कैलाली–५ मे कांग्रेसके संगठित अभियान : उम्मेदवार मनुहे जिटैना घरदैलोसे मतदाता शिक्षासम
पहुरा समाचारदाता
धनगढी, २ फागुन । नेपाली काँग्रेसके सुदूरपश्चिम महामन्त्री तथा कैलाली क्षेत्र नम्बर ५ के प्रतिनिधि सभा सदस्य उम्मेदवार नरनारायण शाह (मनु) चुनावी अभियानअे आउर व्यवस्थित, परिणाममुखी ओ जनकेन्द्रित बनैना नेता–कार्यकर्ताहे स्पष्ट निर्देशन डेले बटै । उहाँ घरदैलो अभियानहे व्यवस्थित ढंगसे सञ्चालन करटी दैनिक उपस्थिति रजिस्टर रख्न ओ टोलस्तरमे मतदाताहे एकताबद्ध कैना सक्रिय हुइना आग्रह करलै ।
कैलाली–५ के टमान टोल तथा वडामे आयोजित छलफल तथा अन्तरक्रिया कार्यक्रममे बोल्टी उम्मेदवार शाह कहलै, “मनै क्रियाशिल हुइल नैहुइलबारे जानकारी रख्न घरदैलो अभियानके दैनिक उपस्थिति रजिस्टरमे राख्बी । यिहीसे हमार संगठन कटरा चलायमान बा कना स्पष्ट विल्गाइठ ।” उहाँ संगठनके शक्ति जितके आधार हुइना कहटी अनुशासित ओ अभिलेखीकरणसहितके अभियान सञ्चालन कैना जोड डेलै ।
उम्मेदवार शाह टोलस्तरमे तय करल कार्यक्रमहे प्रभावकारी बनैना स्थानीय पार्टी कमिटीहे जिम्मेवार बन्न आग्रह करलै । “टोलस्तरमे तोकल दिनके कार्यक्रममे सहभागी सक्कु मतदाताहे एकतावद्ध कैना उहेक पार्टीके संघरीया सक्रिय रूपमे लागे परी,” उहाँ कहलै, “स्थानके पहिचान करके सचिवालयहे ओ उम्मेदवारहे जानकारी डेबी, ताकि समन्वय प्रभावकारी होए ।”
उहाँ अब्बेक चुनावी परिवेशमे मतदाताहुक्रे भाषणसे उम्मेदवारहे प्रत्यक्ष चिन्न ओ बुझ्न चहटी रहल उल्लेख करलै । “अब्बे भाषणसे उम्मेदवार के हो कहिके चिन्हे चाहठै,” उहाँ स्पष्ट परलै, “टबमारे मतदातासँग प्रत्यक्ष भेटघाट ओ संवादहे प्राथमिकता डेबी ।”
शाहसे मतदाता शिक्षाहे चुनावी अभियानके महत्वपूर्ण पक्षके रूपमेआघे सरलै । उहाँ वडा कार्यसमितिहे सक्रिय भूमिका निर्वाह कैना आह्वान करटी कहलै, “मतदाता शिक्षामे वडा कार्य समिति सक्रिय हुके लागी । मतदाताहे सही ढंगले मतदान कैना तरिका, हमार एजेन्डा ओ उम्मेदवारके प्रतिबद्धता स्पष्ट रूपमे बुझाई परठ ।”
उहाँ मतदाता शिक्षाहे केवल औपचारिक कार्यक्रम नैहुके विश्वास निर्माण कैना माध्यमके रूपमे लेहे पर्ना बटैलै । उहाँक अनुसार, मतदाता सचेत हुइलेसे केल्ह परिणामफे सुदृढ हुई ।
‘उम्मेदवार घरमे नैआइना’ कहना गुनासो नाआए
उम्मेदवार शाह अपनहे हरेक टोल–बस्तीमे पुगैना जिम्मेवारीफे कार्यकर्ताउप्पर रहल बटैले बटै । “उम्मेदवार हमार घरमे नैआइल कहिके कोई गुनासो कैना मौका नडेबी,” उहाँ आग्रह करलै । अपन स्वास्थ्य अवस्था उल्लेख करटी उहाँ कहलै, “शारीरिक अवस्था कमजोर हुइल ओरसे ढेर दौडधुप करे नैसेक्जाई । जटरा अपनेहुक्रे महीहे दौरैबी, ओटरे मै डौरम । जहाँ, जटरा खेर बोलैबी, मै सहभागी हुइम ।”
उहाँक यी कहाईले कार्यकर्तामा थप उत्साह पैदा करल सहभागी बटैले बटै । उम्मेदवार स्वयं प्रतिबद्ध ओ उपलब्ध हुइना सन्देशसे स्थानीय तहमे सकारात्मक सन्देश गैल बा । शाहसे व्यक्तिगत जित–हारके चिन्तासे पार्टीके संगठित अभियानहे प्राथमिकता डेना आग्रह करलै । “मोर नतिजासँग चिन्ता लेनासेफे पार्टीके चुनावी प्रचारहे व्यवस्थित करी,” उहाँ कहलै ।
उहाँ चुनावी प्रचारहे योजनाबद्ध ढंगसे आघे बह्रैना, जिम्मेवारी बाँडफाँट स्पष्ट कैना ओ नियमित समिक्षा कैना सुझाव डेलै । “हम्रे अपन काम ठीक ढंगसे करली कलेसे नतिजा अपनही अनुकूल आई,” उहाँ विश्वास व्यक्त करलै ।
कार्यक्रममे बोल्टी शाह कैलाली–५ के समग्र विकास, सुशासन ओ रोजगारी सिर्जनाहे प्राथमिकतामे रख्न प्रतिबद्धता जनैलै । उहाँ शिक्षा, स्वास्थ्य, कृषि ओ पूर्वाधार क्षेत्रमे दीर्घकालीन योजना ल्यन्ना प्रतिवद्धता दोहर्यइलै ।
“हम्रे केवल चुनाव जित्न नाही, क्षेत्रके विकासके लाग उम्मेदवारी डेहल हुई,” उहाँ कहलै, “जनताके विश्वासहे विकास ओ समृद्धिमे परिणत कैना हमार लक्ष्य हो ।”
कार्यक्रममे सहभागी नेता–कार्यकर्ताहुक्रे उम्मेदवार शाहके निर्देशनहे सकारात्मक रूपमे लेटी घरदैलो अभियानहे थप तीव्र बनैटी प्रतिबद्धता जनैले बटै । टोलस्तरमे नियमित बैठक, मतदाता सूची अद्यावधिक, युवा तथा महिला परिचालनजैसिन कार्यक्रमहे तीव्रता डेना निर्णय करल बा ।
कैलाली क्षेत्र नम्बर ५ मे कांग्रेससे संगठित ओ योजनाबद्ध अभियान चलैटी रहल दाबी करटी स्थानीय नेताहुक्रे यी बारके निर्वाचनमे जित सुनिश्चित हुइना विश्वास व्यक्त करले बटै । उम्मेदवार मनुके स्पष्ट निर्देशन, कार्यकर्ताके सक्रियता ओ मतदातासँगके प्रत्यक्ष संवादसे चुनावी माहोल तातल बा ।
