मोर जित सुनिश्चित बा : नेता आले
पहुरा समाचारदाता
धनगढी, ६ फागुन । आसन्न प्रतिनिधिसभा सदस्य निर्वाचनके लाग नेपाली कम्युनिस्ट पार्टीके ओरसे कैलाली क्षेत्र नं. ५ के उम्मेदवार एवं पूर्वमन्त्री प्रेमबहादुर आले आपन जित सुनिश्चित रहल दाबी करले बटै ।
धनगढी उपमहानगरपालिका–१८ मे आयोजित युवा मतदाता शिक्षा अभिमुखीकरण कार्यक्रममे बोल्टी उहाँ ओइसीन दाबी करल हुइट । कार्यक्रममे बोल्टी उहाँ घरदैलो अभियानके क्रममे जनतासे अपार माया ओ समर्थन प्राप्त हुइटी रहल बटैले बटै ।
‘अब्बेक विषम राजनीतिक तथा आर्थिक परिस्थितिमे नेकपाहे जिटैना आवश्यक बा,’ उहाँ कहलै, “जनताके विश्वास ओ समर्थनसे मोर जित सुनिश्चित बा ।’
अपने विगतमे विकासके टमान काम करल उल्लेख कैटी जनतासँगके सुमधुर सम्बन्धके कारण डोटीसे लगातार तीनचो निर्वाचन जिटल बटैलै ।
कैलाली क्षेत्र नं. ५ के मतदातासे फेन अपने साथ ओ समर्थन पैनामे विश्वस्त रहल उहाँ बटैलै । आले निर्वाचित हुइलपाछे कैलाली क्षेत्र नं ५ के समग्र विकास, शिक्षा, स्वास्थ्य तथा रोजगारी सिर्जनाहे प्राथमिकतामे राखके काम कैना स्पष्ट परलै ।
इहे बिच उहाँ धनगढी उपमहानगरपालिका–१८ फुलबारीस्थित फारलाइन टोलमे पुगके सहिद यादव घिमिरेके परिवारसँग भेटघाट करले बटै ।
तत्कालीन नेपाल कम्युनिस्ट पार्टी (माओवादी)से सञ्चालन करल दशवर्षे जनयुद्धके क्रममे सरकारी पक्षसे यादव घिमिरे सहिद हुइल रहिट । ओहकान परिवारमे डाइ, बाबा ओ भैया रहल बटै ।
घरदैलो अभियानके क्रममे सहिद परिवार भेटे पुगल आले सहिद परिवारके वर्तमान अवस्था, भोग्टी रहल समस्या तथा आवश्यकताबारे जानकारी लेहल रहिट । उहाँ सहिदके योगदानके सम्मान कैटी परिवारके जीवनयापन ओ सुरक्षाके सवालमे राज्य गम्भीर हुइ पर्ना बटाइल रहिट ।
भेटके क्रममे उहाँ सहिद परिवारके माग सम्बोधन कैना अपने प्रतिबद्ध रहल उल्लेख कैटी आगामी दिनमे ओइनके सम्मान ओ अधिकार सुनिश्चित करक लाग पहल कैना विश्वास व्यक्त करल रहिट ।
