‘सुदूरपश्चिम विकास मोडल’ बनैना घोषणा

पहुरा समाचारदाता
धनगढी, ७ फागुन । राष्ट्रिय स्वतन्त्र पार्टी (रास्वपा) कैलाली क्षेत्र नम्बर ४ के उम्मेदवार खेमराज कोइराला बुधके आपन चुनावी बाचा पत्र सार्वजनिक करले बटै । तीन भागमे विभाजित ओहकान बाचा पत्रके सुरुके भागमे मूल दर्शन, मध्य भागमे संघीय संसदमे हुइना भूमिका ओ अन्तिम भागमे स्थानीय तहके प्राथमिक मुद्दाके लम्मा फेहरिस्त राखल बा ।

विशेष चुनावी बाचा–पत्रके मूल दर्शनमे सफा राजनीति, सक्षम नेतृत्व ओ पारदर्शी शासन, व्यक्तिके नैहोके, नीतिके राजनीति, जनताके आवाजहे नीतिके आधार बनैना जैसिन विषय समेटल बावै । ओस्टके संघीय संसदके भूमिकामे शिक्षा, स्वास्थ्य, कृषि, विज्ञान, उद्योग, पर्यटन, पूर्वाधार ओ सुशासन सम्बन्धी कानुन निर्माण÷संशोधन कैना, संघ–प्रदेश–स्थानीय तहबिच अधिकार, स्रोत ओ कार्यान्वयनके समन्वय कैना, क्षेत्रीय निर्वाचन क्षेत्रके प्राथमिक आवश्यकताहे राष्ट्रिय नीति ओ बजेटमे समेट्ना पहल कैना, सरकारके नीति, कार्यक्रम ओ खर्चके प्रभावकारी संसदीय निगरानी कैना, नीतिगत सुधार ओ रणनीति तयार कैना विषय राखल बावै ।

बाचा पत्रमे कैलाली निर्वाचन क्षेत्र भिट्टर पर्ना स्थानीय तहके प्राथमिक मुद्दा (गोदावरी, गौरीगंगा, चुरे ओ मोहन्याल वडा नम्बर ५)के कैना काम विस्तृत रूपमे उल्लेख करल बा ।

जेम्ने स्वास्थ्य अन्तरगत ‘शहीद दशरथ चन्द स्वास्थ्य विज्ञान विश्वविद्यालय’ हे पूर्ण रूपमे सञ्चालन करक लाग सशक्त दबाब डेना, हरेक वडामे आधारभूत स्वास्थ्य सेवा प्रदान कैना स्थानीय अस्पताल तथा स्वास्थ्य चौकी तथा पालिका अस्पतालहे २४ घण्टा आकस्मिक सेवा ओ आधारभूत औषधिके उपलब्धता सुनिश्चित करक लाग पहल कैना, आधुनिक तथा डिजिटल स्वास्थ्य प्रणाली ओ स्याटलाइट क्लिनिक नेटवर्कके सुरुवात कैना, स्वास्थ्य बिमा कार्यक्रमहे राष्ट्रिय स्तरसे सम्बोधन कैना विशेष पहल लगायतके कार्यक्रम समावेश करले बटै ।

ओस्टके खानेपानी ओ सरसफाइ अन्तरगत खानेपानीके दीर्घकालीन संरक्षणके लाग चुरे संरक्षण योजनामा विशेष जोड डेना, खानेपानीके दीर्घकालीन समस्या समाधान करक लाग एकीकृत बोरिङ ओ वितरण प्रणाली लागू करक लाग पहल कैना, एकीकृत फोहोर मैला व्यवस्थापन प्रणालीहे सक्कु पालिकामे प्रभावकारी बनैटी “फोहोरहे मोहोर“ मे बडल्ना प्रविधिके प्रयोग कैना उल्लेख बा ।

सडक तथा भौतिक पूर्वाधार अन्तरगत क्षेत्र नम्बर ४ के मूल सडक ओ ग्रामीण सडक तथा विविध पूर्वाधारके दीर्घकालीन क्षेत्रीय विकास योजना लागू कैना, स्मार्ट कनेक्टिभिटी सिटी ओ हरित नगर तथा ग्रामीण अवधारणा कार्यान्वयन करक लाग ग्रामीण भेगके मुख्य सडकहे कालोपत्रे कैके बाह्रै महिना यातायात चल्ना मेरके बनैना नीतिगत रूपमा समेट्ना, सिग्नल लेन/बोर्ड जेब्रा क्रसिंग, ट्राफिक व्यवस्थापन, सीसी टिभी मोनिटरिंग जैसिन कामके प्रभावकारी कार्यान्वयनके लाग पहल कैना, सुदूरपश्चिमके प्रदेश राजधानीके निर्माणके विषयमा रहल समस्या समाधानके लाग आवश्यक पहल कैके निर्माण प्रक्रिया आघे बह्रैना प्रयत्न कैना उल्लेख रहल बा ।

