जनताके रोजाइसँगे संगठनके बलमे जित सुनिश्चित बा : एमाले उम्मेदवार ढुंगाना
पहुरा समाचारदाता
धनगढी, १० फागुन । नेकपा एमाले कैलालीके जिल्ला अध्यक्ष यज्ञराज ढुंगाना अइना फागुन २१ गते हुइना प्रतिनिधिसभा निर्वाचनमे कैलाली क्षेत्र नम्बर–५ से उम्मेदवार बनल बटै ।
पाँच निर्वाचन क्षेत्र रहल कैलालीमे पार्टी संगठनके नेतृत्व करटी आइल ढुंगानाउप्पर अपनसंग अन्य चार क्षेत्रके पार्टीके उम्मेदवारहे जिटाईपर्ना जिम्मेवारी बा ।
उमेरसे ४६ वर्षके ढुंगाना पहिल चो संसदीय निर्वाचनमे होमल बटै । उहाँ विद्यार्थी संगठनसे अपन राजनीतिक यात्रा सुरु करल रहिट । २०५४ सालमे अनेरास्ववियुसे राजनीतिक यात्रा सुरु करल उहाँ कैलाली बहुमुखी क्याम्पसके प्रारम्भिक कमिटी हुइटी जिल्ला अध्यक्ष ओ पाछे केन्द्रीय सदस्यसमके जिम्मेवारी सम्हारल रहिट । उहाँे कैलाली बहुुमुखी क्याम्पसमे २०६३ सालमे स्वतन्त्र विद्यार्थी युनियनके सभापति हुके नेतृत्व क्षमता डेखाइल रहिट ।
एमाले पार्टीके जिल्ला कमिटी सदस्यसे प्रदेश सचिवालय सदस्यसमके अनुभव विटोरल ढुंगाना १२ फागुन २०८० मे सम्पन्न एमाले कैलाली जिल्ला अधिवेशनसे जिल्ला अध्यक्षमे निर्वाचित हुइल रहिट ।
राजनीतिसँगे व्यवसायमे समेत सक्रिय ढुंगाना धनगढीमे नवजीवन अस्पताल सञ्चालन, इलेक्ट्रोनिक स्कुटर डिलर तथा स्वास्थ्य क्षेत्रसँग सम्बन्धित कलेजमे संलग्न बटै । संगठनात्मक पकड, सामाजिक पहुँच ओ व्यवसायिक पहिचानहे उहाँ अपन बल्गथर पक्षके रूपमे प्रस्तुत करले बटै ।
ढुंगाना कहलै अपन जित सुनिश्चित रहल दाबी करटी शिक्षा, स्वास्थ्य ओ पूर्वाधार विकासहे प्राथमिकतामे धारके मत मग्टी रहल बटै । अपने युवाके प्रतिनिधिके रूपमे चुनावी मैदानमे उटरल उल्लेख करटी उहाँ पदमे नैरहेबेरफे जनताके पक्षमे निरन्तर काम करल बटैले बटै । २०७९ के स्थानीय तह निर्वाचनअनुसार कैलाली–५ अन्तर्गत धनगढी उपमहानगरपालिकाके १९ ओ कैलारी गाउँपालिकाके ६ ओ ९ परठ । धनगढीमे कांग्रेस बल्गर मन्लेसेफे एमालेसेफे उल्लेख्य मत प्राप्त करटी आइल बा । यिहे राजनीतिक अंकगणित ओ अपन संगठनात्मक प्रभावहे आधार बनैटी ढुंगाना यी बार जित निकर्ना प्रयासमे बटै ।
कैलाली–५ एमालेके लाग प्रतिस्पर्धात्मक क्षेत्र मानजाइठ । २०७४ ओ २०७९ के निर्वाचनमे एमालेके नारदमुनी रानासे झिनो मतान्तरसे पराजय बेहोरल रहिट । २०७९ मे कांग्रेसके उम्मेदवार २१ हजार ३९२ मत ल्यानेबेर एमालेके उम्मेदवारसे २० हजार १३८ मत पाइल रहिट । समानुपातिकओरफे कांग्रेस १५ हजार ६१७ मत प्राप्त करेबेर एमालेसे १४ हजार ३२१ मत ल्यन्ले रहिट, जिहीसे यहाँ एमाले ओ काँग्रेसबीच प्रतिस्पर्धा कडा रहल विल्गाइठ ।
