महिला तथा बालिकाउप्पर विद्युतीय हिंसा बह्रटी

पहुरा समाचारदाता
धनगढी, २६ माघ । सुदूरपश्चिम प्रदेशमे महिला तथा बालिकाउप्पर विद्युतीय हिंसा बह्रटी रहल ओरेक सुदूरपश्चिम जनैले बा ।
ओरेक सुदूरपश्चिम प्रदेश संयोजक सपना थापा बह्रटी रहल विद्युतीय अपराध सम्बन्धी प्रादेशिक प्रेस विज्ञप्ती जारी करटी महिला तथा बालिकाउप्पर विद्युतीय हिंसा बह्रटी रहल उ जानकारी डेली ।

अक्टोबरसे डिसेम्बर, २०२५ समके अवधिमे सुदूरपश्चिम प्रदेशके जिल्लामे लैङ्गिक विभेदमे आधारित हिंसाके कुल २७ ठो घटना अभिलेखीकरण करल बा । जेम्ने विद्युतीय माध्यमसे हुइल हिंसा ४ ठो (१४.८प्रतिशत), यौन हिंसा ४ ठो (१४.८प्रतिशत), घरेलु हिंसाके १६ ठो (५९.३ प्रतिशत) घटना ओ आत्महत्या प्रयासके २ ठो (७.४ प्रतिशत) घटना रहल उहाँ जनैली ।

कुछ प्रतिनिधि मुलक घटना

घटना–१ः कैलाली जिल्लामे बैठना सरिता (परिवर्तित नाम) अनलाइनके माध्यमसे यौन हिंसाके शिकार हुइली । उहाँक फेसबुक ओ ह्वाट्सएपमार्फत पवन (परिवर्तित नाम) सँग बाटचिट हुई लागल रहे । यिहे क्रममे उहाँ बीच अडियो ओ भिडियो कल हुइटी गैल । बाटचितके क्रम बह्रटी गैलपाछे सरिताहे पवनसे व्यक्तिगत ओ गोप्य अंग डेखैना दबाब डेटी धम्की डेहे लग्लै । डरसे उहाँ पवनसे कहल जस्टे करली ।

यिहे फाइदा उठाके पवनसे अनुहार ओ गोप्यअंग डेख्ना भिडियो रेकर्ड तथा फोटु लेना करल रहे उहाँहे यी बाट जानकारी नैहुइल । कुछ समयमे पवनसे अपने उहाँक गोप्य अंग सहितके फोटु, भिडियो धारल ओ सरिता कहल जटरा पैसा नैडेलेसे फोटु ओ भिडियो सामाजिक संजाल फेसबुकमे डर्ना धम्की डेहे लागलपाछे सरिता डराके सापटी खोजके हुइलेसेफे पैसा डेहले बटी । यिहे क्रममे उहाँ ओरेकसे सञ्चालन करल तालिममे सहभागी हुइना मौका पैली ।

सहभागिताके क्रममे उहाँ अपन उप्पर हिंसा हुइल ओ यी सम्बन्धमे प्रहरीमे उजुरी डेके सेक्ना जानकारी पाइलपाछे प्रहरीमे उजुरी डेली । अपराधि अपरिचित व्यक्ति हुइल ओरसे पक्राउ पर्न समय लागी कहलपाछे उहाँ गैल अगहन ७ गते घरसे निकरल हालसम सम्पर्कमे आइल नैहुइट । घर परिवारसे प्रहरीमे खोजी कार्यके लाग निवेदन डेले बटै । अपनहीफे खोज्टी रहल बटै ।

घटना–२

कैलाली जिल्लाके २२ वर्षीया मनिषा (परिवर्तित नाम) ओ ४७ वर्षीय राकेश (परिवर्तित नाम) बीच सामाजिक सञ्जाल मार्फत चिनजान हुके सम्बन्ध सुरु हुइल रहे । सुरुमे सामान्य संवाद ओ मित्रतासे सुरु हुइल सम्बन्धमे राकेश अपने अविवाहित ओ सफल व्यापारी हुइल कहटी मनिषासँग भोज कैना आश्वासन डेलै ।

