नेपाली काँग्रेस कैलालीके प्रचार–प्रसार विभाग संयोजकमे केशव मिश्र

पहुरा समाचारदाता
धनगढी,११ माघ । फागुन २१ गते हुई जैटिरहल प्रतिनिधि सभा निर्वाचन लक्षित करटी नेपाली काँग्रेस कैलालीसे प्रचार–प्रसार विभाग गठन करले बा । पार्टीके जिल्ला सचिव केशव मिश्रहे उक्त विभागके संयोजकके जिम्मेवारी डेहल बा ।

शुक्के धनगढीमे बैठल नेपाली काँग्रेस कैलालीके जिल्ला कार्यसमिति बैठकसे मिश्रके संयोजकत्वमे प्रचार–प्रसार विभाग गठन कैना निर्णय करल हो । निर्वाचनके तयारीहे थप व्यवस्थित, प्रभावकारी ओ परिणाममुखी बनैना उद्देश्यसे विभाग गठन करल पार्टीसे जनैले बा ।

प्रचार–प्रसार विभागमे नेपाल प्रेस युनियन कैलाली जिल्ला कार्यसमिति तथा लम्की शाखाके कार्य समितिके पदाधिकारी सदस्यके रूपमे रहल बटै । प्रेस युनियनसँग आबद्ध सञ्चारकर्मीहुकनके अनुभव ओ सक्रियतासे पार्टीके नीति, कार्यक्रम तथा उम्मेदवारके एजेन्डा आम मतदातामाझ सहज रूपमे पुम्गैना सहयोग पुग्न विश्वास करल बा ।

जिल्ला बैठकमे बोल्टि पार्टीके नेताहुक्रे निर्वाचन लोकतन्त्रके महत्वपूर्ण अभ्यास हुइल उल्लेख करटि काँग्रेसहे विजयी करैना संगठन सुदृढीकरणसँगै प्रभावकारी प्रचार अपरिहार्य रहल बटैलै । ओइने प्रचार–प्रसार अभियान मर्यादित, तथ्यपरक ओ सकारात्मक हुइपर्ना जोड डेलै ।

प्रचार–प्रसार विभागके संयोजक केशव मिश्र अपनहे डेहल जिम्मेवारीहे गम्भीरतापूर्वक निर्वाह कैना प्रतिबद्धता व्यक्त कर्लै । उहा पार्टीके ऐतिहासिक योगदान, वर्तमान राजनीतिक अवस्था ओ भावी योजनाहे जनतासमक्ष स्पष्ट रूपमे प्रस्तुत करटि प्रचार अभियान सञ्चालन कैना बटैलै ।

‘हम्रे परम्परागत प्रचारसँगे डिजिटल माध्यम, सामाजिक सञ्जाल ओ प्रत्यक्ष जनसम्पर्कहे प्राथमिकतामे ढरके आघे बहर्बि,’ मिश्र कहलै, ‘स्वस्थ प्रतिस्पर्धाके लाग मर्यादित ओ तथ्यमे आधारित प्रचार हमार मूल उद्देश्य हुई ।’

बैठकमे आइना निर्वाचनहे केन्द्रित कर्टी संगठन विस्तार, वडा तथा टोल तहसमम प्रचार संयन्त्र परिचालन, मतदाता भेटघाट कार्यक्रम ओ प्रशिक्षणसम्बन्धी विषयमा समेत छलफल हुइल रहे । पार्टीसे कैलाली जिल्लाके सक्कु निर्वाचन क्षेत्रमे समन्वयात्मक रूपमे प्रचार अभियान सञ्चालन कैना निर्णयसमेत रहे .

नेपाली काँग्रेस कैलालीसे प्रचार–प्रसार विभाग गठनसँगे निर्वाचन लक्षित गतिविधिहे थप तीव्र बनैना अपेक्षा करल बा। विभागसे स्थानीय तहसमम पार्टीके सन्देश पुगैटि जनमत सिर्जना कैना महत्वपूर्ण भूमिका खेल्न विश्वास पार्टी नेतृत्वसे लेहल बा ।