कैलारीमे माघ २७ गतेसे किशोरीनमे एचपिभी खोप लगैना
पहुरा समाचारदाता
धनगढी, २० माघ । कैलाली जिल्लाके कैलारी गाउँपालिकामे महिलामे पाठेघरके क्यान्सरके जोखिम न्यूनीकरण कैना लक्षित विद्यालय केन्द्रित एचपिभी खोप सेवा माघ २७ गतेसे २९ गतेसम संचालन कैना जनागिल बा ।
कैलारी गाउँपालिका स्वास्थ्य शाखाके आयोजनामे गाउँपालिका उपाध्यक्ष भगवतीकुमारी चौधरीके विशिष्ट आतिथ्यतामे मंगरके रोज सरोकारवाला हुकनसंगके अन्तरक्रिया कार्यक्रममे स्वास्थ्य शाखा संयोजक नरेश कुमार चौधरी उ जानकारी डेहल रहिट ।
एचपिभी खोप मुख्यतया कक्षा ६ से १० सम अध्ययनरत किशोरीहुकनहे लगैना उहाँ जनैलै । उहाँ कहलै, कैलारी गाउँपालिकाके सक्कु विद्यालयमे अध्ययनरत रहल किशोरीहुकनहे पाठेघरके क्यान्सरके जोखिम न्यूनीकरण कैना लक्षित विद्यालय केन्द्रित करके लगैना बा । गत बरस १९ सय ५ जनहनहे उ खोप लगैना लक्ष्य लेहलमे १७ सय ४१ जाने ९१ प्रतिशतहे खोप लगाइल उहाँ बटैलै ।
कार्यक्रममे स्वास्थ्य कार्यालय कैलालीके खोप निरिक्षक प्रदीप जोशी यी वर्ष जिल्ला भर दश हजार तीन सय ८५ किशोरीहे खोप लगैना लक्ष्य रहल कैलाली जनैले बा । कैलाली जिल्लामे माघ २७ गतेसे फागुन १ गतेसम सञ्चालन हुइना उहाँ जनैलै ।
जेम्ने विद्यालय बाहेर रहल एक सय ७६ जाने बालबालिकाहे समेत खोजी करके खोपमे समावेश कैना बा । ओस्टेक करके, गैल वर्ष कौनो कारणसे खोप छुट हुइल ११–१४ वर्ष उमेर समूहके ९९ जाने किशोरीहुकनहेफे यी बार समेटन योजना बनाइल बा ।
जिल्लाभर खोप कार्यक्रम प्रभावकारी रूपमे सञ्चालन कैना ३८५ सामुदायिक ओ २८१ संस्थागत विद्यालय छनोट करल बा । यी विद्यालयमार्फत ४२९ ठो खोप केन्द्र स्थापना कैना बा । अभियानहे सफल बनैना ३८८ जाने स्वास्थ्यकर्मी ओ ३८८ जाने स्वयंसेवक खटैना स्वास्थ्य कार्यालय जनैले बा ।
स्वास्थ्य कार्यालयके अनुसार आर्थिक वर्ष २०८१÷८२ मे जिल्लामे ४७ हजार ६ सय ५५ जाने टमान खोप सेवा लेहल रहिट । यी वर्ष उ संख्याहे आउर बढाके शतप्रतिशत लक्ष्य हासिल कैना उद्देश्य रहल बा ।
ओस्टेक करके स्वास्थ्य कार्यालय कैलालीके विनमकुमार श्रेष्ठ महिलाके महिनावारी सम्बन्धी प्रस्तुतीकरण करल रहिट । कार्यक्रम समापन कार्यक्रममे मन्तव्य रख्टी गाउँपालिका उपाध्यक्ष भगवतीकुमारी चौधरी महिलाहुक्रे आपन स्वास्थ्य लाग अपनही ध्यान डेहे पर्ना बटैली । महिलाके सबसे महत्वपूर्ण अंग पाठेघर रहल कहटी समय समय चेक जाँच करैना आवश्यक रहल बटैली । कार्यक्रममे वडा अध्यक्षहुक्रे, टमान शाखाके प्रमुख, स्वास्थ्यकर्मीहुकनहे सहभागिता रहे ।
बाजुरामे १ हजार ८०६ जाने किशोरीहे खोप लगैना
पाठेघरके मुहक क्यान्सर रोग विरुद्ध यहाँके एक हजार ८०६ जाने किशोरीहे खोप लगैना हुइल बा । स्वास्थ्य कार्यालयके अनुसार राष्ट्रिय खोप कार्यक्रमअन्तर्गत जिल्लाभर इहे माघ २७ से फागुन ३ गतेसम नियमित खोपके रूपमे पाठेघर मुहक क्यान्सरविरुद्ध खोप अभियान सञ्चालन हुइना बा ।
स्वास्थ्य कार्यालयके निमित्त कार्यालय प्रमुख लालबहादुर खड्का इ बरस जिल्लामे कक्षा ६ मे अध्ययनरत एक हजार ७८१ ओ विद्यालय बाहर रहल २५ सहित एक हजार ८०६ जाने किशोरीहे उक्त खोप डेना जानकारी डेलै । विद्यालय बाहर बुढीगंगामे १६, बडीमालिकामे छ ओ त्रिवेणी नगरपालिकामे एक सहित २५ किशोरी रहल बटै ।
गैल बरस जिल्लामे अभियानके रूपमे सात हजारसे ढेर किशोरीहे पाठेघर मुहके क्यान्सरविरुद्ध खोप लगाइल रहे । इ बरस नियमित खोपअन्तर्गत विद्यालयमे अध्ययनरत कक्षा ६ के किशोरी ओ विद्यालय बाहर रहल किशोरीहे फेन खोप डेना स्वास्थ्य कार्यालय जनैले बा ।
जिल्लाके नौ स्थानीय तहके विद्यालयमे स्थापना करल खोप केन्द्रमार्फत खोप सेवा प्रदान कैना बा कलेसे स्वास्थ्य संस्थासे फेन खोप लगाइ सेकजैना व्यवस्था करल बा । खोप अभियान गौमुल गाउँपालिका तथा बुढीगंगा ओ त्रिवेणी नगरपालिकामे माघ २७ गते, स्वामीकार्तिक खापर, जगन्नाथ, खप्तड छेडेदह गाउँपालिका ओ बडिमालिका नगरपालिकामे माघ २८ से तथा हिमाली गाउँपालिकामे माघ २९ गतेसे सञ्चालन हुइना निमित्त प्रमुख खड्का बटैलै ।
स्वास्थ्य कार्यालयके अनुसार किशोरीनके पाठेघरके मुहके क्यान्सर रोकथामके लाग एचपिभी खोप अत्यन्तै प्रभावकारी रहल ओरसे इ अभियानहे विशेष प्राथमिकता डेहल हो । गैल बरस जिल्लाभर ९८ प्रतिशत किशोरी पाठेघरके क्यान्सरविरुद्ध खोप लगाइल स्वास्थ्य कार्यालयके तथ्यांकमे उल्लेख बा ।
