उज्यालो पार्टीके उम्मेदवार सुवास कुँवरसे घोषणापत्र सार्वजनिक

पहुरा समाचारदाता
धनगढी, ८ माघ । उज्यालो नेपाल पार्टी क्षेत्र नम्बर ४ कैलालीके उम्मेदवार सुवास कुँवर आपन चुनावी घोषणा पत्र सार्वजनिक करले बटै ।

बिफेक रोज धनगढीमे पत्रकार सम्मेलन कैटी उहाँ आपन पाँच बुँदे घोषणा पत्र सार्वजनिक करल हुइट । उम्मेदवार कुँवरसे पहिल बुँदामे शैक्षिक सुविधाके कमी रख्टी ओम्ने सामामाजिक समस्यामे जातिय तथा क्षेत्रीय विभेद ओ द्धन्द्धहे न्यूनीकरण कैना सामाजिक मेलमिलाप ओ एकताके सन्देश डेना योजना बनैना ओ महिला तथा सिमान्तकृत समुदायके पछौटेपनहे न्यूनीकरण कैना ओ आत्मनिर्भरके लाग सीपमुलक कार्यक्रम ओ बजारीकरण करक लाग स्थानीय सरकारहे जोर्ना बटैले बटै ।

ओस्टके बँदा नम्बर दुईमे प्रशासनिक समस्या डेखैटी सेवा वितरणमे असमानता नहोए कहिके सार्वजनिक सुनुवाइ, जनताके गुनासा सुनक लाग प्लेटफर्म बनैना जिहीसे जनताके आवाज सरकारसम पुगे उद्देश्य रहल बटैलै ।

बाह्र पहिरो जैसिन प्राकृतिक प्रकोपसे विस्थापित जनताके लाग स्थायीरुपमे बसोबास, सुकुम्बासी ओ अव्यवस्थित बसोबास रहल समस्याहे समाधान, कृषिमे आर्थिक रुपमान्तरण, प्रत्येक नगरपालिकामे एक कोल्ड स्टोर ओ प्रसोधन केन्द्र स्थापना आपन चुनावी घोषणापत्र रहल उहाँ जनाइल रहिट ।

ओस्टके प्रचुर सम्भावनो भरल चुरे क्षेत्रमे फलफुल ओ कृषि पशुपालनसे युवा व्यवसायीहे आत्मनिर्भर बनैनाके साथे चुरे क्षेत्रहे कृषि ओ पर्यटनसे जोरके एग्रो टुरिज्म हब बनैना बटाइल रहिट । साथे विकासके पूर्वाधार ओर डगरा घाट, खानेपानी, शैक्षिक सुविधा फेन सर्वसुलभ बनैना उहाँ आपन घोषणापत्रमे उल्लेख रहल बटैलै ।

क्षेत्र नम्बर ४ से कुँवर सहित १६ जनहनके उम्मेदावरी रहल बा । उ क्षेत्रसे नेपाल मजदुर किसान पार्टीसे अमृता भुल, राष्ट्रिय प्रजातन्त्र पार्टी कमल रजवार, नेशनल रिपब्लिक नेपालसे गोपीलाल चौधरी, नेपाली काँग्रेसके गोरखबहादुर विष्ट, स्वतन्त्र उम्मेदवार छत्रबबहादुर भट्टखत्री, मितेरी पार्टी नेपालसे दिनेशकुमार मल्ल, नागरिक उन्मुक्ती पार्टी नेपालसे धनबहादुर सुनार, नेपाल कम्युनिष्ट पार्टी(माओवादी)से भक्तबहादुर शाही, श्रम संस्कृति पार्टीसे भीमबहादुर थापामगर, नेपाल कम्यूनिष्ट पार्टी (संयुक्त) मोहनदेव मिश्र, नेपाल मानतावादी पार्टी यज्ञबहादुर टमोटा, नेकपा एमाले लेखराज भट्ट, राष्ट्रिय स्वतन्त्र पार्टी प्रसाद रेग्मी, नेपाली कम्युनिष्ट पार्टी हरिराम चौधरी, राष्ट्रिय जनमोर्चासे हेमराज भट्टलगायतके उम्मेदवारी रहल बा ।