ओस्टके चुरे गाउँपालिका ओ मोहन्याल गाउँपालिकाके वडा नम्बर ५ मे कृषि उत्पादनमे सहयोग करक लाग सिँचाइके पूर्वाधार तैयार कैना, डिपिआर तैयार होके फेन काम सुरु नैहुइल ढिला सुस्तिके कारण अधुरा रहल योजनाके यथाशीघ्र कार्य सम्पन्न करक लाग बजेट सहित व्यवस्थापनके निम्ति उच्च पहल कैना, धनगढी, खुटिया, दिपायल फास्ट ट्र्याक, गौरिगंगासे बिर्खेत जोर्ना सडक चौमाला झिल हुइटी गर्भा दर्बार जोर्ना सडक, मालाखेती फलटुडे जोर्ना सडक स्तरोन्नतिके आदिके लाग पहल कैना, कैलाली क्षेत्र नम्बर ४ के आवश्यक पर्ना स्थलमे पक्की पुलके निर्माण, मछेली खोला बिर्खेतसे डोटी जोर्ना पुल, खुरखुरिया, धनगढी उप–महानगरपालिका जोर्ना पुल, चौमाला पुल, अन्डैहियाके पुलमे हुइल कार्यान्वयनके ढिला सुस्ती हट्ना बा, चुरे ओ गौरिगंगामे झुलुंगे पुलके लाग पहल कैना उल्लेख बा ।

ओस्टके भूमिहीन ओ सुकुम्वासी समस्या समाधानके लाग कैलाली–४ के हजारौँ भूमिहीन, सुकुम्वासी, कमैया ओ अव्यवस्थित बसोबासहे कानुनसम्मत रूपमे लालपुर्जा वितरणके कामहे पहिल प्राथमिकता डेना, अत्तरिया बजारके बसपार्क क्षेत्र, लामि ताल, रेडक्रस, बुद्ध मन्दिर, उद्योग वाणिज्य संघ लगायत आसपासमे रहल क्षेत्रके बसोबास स्थल आदिमे हुइल समस्या समाधानके लाग यथाशीघ्र पहल कैना उल्लेख बा ।

रोजगारी ओ आर्थिक अवसरके लाग स्थानीय सीप ओ स्रोतमे आधारित रोजगार अभियान सुरु कैना, युवाहे कृषि, पशुपंक्षीपालन, पर्यटन ओ लघुउधोगमे लगानीके लाग प्रोत्साहन, वैदेशिक रोजगार निर्भरता घटैटी स्वदेशमे अवसर सृजना करक लाग कानुनी व्यवस्था कैना, कैलाली–४ भिट्टरके गोदावरी धाम लगायत २५ से ढेर प्राकृतिक ओ साँस्कृतिक, ऐतिहासिक ओ धार्मिक स्थलहे पहिचान कैके ‘पर्यटन पदमार्ग’ के रूपमे प्रवद्र्धन कैना, लामी टल्वा, नायल टल्वाहे विशेष पर्यटकीय स्थल बनाजैना, स्थानीय थारु संस्कृति ओ अन्य जातजातिके ऐतिहासिक गौरवहे कल्चर टुरिज्म मार्फत विश्वमे चिन्हैना योजना बाचा पत्रमे राखल बा ।

ओस्टके कृषि अन्तरगत कैलाली क्षेत्र नम्बर ४ के निर्वाहमुखी तथा व्यवसायी किसानहे उत्पादन वृद्धि करक लाग अनुदान प्रणालीहे उत्पादनमुखी बनैटी राष्ट्रिय उत्पादन सँग जोरके कुल गृहस्थ उत्पादन वृद्धि कैना, हालसम निर्माणाधीन अवस्थामे रहल कोल्ड चेम्बर तथा स्टोरहे नीतिगत रूपमे सम्पन्न करक लाग ओ सञ्चालनमे लानक लाग उच्च पहल कैना, सुदूरपश्चिमके अत्तरिया स्थित मुख्य कृषि बजारहे अत्याधुनिक ओ प्रविधि सहित चुरे, गौरीगंगा ओ मोहान्यालके किसानके उत्पादनहे बजारीकरण कैना, निर्यात ओ ब्रान्ड बनाके नीतिगत रूपमे तहगत समन्वय कैके विकास कैना, किसानके लाग आवश्यक पर्ना रासायनिक तथा प्राङ्गारिक मल ओ उन्नत जातके बीउ समयमे उपलब्ध करैना सुनिश्चितताके लाग संघीय तहमे नीतिगत पहल कैना, छाडा पशु चौपायाहे सुरक्षित कैना स्पष्ट कानुनी व्यवस्था तयार कैके आय–आर्जनके स्रोत बनैना पहल कैना लगायतके योजना रहल बावै ।

