सुदूरपश्चिम प्रदेश : चुनावी सरगर्मी बह्रटी

पहुरा समाचारदाता
धनगढी, १७ माघ । आगामी फागुन २१ गते हुइना प्रतिनिधिसभा सदस्यके निर्वाचनके लाग सुदूरपश्चि प्रदेशमे चुनावी सरगर्मी बह्रल बा । राजनैतिक दलके ओ स्वतन्त्र उम्मेदवार आन्तरिक बैठक तथा भेला कैके चुनावी रणनीतिसहित प्रचारप्रसार सुरु करलसँगे चुनावी चहलपहल बह्रल हो । नेपाली कांग्रेस, नेकपा (एमाले), नेपाली कम्युनिष्ट पार्टीलगायत बरवार दलके प्रत्यासी पार्टीके पुरान बिरासत जोगैना रणनीति बनाके प्रचारप्रसारमे होमल बटै ।

राष्ट्रिय स्वतन्त्र पार्टी, उज्यालो नेपाल पार्टी, राष्ट्रिय प्रजातन्त्र पार्टी, नेपाल मजदुर किसान पार्टीलगायत दलके प्रत्यासी ओ स्वतन्त्र प्रत्यासीहुक्रे चुनाव केन्द्रित गतिविधिमे सक्रियता बह्रैले बटै । ढेर प्रत्यासी सामाजिक सञ्जालके प्रयोग कैके मतदाताहे सुफ्लैना आसयके सामग्रीके प्रयोग बह्राइल डेखजाइठ् । कतिपय दलके उम्मेदवार घरदैलो अभियान सुरु करसेकल बटै । निर्वाचन प्रचारप्रसारमे होमल कतिपय उम्मेदवार सामाजिक सञ्जालमार्फत जथाभावी प्रचारप्रसार सामग्रीके प्रयोग बह्राइबर मतदातामे अन्योल डेखल स्थानीयके कहाइ रहल बा ।

स्थानीय चेतराज ओझा कहलै, “सामाजिक सञ्जालके जथाभावी प्रयोग कैना प्रवृत्ति बह्रेबर मतदातामे सही सूचना प्रवाह हुइल नैहो, अइसीन प्रवृत्तिहे नियमन कैना जरुरी बा, टब किल स्वच्छ, निष्पक्ष निर्वाचन हुइ ।” जेनजीके आन्दोलनपाछेक राजनीतिक परिवेशमे हुइ लागल निर्वाचनके प्रचारप्रसार शैली भर फेरल बा । उम्मेदवारहुक्रे सूचना प्रविधिके टमान माध्यमहे मुख्य प्रचार सामग्री बनैले बटै । पूरै कार्यकाल पूरा नैकैके बीचमे हुइ लागल इ निर्वाचनहे लेके कतिपय मतदाता निराश डेखल बटै । धनगढीके मतदाता भोजराज पाण्डेय कहलै, “अस्थिरता डेखजैनामे दल ढेर जिम्मेवार डेखजैठै, इहीसे जनतामे निराशा बा, मने निर्वाचनहे सम्पन्न कैके अस्थिरता टारक लाग दल नै जिम्मेवार हुइ परल ।”

सुदूरपश्चिम प्रदेशमे डडेलधुरा, कैलाली निर्वाचन क्षेत्र ४ ओ ५, अछाम क्षेत्र–१ कञ्चनपुर २ ओ ३ हे ढेर चासोके साथ हेरल बा । नेपाली कांग्रेसके निवर्तमान सभापति एवं पूर्वप्रधानमन्त्री शेरबहादुर देउवा विसं २०४८ से २०७९ सम हुइल निर्वाचनमे विजयी हुइटी आइल डडेल्लधुरा क्षेत्र सर्वाधिक चासोके केन्द्र बनल बा । इ निर्वाचनमे देउवा चुनावी प्रतिस्पर्धी नैहुइट । देउवा प्रत्यासी नैहोके कांग्रेसके विरासत जोगैना चुनौती थपल बा । यहाँ कांग्रेससे युवा नेता एवं नेविसङ्घके पूर्वकेन्द्रीय अध्यक्ष नैनसिंह महरहे चुनावी मैदानमे उटरले बा ।

