मोडेल अन्जु कुश्मीहे अपमान
पहुरा समाचारदाता
धनगढी, ८ माघ । गायिका तथा मोडेल अन्जु कुश्मीहे अपमान करल बा ।
बर्दिया जिल्लामे श्री हरियाली क्लबके आयोजनामे सञ्चालन हुइटी रहल बार बर्दिया कृषि, पर्यटन, व्यापार तथा खेलकुद महोत्सवमे आमन्त्रित कैके फेन वेवास्ता करल कहटी अपमानित करल हो ।
आयोजक पक्षसे प्रस्तुतीके लाग बोलैसेसे फेन सम्पर्कमे नैआइल ओरसे अपने अपमानित होके कार्यक्रमस्थलसे आइ परल उल्लेख करले बटी । आपन आधिकारिक फेसबुक स्टाटस मार्फत आयोजकसँग सम्पर्क नैहुइल तथा निर्धारित समयसम फेन मञ्चमे प्रस्तुति डेहे नैपाके अपमानित हुइल अनुभूति जनैटी कार्यक्रम नैकेके आइ परल उल्लेख करले बटी । उहाँ कलाकारके सम्मान ओ व्यावसायिक मर्यादा उपर प्रश्न उठ्ना मेरके ओइसीन व्यवहार हुइल लिख्ले बटी ।
उ घटनाप्रति राष्ट्रिय थारु कलाकार मञ्च गम्भीर ध्यानाकर्षण हुइल जनैटी कडा आपत्ति प्रकट करले बा । मञ्चके अध्यक्ष विनय वैद्यके हस्ताक्षरित एक विज्ञप्ति जारी कैटी कलाकारहे बोलाके उचित व्यवस्थापन नैकैना आयोजकके गैरजिम्मेवार ओ निन्दनीय कार्य रहल उल्लेख करल बा । साथे, कलाकारके सम्मान सुनिश्चित कैना ओ भविष्यमे अइसीन घटना नैदोहोर्याइना आयोजक पक्षहे सचेत रहना आग्रह करल बा ।
कलाकारके मेहनत, समय ओ पहिचानके सम्मान करे पर्नामे इ मेरके घटना हुइना सक्कु कलाकार समुदायके लाग दुःखद हुइल मञ्चके कहाइ रहल बा । इ विषयमे आयोजक पक्षसे औपचारिक स्पष्टिकरण ओ क्षमायाचनाके अपेक्षा करल बा ।
