भुर्काभुर्की सामुदायिक वनके १३ औं वार्षिक साधारण सभा
पहुरा समाचारदाता
पहलमानपुर, १० माघ । भुर्काभुर्की सामुदायिक वन उपभोक्ता समूहके १३ औं वार्षिक साधारण सभा सम्पन्न हुइल बा । शनिच्चर घोडाघोडी नगरपालिका १० पहलमानपुरमे रहल सामुदायिक बनसे अपन वार्षिक साधारण सभा सम्पन्न करल हो ।
भुर्काभुर्की सामुदायिक वन उपभोक्ता समूहके अध्यक्ष मोहनसिंह थारूके अध्यक्षतामे हुइल कार्यक्रमके प्रमुख अतिथिके रूपमे पुष्करबहादुर बम रहल रहिट । विशिष्ट अतिथिमे सब डिभिजन वन कार्यालय सुखडके प्रतिनिधि गोकुल थापा तथा घोडाघोडी नगरपालिका वडा नम्बर १० के वडा सदस्य जयादेवी चौधरी रहल रहिट ।
उ कार्यक्रममे प्रमुख अतिथि रहल पुष्कर बहादुर बम अपन मन्तव्यमे सामुदायिक वन ओ निजी वनके नियम तथा सरकारसे करल कामबारे जानकारी डेटी नेपालके समुदायिक वनसे वन तथा वातावरण संरक्षण कैना दायित्व स्थानीय उपभोक्ताहुकनके प्रमुख कर्तव्य हो ओ नेपाल सरकारसे नियमन कैना काम हो । उपभोक्ताहे चहना काठ विधान अनुसार वितरण करेपरठ ओ समयमे साधारण सभा तथा नविकरण करलै सामुदायिक वन ध्यान डेहे परठ कहटी शुभकामना व्यक्त करल रहिट ।
उ कार्यक्रममे विशिष्ट अतिथि गोकुल थापा अपन मन्तव्य स्थानीय उपभोक्ताहुक्रे जिम्मेवारी डेहल कार्यसमितिसे विधान अनुसार चले परठ ओ उपभोक्ताहुक्रे अपने जिम्मेवारी सम्झके बनके संरक्षण कैना ओ व्यावसायिक प्रयोजनके लाग काठ वितरण कैना कानून अनुसार कारबाही हुइठ मने उपभोक्ताहुक्रे व्यक्तिगत रुपमे घर तथा गोठ निर्माण ओ दाउराके लाग केल्ह समुदायसे नितिगत रुपमे माग करेपरठ कहटी शुभकामना व्यक्त करल रहिट ।
उ कार्यक्रममे पहुना संस्थापक सचिव धनिराम चौधरी अपन मन्तव्यमे वर्तमान समितिहे छोट छोट कम्जोर औल्यइटी सुधार करेक लाग सुझाव डेहल रहिट ।
तुल्सीपुर सामुदायिक वन उपभोक्ता समूहके अध्यक्ष गोरखबहादुर सिंह स्थानीय छाडा गोरु व्यवस्थापनके लाग सक्कु सामुदायिक वनसे बजेट विनियोजन करेपर्ना माग करटी शुभकामना व्यक्त करल रहिट ।
कार्यक्रममे टमान सामुदायिक वन उपभोक्ता समूहके विशेष उपस्थिति रहे । कार्यक्रमके स्वागत मन्तव्य भुर्काभुर्की सामुदायिक वन उपभोक्ता समूह कोषाध्यक्ष ईन्द्रादेवी चौधरी राखल रहिट । आर्थिक वर्ष २०८१/२०८२ के २१ लाख ३७ हजार ५ सय ८९ रुप्या बराबरके आर्थिक प्रतिवेदन प्रस्तुत करल रहे कलेसे, आर्थिक वर्ष २०८२/२०८३ के लाग रू. ३७ लाख ८६ हजार २३५.२४ बराबरके बजेट कार्ययोजना बनाके प्रस्तुत करल रहे । उ साधारण सभा तथा सम्बन्धित कार्यक्रमके सञ्चालन सामुदायिक वन उपभोक्ता समूहके सचिव चन्द्रबहादुर सिंह करल रहिट ।
उ साधारण सभासे समूहके विगत वर्षके प्रगति समीक्षा करटी आगामी योजनाबारेमे छलफल तथा निर्णय करल बटाइल बा । सामुदायिक वन संरक्षण तथा उपभोक्ताके हितमे निरन्तर क्रियाशील रहल यी समूहसे स्थानीय स्तरमे वन व्यवस्थापन तथा सामुदायिक विकासमे महत्वपूर्ण योगदान पुर्याइटी आइल बा ।
