हमार क्षेत्र हम्रे अपनही बनाई परीः नर नारायण शाह मनु
पहुरा समाचारदाता
धनगढी, ६ फागुन । प्रतिनिधिसभा निर्वाचन क्षेत्र नम्बर ५ के उम्मेदवार नर नारायण शाह ‘मनु’ यी बेला चुनावी गतिविधिहे तीव्रता डेटी घरदैलो कार्यक्रममे व्यस्त रहल बटै । गाउँ–टोल, बस्ती तथा बजार क्षेत्रमे पुगके मतदातासँग प्रत्यक्ष भेटघाट करटी उहाँ क्षेत्रके समग्र विकासके लाग सक्कुहुनके साथ ओ सहकार्य अपरिहार्य रहल बटैले बटै ।
घरदैलो अभियानके क्रममे उहाँ “हमार क्षेत्र हम्रे अपनही बनाई परी” कना मूल सन्देश डेटी विकास निर्माण, रोजगारी, शिक्षा, स्वास्थ्य, कृषि तथा पूर्वाधार विकासहे प्राथमिकतामे धारके आघे बह्रना प्रतिवद्धता व्यक्त करलै । उहाँ यी क्षेत्रके हरेक समस्या, सम्भावना ओ आवश्यकताबारे अपने जानकार रहल उल्लेख करटी योजनाबद्ध ढंगसे काम कैना बटैलै ।
यिहे क्रममे उहाँ अपन ठाउँके विकास बाहेरसे आइल व्यक्तिसे प्रभावकारी रूपमे करे नैसेक्ना धारणा रख्टी कहलै, “यी ठाउँके भूगोल, यहाँके समस्या, यहाँके आवश्यकता बुझल मनै केल्ह वास्तविक विकास करे सेक्ही ।” उहाँ आघे ठप्लै, “बाहेरसे आइल मनै यहाँके समवेदना ओ आवश्यकताहे ओटरा गहिर करके बुझे नैसेक्ही । टबमारे सक्षम, योग्य ओ अपन ठाउँ बुझल उम्मेदवार छानके मत डेना सक्कु मतदाताहे आग्रह करटु ।”
छलफलमे कैलाली क्षेत्र नम्बर ५ के मतदाताहुक्रे सडक स्तरोन्नति, सिँचाई व्यवस्था, रोजगारी सिर्जना, गुणस्तरीय शिक्षा, स्वास्थ्य सेवा विस्तार लगायतके विषयहे मुख्य मागके रूपमे आघे सरले बटै । ओइने यी क्षेत्रके आवश्यकता ओ जनभावनाहे बुझके कार्यक्रम ल्यन्ना मनुहे सुझाव डेले बटै ।
मनु मतदातासे आइल सुझाव ओ मागहे अपन कार्ययोजनामे समेट्न बटैटी जनताके विश्वास ओ साथ पैलेसे समग्र क्षेत्रके मुहार फेर्ना करके काम कैना प्रतिबद्धता जनैलै । उहाँ सक्कु दल, समुदाय ओ वर्गहे समेटके सहकार्यके साथ कैलाली क्षेत्र नम्बर ५ हे नमुना क्षेत्रके रूपमे विकास कैना लक्ष्य रहलफे स्पष्ट परलै ।
घरदैलो कार्यक्रममे स्थानीयके उल्लेख्य सहभागिता डेखल बा । कलेसे विकास ओ समृद्धिके साझा अभियानमे सक्कु जाने मिलके आघे बह्रे पर्ना सन्देश व्यापक रूपमे उठटी रहल बा ।
