रास्वपाके उम्मेदवार चन्दसे वाचापत्र सार्वजनिक

पहुरा समाचारदाता
धनगढी, ५ फागुन । कैलाली क्षेत्र नम्बर ५ के लाग राष्ट्रिय स्वतन्त्र पार्टीसे उम्मदेवार रहल डा. आनन्द बहादुर चन्द आपन चुनावी वाचा पत्र सार्वजनिक करले बटै ।

उहाँ धनगढीमे पत्रकार सम्मेलन मार्फत आपन चुनावी वाचा पत्र सार्वजनिक करल हुइट । उम्मेदवार चन्द सरकारसे प्रस्तुत करजैना नीति, कार्यक्रम ओ वार्षिक बजेटउपर गहिरके अध्ययन, तथ्यमे आधारित छलफल ओ संसदीय निगरानी कैटी जनताके आवश्यकता ओ प्राथमिकताअनुसार राज्यके स्रोत ओ साधन न्यायोचित रुपमे परिचालन सुनिश्चित कैना संघीय संसदमे आपन भूमिका रहना बटैले बटै ।

ओस्टके उहाँ कैलाली–५ के जनताके समस्या, अपेक्षा ओ सुझावहे संसदसम पुगाके उहीहे राष्ट्रिय नीति ओ बजेटसँग जोर्ना काम मोर प्रमुख जिम्मेवारी रहना बटैले बटै । उहाँ कैलाली–५ के समग्र विकासके लाग शिक्षा, स्वास्थ्य, सुरक्षित खानेपानी, सडक तथा भौतिक पूर्वाधार, युवा रोजगारी, खेलकुद, सीप विकास, विदेशसे आइलहुक्रनहे उद्यमशिलता ओ रोजगारी, कृषि आधुनिकीकरण ओ स्थानीय उद्यम प्रवद्र्धनहे केन्द्रमे राखके संघ, प्रदेश ओ स्थानीय तहबीच प्रभावकारी समन्वय ओ सहकार्यके साथ काम कैना आपन स्पष्ट कार्यदिशा रहना बटैले बटै ।

ओस्टके स्वास्थ्य ओर सेती प्रादेशिक अस्पताल–दशरथ चन्द स्वास्थ्य विज्ञान विश्वविद्यालय, सेती प्रादेशिक अस्पताल ओ दशरथ चन्द स्वास्थ्य विज्ञान विश्वविद्यालयहे एकीकृत स्वास्थ्य–शिक्षा इकोसिस्टमके रूपमे विकास कैना, अस्पताल सेवा ओ क्लिनिकल अभ्यासके केन्द्र तथा विश्वविद्यालय अध्ययन, अनुसन्धान ओ जनशक्ति उत्पादनके केन्द्र बनाजैना आपन चुनावी वाचामे उल्लेख करले बटै ।

स्थानीय स्तरमे विशेषज्ञ चिकित्सक उत्पादन कैके गुणस्तरीय सेवा विस्तार कैना, अनुसन्धानमे आधारित उपचार प्रणाली विकास कैटी मुटु, मिर्गौला, क्यान्सर, जलन, सिकलसेल लगायतके विशिष्टीकृत उपचार सेवा सुरु कैना, कैलाली–५ हे चिकित्सा शिक्षा ओ उपचार सेवाके केन्द्र बनैना आपन चुनावी वाचामे उल्लेख करले बटै ।

उहाँ थारु समुदायमे डेखजैना सिकलसेल ओ नैसर्र्ना रोगके लाग स्थानीय स्वास्थ्य संस्थामे नियमित सिकलसेल ओ थालेसेमिया स्क्रिनिङ अभियान सञ्चालन कैना, सिकलसेलके लाग उपलब्ध एक लाख रुपैयाँके कभरेज बह्राके जटिल ओ दीर्घकालीन उपचारमे पर्याप्त आर्थिक पहुँच सुनिश्चित कैना, समुदायमे सिकलसेल ओ थालेसेमिया सम्बन्धी जागरुकता अभियान सञ्चालन कैना, रक्तचाप, मधुमेह, क्यान्सर, क्षयरोग लगायतके स्क्रिनिङ प्राथमिक तहसे सुरु कैना प्रतिवद्धतामे उल्लेख करले बटै ।

