निर्वाचन ओ आम सञ्चार विषयक अन्तरक्रिया
पहुरा समाचारदाता
धनगढी, १२ फागुन । निर्वाचन कार्यालयसे “निर्वाचन ओ आम सञ्चार विषयक जिल्ला स्तरीय एक दिवसीय अन्तरक्रिया कार्यक्रम” सम्पन्न करले बा ।
निर्वाचन प्रक्रियाहे पारदर्शी, निष्पक्ष ओ विश्वसनीय बनैना उद्देश्यसे सुदूरपश्चिम प्रदेश निर्वाचन कार्यालयसे अन्तरक्रिया करल हो ।
अन्तरक्रिया कार्यक्रममे सुदूरपश्चिम प्रदेश निर्वाचन कार्यालयके कार्यालय प्रमुख प्रेम भट्ट कार्यक्रमके उद्देश्यबारे जानकारी कराइल रहिट । उहाँ लोकतान्त्रिक व्यवस्थामे निर्वाचन ओ आमसञ्चार एकऔरेक परिपूरक अंग रहल ओरसे डुनु बीच समन्वय, उत्तरदायित्व ओ आचारसंहिताके पालना अत्यन्त आवश्यक रहल बटाइल रहिट ।
भट्ट निर्वाचन अवधिमे सूचना प्रवाहके शुद्धता, अफवाह नियन्त्रण ओ मतदातामे सही सन्देश पुगैना जिम्मेवारी सञ्चारमाध्यमके रहल उल्लेख कैटी निर्वाचन आयोगसे जारी आचारसंहिताके प्रभावकारी कार्यान्वयनमे सक्कु पक्ष सचेत हुइ पर्ना बटाइल रहिट ।
अन्तरक्रियामे सहभागीहुक्रे सामाजिक सञ्जालमे फैलना भ्रामक सूचनासे निर्वाचन प्रक्रियामे पारे सेक्ना असर, तथ्यपरक रिपोर्टिङके आवश्यकता ओ पत्रकारके पेशागत उत्तरदायित्वबारे धारणा राखल रहिट ।
छलफलके क्रममे निर्वाचनसम्बन्धी सूचना संकलन तथा प्रकाशन करेबर स्रोतके विश्वसनीयता, भाषा संयम ओ निष्पक्षता कायम राखे पर्ना विषयमे जोड डेहल रहे ।
