बाल विवाह विरुद्धके किशोरी सम्मेलन सुरु
पहुरा समाचारदाता
धनगढी, १२ माघ । सुदूरपश्चिम प्रदेश स्तरीय बाल विवाह विरुद्धके किशोरी सम्मेलन धनगढीमे सुरु हुइल बा ।
“पढौं अगाडी बढौं, वालविवाह नाई भनौं कना मुख्य नाराके साथ प्रदेश स्तरीय किशोरी संजालके आयोजनामे बालविवाह अन्त्यके लाग सुदूरपश्चिम प्रदेश स्तरीय किशोरी सम्मेलन २०८२ सोम्मारसे धनगढीमे सुरु ह्ुइल हो ।
सम्मेलनमे बाल विवाहसे बालबालिकाके शारीरिक तथा मानसिक विकासमे पर्ना, नकारात्मक असर ओ ओइने भविष्यमे भोगेपर्ना समस्याके विषयमे छलफल करके बाल विबाहहे हटैना आवश्यक योजना बनैना बटाइल बा । किशोरी संजालके रोशनी कोली कार्यक्रमके उदेश्यबारे जानकारी करैटी सामाजिक कार्यमे सूचना आदान प्रदान, बाल विबाहके अन्त्य ओ नीति निर्माणमे किशोरीके आवाज पुगैना उदेश्यसे कार्यक्रमके आयोजना करल बटैलै ।
दलित अधिकार मञ्च कैलाली, समविकास नेपाल अछाम, महिला विकास मञ्च बाजुरा, दलित समाज विकास मञ्च बैतडी ओ परोपकार ग्रामीण बिकास संघ बैतडीके संयुक्त सहयोग तथा समन्वयमे किशोरी सञ्जालसे आयोजना करल बाल विवाह विरुद्धके किशोरी सम्मेलनके प्रमुख अथिती तथा सामाजिक विकास राज्य मन्त्री सरस्वती खडका किशोरीहुक्रे भविष्यके कर्णधार हुइल बटैटी बाल विबाह अन्त्यके लागफे किशोरीहुकनके प्रमुख भूमिका रना बटैली ।
सामाजिक सञ्जालके प्रयोगसे छोटमे प्रेम विवाह कैना संस्कार बह्रटी गैल बटैटी उहाँ किशोरीहुक्रे भविष्यके मुख्यमन्त्री, मन्त्री, डाक्टर इन्जिनियर लगायत देशके निर्माता ओ परिवर्तनके सम्वाहक हुइल ओरसे अध्ययनमे ध्यान डेहेपर्ना बटैली । किशोरीहुक्रे उदैटी तारा रहल बटैटी राज्यमन्त्री खडका समाजमे परिवर्तनके ओजरारसंगे रुढिबादी संस्कारके अन्त्यके लाग लागेपर्ना बटैली ।
बाल विबाह जैसिन सामाजिक कुरिती विरुद्ध सशक्त रुपमे आवाज उठाईपर्ना बटैटी उहाँ सुदूरपश्चिम प्रदेशहे शसक्त ओ सम्बृद्ध बनैना किशोरीहुकनके प्रमुख भूमिका रना बटैली । सरकार, नागरिक समाज ओ किशोरीहुक्रे मिलके बालविबाह लगायतके कुसंस्कारके अन्त्यके लाग सक्कु जाने एकताबद्ध हुईपर्ना उहाँ बटैली ।
सामाजिक मन्त्रालयल किशोरीसंग मिलके बालविबाह न्यूनीकरण ओ शिक्षा, स्वास्थ्यके क्षेत्रमे काम करटी रहल बटैटी राज्यमन्त्री खडका गरिवी, बेरोजगारी ओ रुढिग्रस्त संकारके कारण बालविबाह अब्बे सम हटे नैसेकल बटैली । किशोरीहुक्रे बालविबाह, साईबर अपराध ओ बलात्कार जैसिन घटनासे पीडित बन्टी आइल बटैटी उहाँ यैसिन अपराधसे बच्न किशोरीहुक्रे सक्षम हुईपर्ना बटैली ।