ओस्टके शिक्षाओर शिक्षक दरबन्दी पुनःव्यवस्थित कैके दुर्गम विद्यालयमे विषयगत शिक्षक सुनिश्चिता, डिजिटल कक्षा, ई–लाइब्रेरी ओ स्मार्ट सिकाइ सामग्रीमार्फत शिक्षण पद्धति आधुनिक बनाजैना, विद्यालयमे नियमित सिकाइ मूल्याङ्कन, शिक्षक तालिम ओ शैक्षिक अनुगमन प्रणाली सुदृढ करजैना, विद्यालय छोरल किशोर–किशोरीके लाग सीपमूलक तालिम कार्यक्रम, प्राविधिक तथा व्यावसायिक शिक्षा केन्द्र स्थापना, वैदेशिक रोजगारी जाइ चहुइया युवाहे प्राविधिक सीप सिखाके साथे प्रि–डिपार्चर तालिम, भाषा ओ सुरक्षा शिक्षा उपलब्ध करैना रहल बा ।

ओेस्टके फाप्ला रंगशालाहे सुदूरपश्चिमके गौरवके आयोजनाके रूपमे विकास कैटी अन्तर्राष्ट्रिय मापदण्डअनुसार बहुउद्देश्यीय खेल स्टेडियम निर्माण, धनगढीहे सुदूरपश्चिम प्रदेशके आधिकारिक पर्यटन प्रवेशद्वारके रूपमे विकास कैटी पर्यटक सूचना केन्द्र स्थापना, धनगढीके प्रमुख धार्मिक स्थल (बेहडाबाबा, शिवपुरीधाम) लगायतहे एकीकृत धार्मिक पर्यटन मार्गके रूपमे विकास, जाखोर टल्वाहे धनगढीके प्रमुख प्राकृतिक आकर्षणके रूपमे विकास, सडक पहुँच, संकेत बोर्ड, विश्रामस्थल, सरसफाइ, शौचालय ओ सुरक्षित खानेपानी व्यवस्थापन, थारु संस्कृति, परम्परा ओ जीवनशैलीके संरक्षण ओ प्रवद्र्धन कैटी थारु होमस्टे कार्यक्रम विस्तार करजाइ, जिहीसे स्थानीय रोजगारी ओ आयआर्जन सिर्जना, परम्परागत थारु गाउँके महत्व कायम राखक लाग थारु घरके संरक्षण तथा सम्बद्र्धन कैना विशेष नीति लेनाके साथे अनुदानके व्यवस्था, थारु समुदायके परम्परागत कला, भेषभूषा, आदिके संरक्षण तथा प्रबद्र्धनके लाग थारु सांस्कृतिक संग्राहलय सञ्चालन, होमस्टे सञ्चालन कैना इच्छुक परिवारहे तालिम, प्राविधिक सहयोग, सरसफाइ मापदण्ड ओ प्रारम्भिक अनुदान प्रदान, थारु नृत्य, खानपान, भेषभूषा, माघ टिह्वार तथा सामुदायिक जीवनशैलीहे पर्यटन प्याकेजसँग जोडके ब्रान्डिङ कैना वाचापत्रमे उल्लेख रहल बा ।

