निर्वाचन ओ सहभागिता विषयक अन्तरक्रिया
पहुरा समाचारदाता
धनगढी, २० माघ । अनौपचारिक क्षेत्र सेवा केन्द्र (इन्सेक) सुदूरपश्चिम प्रदेश कार्यालय, धनगढी ओ नेपाल मानव अधिकार संगठनके संयुक्त आयोजनामे लोकतन्त्रके स्थायित्वके लाग निर्वाचन ओ सहभागिता विषयक अन्तरक्रिया कार्यक्रम धनगढीमे सम्पन्न हुइल बा ।
‘स्वच्छ निर्वाचनके लाग नागरिक अभियान’ कना मूल नाराके साथ स्वतन्त्र, ेनिश्पक्ष ओ भयरहित वातावरणमे निर्वाचन सम्पन्न कैना उद्देश्यसे कार्यक्रमके आयोजना करल हो ।
आन्तरिक मामिला तथा कानुनमन्त्री हिरा सार्की स्वच्छ निश्पक्ष ओ पारदर्शी रुपमे निर्वाचन सम्पन्न कैना राजनीतिक दल, नागरिक समाज, पत्रकार, सुरक्षा निकाय सक्कुहुनके दायित्व रहल ओरसे सक्कु जाने आ–अपन ठाउँसे निर्वाचन आचारसंहिता उल्लंघन करल नैकरल अनुगमन कैना आवश्यक रहल बटैलै ।
सुदूरपश्चिम प्रदेश सभा सदस्य पदमबहादुर शाही लोकतन्त्र स्थायित्व मानव अधिकारके विषय रहल ओरसे स्वच्छ, निश्पक्ष ओ पारदर्शी निर्वाचन सम्पन्न कैना सक्कुहुनके भूमिका रहल ओरसे सक्कु आचारसंहिता कार्यान्वयन कैना करैना आग्रह करलै ।
प्रमुख जिल्ला अधिकारी हिरालाल रेग्मी फागुन २१ गते सम्पन्न हुइना निर्वाचनके लाग जिल्लामे शान्ति सुरक्षाके सक्कु तयारी हुइटी रहल, भारतसँग खुला सिमाना हुइना ओ कैदीबन्दी फरार अवस्थामे रहल ओरसे शान्ति सुरक्षामे चुनौती हुइलेसेफे सुरक्षा समितिसे सावधानी अपनैटी रहल बटैलै ।
मुख्य निर्वाच अधिकृत भुवनसिंह थापा निर्वाचन आचारसंहिता पालना करटी ओ राजनीतिक दल, नागरिक समाज, पत्रकार ओ मतदाताहुक्रे आ–अपन ठाउँसे सकारात्मक सहयोग करके निर्वाचन सम्पन्न कैना आग्रह करलै ।
सुदूरपश्चिम प्रदेश निर्वाचन कार्यालय, धनगढीके प्रमुख प्रेमराज भट्ट निर्वाचन आचारसंहिता लागु हुइटी रहल ओरसे सक्कु राजनीतिक दलसे आचारसंहिताके पूर्ण पालना कैना प्रतिबद्धता जनासेकल ओरसे ओ कर्मचारी व्यवस्थापन तथा निर्वाचनसम्बन्धी सक्कु सामग्री निर्वाचन क्षेत्रमे पठैना तयारी हुइटी रहल बटैलै ।
इन्सेकके अध्यक्ष विजयराज गौतम निर्वाचनके मजा मतपरिणामके लाग मतदाता शिक्षाके महत्वपूर्ण भूमिका रहल ओरसे सामाजिक सञ्जालके दुरुपयोग ओ डिजिटल ट्रोलसे मतपरिणाममे असर करे सेक्ना हुइल ओरसे यकर नियमन कैना आवश्यक रहल बटैलै ।
नेपाल मानव अधिकार संगठनके अध्यक्ष इन्द्रप्रसाद अर्याल लोकतान्त्रिक व्यवस्थाहे व्यवस्थित कैना ओ नयाँ जनादेशके लाग निर्वाचन महत्वपूर्ण हुइना ओरसे सक्कु राजनीतिक दलहुक्रे इमान्दारीपूर्वक अपन नयाँ योजना घोषणा पत्रमे उल्लेख करके आचारसंहिता कार्यान्वयन करेपर्ना बटैलै ।
इन्सेक केन्द्रीय कार्यालयके वरिष्ठ अधिकृत तथा सूचना अधिकारी कृष्ण गौतम भदौ २३ ओ २४ गते हुइल जेन्जी आन्दोलनके परिणाम स्वरुप फागुन २१ गते हुइना प्रतिनिधि सभाके निर्वाचन स्वच्छ, निश्पक्ष, पारदर्शी ओ भयरहित वातावणमे सम्पन्न करेक लाग नागरिक समाजसे प्रत्यक्ष वा अप्रत्यक्ष रुपमे निर्वाचनके अनुगमन कैना आश्वयक रहल बटैलै ।
नेकपा एमालेके सुदूरपश्चिम प्रदेश सचिव रणबहादुर चन्द निर्वाचन सभ्य ओ भव्य बनैना निर्वाचन आचारसंहिता लागु हुइल थेनसे आचारसंहिता कार्यान्वयन हुइल नैहुइल ओ शान्ति सुरक्षा कायम करेक लाग सम्बन्धित निकायसे कडाईके साथ निगरानी करेपर्ना बटैलै ।
नेपाली कांग्रेस, कैलालीके प्रचार विभाग प्रमुख तपेन्द्र भुषाल कारागारसे भागल कैदीबन्दीहुकनके कारण ओ सामाजिक सञ्जालमे भ्रामक प्रचारप्रसारके कारण मतदातामे असुरक्षा बह्रल बटैलै ।
राष्ट्रिय मानव अधिकार आयोगके निमित्त प्रमुख झंकरबहादुर रावल निर्वाचन अनुगमन तथा समग्र मानव अधिकारके अनुगमन कैना राष्ट्रिय मानव अधिकार आयोगके संवैधानिक दायित्व रहल ओरसे नियमित अनुगमन करटी रहल ओ हालसम निर्वाचन आचरसंहिता उल्लंघनके कौनोफे घटना नैआइल बटैलै ।
फाया नेपालके अध्यक्ष गोमा आचार्य प्रमुख राजनीतिक दलसे महिला उम्मेदवारहे टिकट नैडेके महिला प्रतिनिधित्व घटटी रहल ओरसे राजनीतिक क्षेत्रमे महिलाके पहुँच हुई नैसेकल बटैली ।
