प्रअ बैठक करल कहटी आपन लर्कनके शिक्षा ओ भविष्यप्रति अभिभावकफे सचेत हुइना जरुरी रहल उहाँ बटैलै ।

कार्यक्रममे जनता मावि गदरियाके प्रअ डिल्लीराम मिश्र यी विद्यालयमे कक्षा ८ सम विद्यार्थी संख्या मजा रहल कहटी उप्पर उप्पर कक्षामे विद्यार्थी घटल ओरसे यकर अनुसन्धान ओ शैक्षिक बहस जरुरी रहल बटैलै । यी विद्यालय अतिरिक्त क्रियाकलापमेफे आघे रहल उहाँ बटैलै ।

विद्यालयके प्रअ जितबहादुर रावत वार्षिक तथा प्रगती प्रतिवेदन प्रस्तुत करटी विद्यालयसे शैक्षिक गुणस्तरमे सुधारोन्मुख अवस्थामे रहल बटैलै । उहाँ कहलै, यी विद्यालय प्राविधिक धार ओ साधारण धारमे पह्राई संचालन करल बा । यहाँके विद्यार्थी शिक्षा तथा खेलकुद क्षेत्रमे अब्बल बन्टी गैल बटै । शिक्षकसंगे विद्यालय प्रशासन ओ अभिभावक मिल्के विद्यालयहे मजा बनाई सेक्जाई ।

विद्यालय पाँच बर्षे गुरुयोजनाके साथ आघे बह्रल कहटी पाँच बरषमे फरक पहिचान बनैना उहाँ बटैलै । विद्यालयमे ४५ जाने जनशक्ति रहल ओ ६१६ जाने विद्यार्थी रहल बटैलै ।

विद्यालय व्यवस्थापन समिति अध्यक्ष नविनकुमार बोहरा शिक्षक, अभिभावक सरोकारवाला सक्कु जानेक सहयोग ओ सपोटसे विद्यालय अटरा उचाईमे पुगल बटैलै ।

कार्यक्रममे विद्यालय व्यवस्थापन समितिके सदस्य लक्ष्मी दहित स्वागत मन्तव्य ओ संचालन अनिता चौधरी बोहरा, धनबहादुर बम करल रहिट । कार्यक्रममे शिक्षक, पूर्व शिक्षक, विद्यार्थीनहे सम्मान कैगिल बा । कलेसे वार्षिकोत्सवके अवसरमे हुइल टमान अतिरिक्त क्रियाकलाप, खेलकुड प्रतियोगिताके विजयता तथा शैक्षिक पुरस्कार वितरण कैगिल बा ।

वार्षिकोत्सव कार्यक्रममे कैलारी गाउँपालिकाके खेलकुद संयोजक आरती चौधरी, महिला संजाल संयोजक कृष्णा चौधरी, अभिभावक, टमान व्यक्तित्वहुकनके सहभागिता रहे ।