प्रजातन्त्र दिवसमा सहिदके स्मारकमे माल्यार्पण
पहुरा समाचारदाता
धनगढी, ७ फागुन । प्रजातन्त्र दिवसके अवसरमे सुदूरपश्चिम प्रदेशके मुख्यमन्त्री कमलबहादुर शाह महान सहिदके स्मारकमे माल्यार्पण करले बटै ।
राष्ट्र, राष्ट्रियता, प्रजातन्त्र तथा नागरिक अधिकारके संरक्षणके लाग आपन अमूल्य जीवन उत्सर्ग करुइया चार महान सहिद शुक्रराज शास्त्री, धर्मभक्त माथेमा, दशरथ चन्द ओ गङ्गालाल श्रेष्ठप्रति उहाँ सहिदगेट पुगके श्रद्धापूर्वक माल्यार्पण करल हुइट ।
माल्यापर्ण कार्यक्रममे सभामुख, मन्त्री, सांसद, राष्ट्र सेवक कर्मचारी, नेपाल प्रहरी, सशस्त्र प्रहरी, नेपाल आर्मी लगायतके उपस्थिति रहल रहे । इहे बिच, मुख्यमन्त्री शाह दिवसके अवसरमे शुभकामना सन्देश जारी कैटी देश तथा विदेशमे रहल सक्कु नेपाली डिडीबहिनीया तथा डाडाभैयाहे शुभकामना व्यक्त करले बटै ।
शुभकामना सन्देशमे लोकतन्त्रमे जनता मालिक रहल उल्लेख बा । ओस्टके, लोकतन्त्रके विकल्प उन्नत लोकतन्त्र नै रहल उल्लेख करल बा । जेन्जी युवाहुक्रनसे उठाइल सुशासन कायम ओ भ्रष्टाचार अन्त्यके मागसहित भदौ २३ ओ २४ गते हुइल जेन्जी आन्दोलनके जगमे फागुन २१ गते प्रतिनिधि सभाके निर्वाचन हुइ जैटी रहल उल्लेख करल बा ।
सन्देशमे कहल बा, संविधानके रक्षा, लोकतन्त्रके सुदृढीकरण, राजनीतिक स्थायित्वके लाग निर्वाचन बाहेक औरे विकल्प नैरहल ओरसे निर्वाचनहे शान्तिपूर्ण, निष्पक्ष ओ भयरहित वातावरणमे सम्पन्न कैना÷करैना हमार सबके दायित्व हो ।
