कैलारी–५ पवेराके भल्मन्सामे रामबहादुर कठरिया निर्वाचित
पहुरा समाचारदाता
धनगढी, १० माघ । कैलाली जिल्ला कैलारी गाउँपालिका वडा नम्बर ५ पवेरा गाउँक भल्मन्सामे फेरसे रामबहादुर कठरिया निर्वाचित हुइल बटै ।
शनिच्चरके रोज हुइल भुरा खेल, खोज्नीबोज्नी, माघी डेवानीसे उहाँलगायत १२ सदस्य कार्यसमिति ओ ३ सदस्यीय सल्लाहकार समिति चयन कैगिल हो ।
कार्यसमितिके उपाध्यक्षमे प्रेमबहादुर चौधरी, सचिवमे विपराम चौधरी, सहसचिवमे परसराम चौधरी सर्वसहमत निर्वाचित हुइल बटै । ओस्टेक करके सदस्यमे विष्णबाबु कठरिया, गुलाब सिंह कठरिया, क्षेत्रपाल चौधरी, रामकृष्ण महतो, शान्ति चौधरी, अनिता कठरिया, मनपरी गुरुङ ओ पदेन सदस्यमे खुशीराम चौधरी रहल बटै । गाउँक ओरगान(चौकीदार)मे रामनाथ कठरियाहे चयन कैगिल बा ।
ओस्टेक करके सल्लाहकार समितिके संयोजकमे प्रेम चौधरी, सदस्यमे तेजराम चौधरी ओ रामकुमार महतों रहल चयन हुइल बटै । गाउँक भल्मन्सा रामबहादुर कठरियाके अध्यक्षतामे हुइल खोज्नीबोज्नी कार्यक्रममे सहजीकरण सहसचिव परसराम चौधरी करल रहिट । कार्यक्रममे समितिके उपाध्यक्ष प्रेमबहादुर चौधरी, सल्लाहकार समितिके सदस्य तेजराम चौधरी, प्रेम चौधरीलगायत मन्तव्य राखल रहिट ।
कार्यसमितिके सचिव विपराम चौधरी गैल माघसे यिहे माघ समके गाउँक आयव्यय तथा प्रगती विवरण प्रस्तुत करल रहिट । २ सय १४ घरधुरी रहल पवेरा गाउँ समाजसे घरौरा पैसा उठाके गाउँ समाजके सामुदायिक भवन निर्माणके गाउँहीमे २ कटठा जग्गा खरिद करल उहाँ जनैलै । पवेरा गाउँमे २२२ जटरा घरधुरी रहल मने गाउँमे दर्ता संख्या भर २१४ केल्ह रहल बटै ।
गाउँक निर्णयहे गाउँ समाजसे सर्वहमतिसे पारित करल रहिट । गाउँ समाजके खोज्नीबोज्नीसे एक बरसके लाग निर्वाचित हुइल लौव कार्यसमितिहे सल्लाहकार समितिके सदस्य तेजराम चौधरी शुभकामना तथा बधाई ज्ञापन करल रहिट । कलेसे भल्मन्सा रामबहादुर कठरिया दुसरा कार्यकालके फेरसे आपनहे सर्वसहमतसे भल्मन्सा बन्ना मौका डेहलमे गाउँसमाजहे धन्यावाद डेटी आगामी दिनमे गाउँ समाज भावननाहे समेटके सक्कु जानेक सल्लाहअनुसार आघे बह्रना प्रतिवद्धता जनैलै ।