उहाँ मनिषाके अभिभावक समेतहे विश्वासमे लेहलपाछे सम्बन्ध गहिरटी गैल । सम्बन्धके क्रममे राकेशसे मनिषासँग शारीरिक सम्बन्ध कायम करके “माया करम” कना बहानाममे फोटु तथा भिडिया खिच्लै । मनिषासे असहमति जनाईबेर उहाँ डर, धम्की ओ दबाब दिट । करिब दुई वर्षपाछे राकेश पहिले विवाहित, छावा–छाई रहल व्यक्ति तथा बैंक कसुर ओ चोरी मुद्दामे जेल सजाय भोग्टी रहल व्यक्ति हुइल तथ्य खुलेलपाछे मनिषासे सम्बन्ध तुरली ।

जेन्जी आन्दोलनके क्रममे कैदीबन्दी फरार हुइल समयमे राकेशफे कारागारसे फरार हुइल ओ पुनःमनिषासँग सम्पर्क करके उहाँ भोजके प्रयासहे विफल पर्ना उद्देश्यसे शारीरिक सम्बन्धके फोटु तथा भिडिया टिसरा व्यक्तिहुकनहे पठैटी निरन्तर मानसिक यातना डेलै । यिहीसे मनिषाहे गम्भीर मानसिक तनावमे पुगाइल । यि अवस्थापाछे मनिषा ओरेकके सम्पर्कमे अइली आवश्यक मनोपरामर्श ओ कानुनी सहयोगपाछे उहाँ साइबर अपराध सम्बन्धी उजुरी दर्ता करली । उजुरी दर्ता हुइल दिन प्रहरी कार्यालयसे राकेशहे पक्राउ करके पुरान मुद्दा ओ साइबर अपराधमे फेरसे जेल चलान करले बा ।

घटना–३
कैलाली जिल्लाके २१ वर्षीया रमिला (परिवर्तित नाम) के कञ्चनपुर जिल्लाके सविन (परिवर्तित नाम) सँग करिब तीन वर्ष आघे सामाजिक सञ्जालमार्फत चिनजान हुइल रहे । सामान्य बाटचिटसे सुरु हुइल सम्बन्ध बिस्तारे प्रेम सम्बन्धमे परिणत हुइल । ओइने भोज कैना सोचमे समेत पुगल रहिट । यी क्रममे रमिलासे सविनहे अपन परिवारसँग परिचय करैली कलेसे सविनसे फे अपने अविवाहित रहल बटैटी अपन दिदी ओ भाउजी कहटी कुछ व्यक्तिसँग फोनमे बाट करैलै, जेकर कारण रमिला ओ उहाँक परिवारसे उहाँहे विश्वास करे लग्लै ।

सम्बन्धके क्रममे ओइनके बीच भेटघाट हुके ओ सँगे बैठेबेर खिचल फोटु ओ भिडियो सविनसे सुरक्षित राखल रहिट । जेकर बारे रमिलाहे कुछ थाहा नैरहे । कुछ समय पाछे रमिला ओ उहाँक परिवारसे भोजके बाट आघे बह्राईबेर सविन अपने पहिल्यै भोज हुइल बटैटी विवाह दर्ताके कागजात पठैलै । साथे, रमिलाके भोज औरे ओर हुइए नैडेना धम्की डेटी, उहाँक संग बैठल फोटु ओ भिडियो सामाजिक सञ्जालमे सार्वजनिक कैना धम्किी डेहे लग्लै । जौन घटनासे मानसिक रुपमे विच्छिप्त हुइल रमिला अधिकारकर्मीके सहयोगमे ओरेकमे पुगके परामर्श लेली । परामर्शपाछे उहाँ सविन विरुद्ध साइबर अपराध सम्बन्धी मुद्दामे प्रहरीमे जाहेरी दर्ता करले बटी ।

अक्टोबरसे डिसेम्बर २०२५ समके अवधिमे कैलाली जिल्लामे केल्ह विद्युतीय हिंसाके घटना कुल लैङ्गिक हिंसाके १४.८ प्रतिशत हुइना महिला ओ बालिकाउप्परके हिंसाके अवस्था गम्भीर रहल प्रदेश संयोजक थापा बटैली ।