उ क्षेत्रमे रास्वपाके डा. तारा जोशी, नेकपा (एमाले)के चक्रप्रसाद स्नेही, नेपाली कम्युनिष्ट पार्टीके मानसिंह माल, राप्रपाके गोविन्द खडायत, राष्ट्रिय जनमोर्चाके चन्द्रदेव विक, आम जनता पार्टीके खडकबहादुर ठकुराठी, श्रम संस्कृति पार्टीके महेन्द्र पुनमगरलगायत १३ जाने प्रतिस्पर्धी बटै । निवर्तमान गृहमन्त्री एवं कांग्रेस नेता रमेश लेखक विजयी हुइटी आइल कञ्चनपुर–३ मे अइना चुनावमे कांग्रेससे पूर्वपार्टी सभापति हरि बोहराहे प्रत्यासी बनैले बा । लेखक प्रत्यासी नैहोके उ क्षेत्रमे मतदातामे चासो बह्रल हो । उ क्षेत्रमे नेकपा (एमाले)के दीपकप्रकाश भट्ट, नेपाली कम्युनिष्ट पार्टीके मानबहादुर सुनार, रास्वपाके ज्ञानेन्द्रसिंह महतासहित १७ जाने प्रत्यासी बटै ।

कञ्चनपुर–२ मे नेपाली कांग्रेसके नेता एवं पूर्वमन्त्री एनपी साउद प्रत्यासी बटै । तीन बरस आघेक चुनावमे विजयी हुइल साउदसँग नेकपा (एमाले) के युवा नेता बचनबहादुर सिंह, नेपाली कम्युनिष्ट पार्टीके माधवप्रसाद पन्त, रास्वपाके दीपकराज बोहरा, राप्रपाके तीर्थराज चटौतसहित १९ जाने प्रतिस्पर्धा कैटी बटै । कैलाली क्षेत्र–४ मे नेकपा (एमाले)के उपमहासचिव एवं पूर्वमन्त्री लेखराज भट्ट प्रत्यासी हुइबर चासो डेखल हो । आघेक निर्वाचनमे कांग्रेसके प्रदेश सभापति वीरबहादुर बलायर विजयी हुइल इ क्षेत्रमे अइना चुनावमे प्रत्यासी नैहुइट । कांग्रेससे आनन्द विष्टहे प्रत्यासी बनैले बा । इ क्षेत्रमे नेपाली कम्युनिष्ट पार्टीसे हरिराम चौधरी, रास्वपासे खेमराज कोइराला, राप्रपासे कमल रजवार, राष्ट्रिय जनमोर्चाके हेमराज भट्टलगायत १६ प्रतिस्पर्धी बटै ।

अछाम–१ मे नेपाली कम्युनिष्ट पार्टीके नेता एवं पूर्वउपप्रधानमन्त्री भीमबहादुर रावल प्रत्यासी बटै । उहाँसे नेपाली कांग्रेसके भरतकुमार स्वाँर, नेकपा (एमाले) के दीपकबहादुर साउद, रास्वपाके ओमप्रकाश रावललगायत उम्मेदवार प्रतिस्पर्धामे रहल बटै । उ क्षेत्रमे उहीसे आघेक निर्वाचनमे तत्कालीन नेकपा (एकीकृत समाजवादी) के शेरबहादुर कुवँर विजयी हुइल रहिट । प्रदेशके राजधानी सहर धनगढी कैलाली निर्वाचन क्षेत्र–५ मे आघेक निर्वाचनमे विजयी कांग्रेसके डिल्लीराज पन्त अब्बे प्रतिस्पर्धी नैहुइट । कांग्रेससे इ क्षेत्रमे युवा नेता एवं प्रदेशके महामन्त्री नरनारायण शाहहे प्रत्यासी बनैले बावै ।

नेकपा एमाले) के जिल्ला अध्यक्ष यज्ञराज ढुङ्गाना, नेपाली कम्युनिष्ट पार्टीके प्रेमबहादुर आले, रास्वपाके आनन्दबहादुर चन्द, उज्यालो नेपाल पार्टीके चन्द्र साउदसहित १५ जाने प्रतिस्पर्धामे बटै । पूर्वमन्त्रीसमेत रहल आले उहीसे आघेक निर्वाचनमे डोटीसे तत्कालीन नेकपा (एकीकृत समाजवादी) के ओरसे विजयी हुइल रहिट । कैलाली क्षेत्र–५ (धनगढी) सुदूरपश्चिम प्रदेशके एकठो उपमहानगरपालिका ओ प्रमुख व्यापारिक केन्द्र रहल इ क्षेत्रके चुनावप्रति ढेर चासो बह्रल हो । प्रतिनिधिसभा ओर १६ निर्वाचन क्षेत्र रहल सुदूरपश्चिम प्रदेशमे राजनीतिक दलके ओ स्वतन्त्र सहित २०६ जाने चुनावी प्रतिस्पर्धामे बटै ।