किशोरी सञ्जालसे करटी आइल कार्यके प्रशंसा करटी राज्यमन्त्री खडका अभिन सक्रियताके साथ लग्ना अनुरोध करटी प्रदेश सरकारके साथ सहयोग सदा रना प्रतिबद्धता जाहेर करली । किशोरीहुकनके सल्लाह ओ सुझाव लेके आघे बह्रना बटैटी उहाँ सुदूरपश्चिम प्रदेशहे आघे बह्रैना बाल विबाह लगायत छाउपडी प्रथाके अन्त्य कैना सक्कु जाने एक ढिक्का हुके लागेपर्ना बटैली ।
ओस्टे करके कार्यक्रमके विशिष्ट अतिथी तथा दलित महिला अधिकार मञ्चके अध्यक्ष सावित्रा घिमिरे बाल विवाहके कारण महिलाहुक्रे शिक्षा, स्वास्थ्य, सामाजिक तथा आर्थिक अवसरसे बन्चित हुईपर्ना अवस्था आइल बटैटी बाल विवाह महिलाहुकनउप्पर शारीरिक, मानसिक ओ यौन हिंसाके जोखिम बहै्रना करल बटैली ।
अध्यक्ष घिमिरे बाल विवाहसे समाजमे गरिबी, अशिक्षा ओ सामाजिक असमानता बह्रना ओ समाजके विकासमे बाधा पुग्न बटैटी बाल विबाह अन्त्यके लाग सक्कु प्रतिबद्ध हुके लागेपर्ना बटैली । किशोरीहुक्रे शसक्त बन्टी गैल विषयसे अपनहे गौरव लागल बटैटी उहाँ अभिन समाज परिबर्तनके लाग लग्ना आग्रह करटी बाल विबाहके अन्त्य कैना करके काम करेपर्ना बटैली ।
२० बर्ष पारी विहे बारी कना सरकारके नाराहे फलदायी बनैना सक्कु जाने लागेपर्ना बटैटी अध्यक्ष घिमिरे कम उमेरमे कैना बाल विबाहके अन्त्य करेपर्ना बटैली ।
नेपाल पत्रकार महासंघ सुदूरपश्चिम प्रदेश महासचिव शिवराज भट्ट सुदूरपश्चिममे बालविवाह ढेर हुइल बटैलै । शिक्षा ओ जनचेतना रहल ठाउँमे बालविवाह बह्रना चिन्ताके विषय रहल बटैलै ।
कार्यक्रमके सभापति तथा प्रदेश स्तरीय किशोरी सञ्जालके अध्यक्ष गीतिका सोनाम दलित महिला अधिकार मञ्चके सहयोगसे अपने १ सय जाने किशोरीहुकनहे सशक्त बनैना बटैली ।
सक्कु मिल्के काम करटी खण्डमे बालविबाहके अन्त्य करे सेक्ना बटैटी उहाँ किशोरी समुहमे आवद्ध किशोरीहुक्रे सशक्त बन्टी गैल बटैली । काम करटी जाके चुनौती अइलेसेफे सिख्टी जैना जैना करल बटैटी उहाँ सम्मेलनसे महत्वपूर्ण योजना बनाके आघे बह्रना बटैली ।
प्रदेश सरकार नागरिक समाज ओ संघसंस्थाके सहयोगके निरन्तर अपेक्षा करटी उहाँ बाल विबाह विरुद्ध सक्कु जाने एक ढिक्का हुके लग्ना हो कलेसे हाली अन्त्य करेसेक्ना बटैली । कार्यक्रमके सञ्चालन किशोरी सञ्जालके सावित्री पाण्डे करल रहिट कलेसे अछामके किशोरीहुक्रे गीत मार्फत स्वागत करल रहिट । कार्यक्रम माघ १२, १३ ओ १४ करके तीन दिन सम चल्न हुइल बा ।
