धनगढीमे जारी सीप तथा रोजगार मेलामे बनागिल विद्युतिय गाडी
पहुरा समाचारदाता
धनगढी, ३ फागुन । कैलालीके धनगढीमे सञ्चालन हुइटी रहल सीप तथा रोजगार मेलामे विद्युतिय गाडी (इभी) बनाइल बा । धनगढी उपमहानगरपालिकासे आयोजना करल प्रदेशस्तरीय सीप तथा रोजगार मेलामे सहभागी प्रशिक्षार्र्थीसे विद्युतिय गाडी बनाइल हुइट ।
माघ ५ गतेसे सुरु हुइल मेलामे मेकानिकल तालिम सिक्न सुदूरपश्चिमके टमान जिल्लासे आइल प्रशिक्षार्थी विद्युतिय गाडी बनाइल धनगढी उपमहानगरपालिकासे जनैले बा ।
छोट समयमे प्रशिक्षार्र्थी गाडी तयार करलपाछे धनगढी उपमहानगरपालिकाके नगरप्रमुख गोपाल हमाल इभी गाडीके मजा सम्भावना रहल बटैलै । ‘विद्युतके मजा सम्भावना हुइल नेपालमे इभी सवारीके मजा बजार बन्टी गैल बा,’ नगरप्रमुख हमाल कहलै, ‘सीप तथा रोजगार मेलामे सहभागी प्रशिक्षार्थीसे छोट समयमे अपनहनहे प्रमाणित करके डेखाईबेर बहुट खुसी लागल बा । उहाँहुक्रे अपने ठाँउमे स्वरोजगार बन्न अपेक्षा बा ।’
नेपालमे इभी गाडीके प्रयोगसे पेट्रोलियम पदार्थसे हुइना व्यापार घाटा घटैना मदत पुग्न ओ युवासे स्वदेशमे रोजगारी पैना अपेक्षा बा । इभी सवारीके मजा बजार सम्भावना रहल ओरसे सीप तथा रोजगार मेलामे इभी गाडी मर्मत तथा निर्माणके तालिम प्रदान करल नगरप्रमुख हमाल बटैलै ।
नगरप्रमुख हमाल मेलाहे अइना दिनमे थप व्यवस्थित ओ एड्भान्स बनैना प्रतिबद्धता जनैलै ।
आगामी वर्ष सहभागी प्रशिक्षार्र्थीके मागअनुसार ग्रेड वृद्धि तालिमफे सञ्चालन करे सेक्ना उहाँ बटैलै । ‘प्रचारके लाग केल्ह धनगढी तालिम डेहल नैहो,’ नगरप्रमुख हमाल कहलै, ‘जाटिक युवाहे स्वदेशमे रोजगार बनैना, स्वरोजगार बनैना उद्देश्यसे हम्रे सीप तथा रोजगार मेला सञ्चालन करल बटी, यकर परिणामफे डेख्ना बा ।
अइना वर्षसे नयाँके लाग अलग ओ एक चो सहभागी हुइल प्रशिक्षार्र्थीके लाग ग्रेड वृद्धि तालिम सञ्चालन कैना विषयमे छलफल कैबी ।’
