अभिनेता सुनिल थापाके निधन
काठमाडौँ, २४ माघ । अभिनेता सुनिल थापाके शनिच्चरके रोज ६८ वर्षके उमेरमे निधन हुइल बा । शनिच्चरके बिहान अचानक स्वास्थ्यमे समस्या डेखाइलपाछे अभिनेता थापाहे उपचारके लाग थापाथलीस्थित नर्भिक अस्पताल लैगिल रहे ।
चलचित्र कलाकार संघके अध्यक्ष मोहन निरौला अभिनेता थापाके हृदयघातसे निधन हुइल अस्पताल जानकारी डेहल बटैलैं ।
“बिहान चलचित्रके छायांकनमे जाइपरना हुइल ओरसे अपनसँगे रहल सहयोगीहे हलि उठैना कना रहल, उ सहयोगी बिहान उठाइबेर अभिनेता थापाहे अचेत पाइलपाछे अस्पताल नानल रहे । अस्पतालसे प्रारम्भिक जाँच करलपाछे मृत घोषणा करल हो,” अध्यक्ष निरौला कलैं ।
अभिनेता थापाके श्रीमती, एक छावा ओ एक छाइ बटैं । “उहाँक परिवारके सदस्य भारतके मुम्बईमे रठैं,” अध्यक्ष निरौला कलैं ।
लम्मा समयसे नेपाली तथा भारतीय चलचित्रके अभिनयमे सक्रिय रहल थापाके असामयिक निधनसे सक्कु नेपाली कला जगत् स्तब्ध बनल बा । चलचित्रमे खलनायक पात्रहे फेन अभिनेता सरह चर्चा ओ सम्मान दिलैना सफल थापा ‘राते काइँला’ पात्रमार्फत् विशेष रूपमे लोकप्रिय रहैं । उहाँ शंखमूलस्थित अपार्टमेन्टमे बैठैं ।