धनगढी विमानस्थलहे सुदृढीकरण कैके मध्यम–बरवार विमान ओ अन्तर्राष्ट्रिय उडान सञ्चालन योग्य बनैना, रोजगारीके लाग स्थानीय उद्योग तथा उद्यम प्रवद्र्धनके लाग कृषि, वन, पर्यटन ओ सेवा क्षेत्रमे आधारित साना तथा मझौला उद्योग स्थापनाहे प्राथमिकता, स्थानीय कच्चा पदार्थमे आधारित उद्योगके लाग सहुलियत ऋण ओ कर छुटके व्यवस्था, औद्योगिक ग्राम तथा व्यवसाय इन्क्युबेसन केन्द्र स्थापना कैके नयाँ उद्यमीहे बजारसँग समन्वय, तालिम ओ परामर्श उपलब्ध करैना, महिला तथा युवा लक्षित उद्यमशीलता कार्यक्रम सञ्चालन कैना रहल बा ।

ओस्टके त्रिनगर (गौरीफन्टा) अन्तर्राष्ट्रिय नाका स्तरोन्नति, प्राकृतिक सन्तुलन कायम रख्टी गौरीफन्टा नाकाहे अन्तर्राष्ट्रिय नाकाके रूपमे विकास करक लाग पहल, आधुनिक भन्सार भवन, यात्रु सहायता केन्द्र, पार्किङ क्षेत्र, ट्रक टर्मिनल ओ गोदाम निर्माण कैना, नेपालीउपर सीमानाकामे हुइना लुटपाट ओ दुव्र्यहार रोकक् लाग छिमेकी देशसँग समन्वय कैके विशेष सुरक्षा प्रणाली लागु कैना वाचा पत्रमे उल्लेख रहल बा ।

कृषिओर उहाँ कृषकहे आधुनिक कृर्षि प्रणाली प्रणालीके तालिम, ज्ञान ओ सीपसँग जोडके कृषिमे लागत न्युनिकरण कैके नाफामूलक बनाजैना, बरसभर खेती सम्भव बनाइक लाग सिँचाइ विस्तार, नहर मर्मत तथा भूमिगत पानी (ट्युबवेल/डिप बोरिङ) प्रणाली विस्तार करजैना, समयमे मल तथा बिउबिजन पैना अवस्थाके सृजना करजैना, किसानहे आधुनिक प्रविधि, यान्त्रीकरण तथा उन्नत बीउ–बिजन उपलब्ध कराजैना, कृषि उत्पादनहे समर्थन मूल्य तोकके कोल्ड स्टोर, वेयरहाउस, ग्रेडिङ तथा प्याकेजिङ केन्द्र स्थापना कैना रहल बा ।

ओस्टके टिनाटावन, आलु ओ बागवानी उत्पादनसँग सम्बन्धित प्रशोधन उद्योग (एग्रो–प्रोसेसिङ) स्थापना कैके स्थानीय स्तरमे रोजगारी सिर्जना, कृषि प्राविधिक, पशु चिकित्सक ओ विस्तार सेवाके पहुँच प्रत्येक वडासम पुगाके तालिम, परामर्श ओ रोग नियन्त्रण सेवा प्रभावकारी बनैना रहल बा ।

कैलाली–५ हे “कृषि–व्यापार केन्द्र” के रूपमे विकास कैटी धनगढीके बजार, सीमा नाका ओ सडक सञ्जालहे कृषि निर्यातसँग व्यवस्थित रूपमे जोडजैना, सुदूरपश्चिमके क्षेत्रीय सांस्कृतिक केन्द्रके रूपमे विकास कैटी नियमित सांस्कृतिक महोत्सव, लोकनृत्य, नाटक ओ संगीत कार्यक्रम सञ्चालन कैना, छलिया, भुओचाली, लोक नृत्य, देउडा गीत, थारू नृत्य तथा लोकवाद्य प्रशिक्षणके लाग सांस्कृतिक प्रशिक्षण केन्द्र स्थापना, मुक्त कमैया, दलित ओ अल्पसंख्यक समूहके लाग स्वरोजगार, आधुनिक कृषि प्रणालीके तालिम ओ व्यवसायमे प्रोत्साहन कार्यक्रम सञ्चालन कैना वाचापत्रमे उल्लेख करल बा ।