कैलारीमे ९६.७३ प्रतिशत एचपिभि खोप लगैलै
पहुरा समाचारदाता
धनगढी, २९ माघ । कैलाली जिल्लाके कैलारी गाउँपालिकामे ३५६ जाने ९६.७३ प्रतिशत किशोरी पाठेघरके मुहके क्यान्सर विरुद्धके एचपिभि खोप लगैले बटै । कैलारी गाउँपालिकामे यिहे माघ २७ गतेसे किशोरीहुकनहे पाठेघरके मुहके क्यान्सर विरुद्धके एचपिभि खोप लगैना सुरु हुइल रहे ।
पालिका भिटरके सक्कु विद्यालयमे कक्षा ६ मे नियमित अध्ययनरत रहल ३४३ जाने ओ २५ जाने पोहोर सालके छुट कैके ३६८ जाने किशोरीनमे खोप लगैना लक्ष्य लेहल रहे ।
माघ २७ गतेसे सुरु हुइल पाठेघरके मुहके क्यान्सर विरुद्धके एचपिभि खोपमे तोटल ३५६ जाने ९६.७३ प्रतिशत किशोरी खोप लगाइल कैलारी गाउँपालिका स्वास्थ्य शाखाके संयोजक नरेशकुमार चौधरी जनैलै ।
कैलारीके वडा नम्बर १ मनाउँस्थित मनाउँ आधारभूत स्वास्थ्य केन्द्रमे ६५, बसौटी स्वास्थ्य चौकीमे ३६, के गाउँ आधारभूत स्वास्थ्य केन्द्र ३९, पवेरा स्वास्थ्य चौकी ८१, बनकट्टा आधारभूत स्वास्थ्य केन्द्रमे ४८ खोप लगाइल रहिट ।
ओस्टेक करके रतनपुर स्वास्थ्य चौकीमे २१, उदासीपुर प्राथमिक स्वास्थ्य केन्द्रमे २९, गदरिया स्वास्थ्य चौकीमे ३७ करके तोटल ३५६ जाने खोप लगाइल स्वास्थ्य संयोजक नरेशकुमार चौधरी जनैलै ।
कैलारीमे गैल बरस ९१ प्रतिशत किशोरीहुकनमे खोप लगाइल स्वास्थ्य संयोजक नरेश कहलै ।
एचपिभी खोप मुख्यतया कक्षा ६ से १० सम अध्ययनरत किशोरीहुकनहे लगैना हो । उहाँ कहलै, कैलारी गाउँपालिकाके सक्कु विद्यालयमे अध्ययनरत रहल किशोरीहुकनहे पाठेघरके क्यान्सरके जोखिम न्यूनीकरण कैना लक्षित विद्यालय केन्द्रित करके लगाजाइटा ।
गैल बरस ६ से १० कक्षामे पह्रना ओ विद्यालय बाहेर रहल किशोरीमे लगाइल हो । कलेसे यी बरस कक्षा ६ मे भर्ना किशोरीनहे केल्ह लगागिल बा । गत बरस १९ सय ५ जनहनहे उ खोप लगैना लक्ष्य लेहलमे १७ सय ४१ जाने ९१ प्रतिशतहे खोप लगाइल उहाँ बटैलै । पोहोर सालसे सुरु करल खोप एक जानेकमे एक चो लगैले हुइना हो ।
गैल बरससे यी बरस कम किशोरी एचपिभी खोपसे बञ्चित हुइलै । असौ छुटल किशोरीहुकनहे अइना बरस समेटना उहाँ जनैलै ।
यी वर्ष जिल्ला भर दश हजार तीन सय ८५ किशोरीहे खोप लगैनालक्ष्य रहल कैलाली जनैले बा । कैलाली जिल्लामे माघ २७ गतेसे फागुन १ गतेसम सञ्चालन हुइना बा ।
जेम्ने विद्यालय बाहेर रहल एक सय ७६ जाने बालबालिकाहे समेत खोजी करके खोपमे समावेश कैना बा । ओस्टेक करके, गैल वर्ष कौनो कारणसे खोप छुट हुइल ११–१४ वर्ष उमेर समूहके ९९ जाने किशोरीहुकनहेफे यीबार समेटन योजना बनाइल बा ।
जिल्ला भर खोप कार्यक्रम प्रभावकारी रूपमे सञ्चालन कैना ३८५ सामुदायिक ओ २८१ संस्थागत विद्यालय छनोट करल बा । यी विद्यालय मार्फत ४२९ ठो खोप केन्द्र स्थापना कैना बा । अभियानहे सफल बनैना ३८८ जाने स्वास्थ्यकर्मी ओ ३८८ जाने स्वयंसेवक खटैना स्वास्थ्य कार्यालय जनैले बा ।
स्वास्थ्य कार्यालयके अनुसार आर्थिक वर्ष २०८१/८२ मे जिल्लामे ४७ हजार ६ सय ५५ जाने टमान खोप सेवा लेहल रहिट । यी वर्ष उ संख्याहे आउर बढाके शत प्रतिशत लक्ष्य हासिल कैना उद्देश्य रहल बा ।