वन तथा चुरे संरक्षण ओ पर्यावरण संरक्षणके लाग चुरे क्षेत्रके अनियन्त्रित दोहन रोकक् लाग कडा कानुनी नीति निर्माणके पहल कैना, वृक्षारोपण, वन व्यवस्थापन ओ स्थानीय स्वामित्वमे आधारित संरक्षण कार्यक्रमके पहल कैना, मोहना, गोदावरी, खुटिया, शिवगंगा, गौरीगंगा, लिकमा, ठुलीगाऊ लगायतके लडियाहे वैज्ञानिक प्रणाली सहित व्यवस्थापन कैना मातहतके पालिका सँग समन्वय कैना, लडिया तटीय क्षेत्रमे स्थायी तटबन्ध, हरित कोरिडोर, पुनर्वास ओ चेतना कार्यक्रम सञ्चालन करक लाग पहल कैना योजना समावेश रहल बावै । चुरेके फेदीमे रहल बस्तीहे बारह् पहिरो ओ डुबान जैसिन प्राकृतिक प्रकोपसे बचाइक लाग जलाधार संरक्षण ओ तटबन्धनके विशेष कार्यक्रम सञ्चालन कैना योजना बाचा पत्रमे उल्लेख रहल बा ।

धार्मिक, सांस्कृतिक ओ पर्यटन विकासके लाग गोदावरी, गौरीगंगा ओ अत्तरियामे धार्मिक पर्यटन मार्गके विकास कैना धार्मिक स्थलके संरक्षण ओ प्रचार दीर्घकालीन योजना सहित कार्यान्वयन करक लाग पहल कैना, गोदावरी धाम क्षेत्रहे देव भूमि सुदूरपश्चिमके मुख्य शक्ति पीठके दर्शन करक लाग अन्तर्राष्ट्रिय स्तरके “प्रवेश धाम“ के रूपमे स्थापित कैना पहल, गोदावरी धाम एक समितिमे राखके ओ धार्मिक वनहे सुदूरपश्चिम प्रदेशके प्रमुख पर्यटकीय ओ आध्यात्मिक गन्तव्यके रूपमे विकास कैना योजनामे प्राथमिकता डेना उल्लेख बा ।

युवा केन्द्रित राष्ट्रिय कार्यक्रम अन्तरगत जेनजी तथा युवाहे नीति निर्माण ओ निर्णय प्रक्रियामे अग्रस्थानमा रख्ना, डिजिटल सेवा, ई गभरमेन्टके विकास कैना, नयाँ विचार, प्रविधि ओ नवउद्यममे लगानी प्रोत्साहन कैना उल्लेख बा । व्यापार तथा व्यवसाय अन्तरगत खाद्यवस्तुके गुणस्तर कायम करक लाग नीतिगत पहल कैना, करके दायराहे व्यवसाय अनुसार सुनिश्चित कैके करहे चुस्त बनाइक लाग एकद्वार प्रणाली लागु करक लाग कानुनी व्यवस्था कैना उल्लेख बा । सामाजिक न्याय तथा समावेशिता अन्तरगत दलित, थारु, जनजाति, महिला ओ सीमान्तकृत समुदायके अधिकार सुनिश्चित करक लाग नीतिगत पहल कैना उल्लेख रहल बा ।

सुशासन ओ पारदर्शिताके लाग “जनताके करके पैसा जनतामे खर्च हुइना“ सुनिश्चितता कैना, वडा, पालिकामे ओ कार्यालयमे सक्कु योजना, खर्च ओ परिणामके अनलाइन सार्वजनिक प्रतिवेदन प्रणाली विकास करक लाग पहल कैना योजना आघे सारल बा ।

ओस्टके नागरिक सहभागिता, नैतिक राजनीति ओ जबाफदेहिता, खेलकुदके विकासके लाग गोदावरी, गौरीगंगा चुरे ओ मोहान्याल भिट्टर रहल सम्भावना बोकल खेलाडीहे निःशुल्क आवास सहितके प्रभावकारी खेलकुद विद्यालय स्थापना, विस्तारके लाग पहल कैना योजना समेटल बा । ओस्टके सुदूरपश्चिम विकास मोडल तयार कैना सुदूरपश्चिमके लाग निर्वाचित संघिय संसद ओ प्रदेश संसदके संयत्र बनाके सुदूरपश्चिमके साझा सरोकारके विषयमे एक बनैना उल्लेख रहल बा ।