कैलारीमे ३६८ किशोरीहुकनमे एचपिभि खोप लगैटी
पहुरा समाचारदाता
धनगढी, २८ माघ । कैलाली जिल्लाके कैलारी गाउँपालिकामे ३६८ जाने किशोरीहुकनमे पाठेघरके मुहके क्यान्सर विरुद्धके एचपिभि खोप लगाजैटी रहल बा ।
पालिका भिटरके सक्कु विद्यालयमे कक्षा ६ मे नियमित अध्ययनरत रहल ३४३ जाने ओ २५ जाने पोहोर सालके छुट कैके ३६८ जाने किशोरीहुकनमे खोप लगाइल लागल कैलारी गाउँपालिका स्वास्थ्य शाखाके संयोजक नरेशकुमार चौधरी जनैलै ।
कैलारी गाउँपालिकामे यिहे माघ २७ गतेसे किशोरीहुकनहे पाठेघरके मुहके क्यान्सर विरुद्धके एचपिभि खोप लगैना सुरु हुइल बा ।
मंगरसे शुरु हुइलक पहिल दिन २३४ जनहनमे खोप लगागिल बा । बुधके रोज वडा नम्बर १ मनाउँ आधारभूत स्वास्थ्य केन्द्रमे लगागिल खोप कार्यक्रमके गाउँपालिका उपाध्यक्ष भगवतीकुमारी चौधरी, कैलारी गाउँपालिका नरेशकुमार चौधरीलगायतसे अनुगमन करल रहिट ।
गाउँपालिका उपाध्यक्ष भगवतीकुमारी चौधरी महिलाहुक्रे आपन स्वास्थ्य लाग अपनही ध्यान डेहे पर्ना बटैली । महिलाके सबसे महत्वपूर्ण अंग पाठेघर रहल कहटी समय समय चेक जाँच करैना आवश्यक रहल बटैली ।
वडा नम्बर १ मे बुधसम ५७ जाने खोप लगाइल मनाउँ आधारभूत स्वास्थ्य केन्द्रके सिअहेव महेन्द्र कठरिया जनैलै । वडा नम्बर १ के कुल ७० जाने खोप लगैना बा । कैलारीमे गैल बरस ९१ प्रतिशत किशोरीहुकनमे खोप लगाइल स्वास्थ्य संयोजक नरेश कहलै ।
एचपिभी खोप मुख्यतया कक्षा ६ से १० सम अध्ययनरत किशोरीहुकनहे लगैना हो । उहाँ कहलै, कैलारी गाउँपालिकाके सक्कु विद्यालयमे अध्ययनरत रहल किशोरीहुकनहे पाठेघरके क्यान्सरके जोखिम न्यूनीकरण कैना लक्षित विद्यालय केन्द्रित करके लगाजाइटा ।
गत बरस १९ सय ५ जनहनहे उ खोप लगैना लक्ष्य लेहलमे १७ सय ४१ जाने ९१ प्रतिशतहे खोप लगाइल उहाँ बटैलै । पोहोर सालसे सुरु करल खोप एक जानेकमे एक चो लगैले हुइना हो । गैल बरस ६ से १० कक्षामे पह्रना ओ विद्यालय बाहेर रहल किशोरीमे लगाइल हो । कलेसे यी बरस कक्षा ६ मे भर्ना किशोरीनहे केल्ह लगाइटा ।
