निर्वाचनके ९५ प्रतिशत तयारी पूरा

पहुरा समाचारदाता
धनगढी, १३ फागुन । फागुन २१ गते हुइना प्रतिनिधि सभा सदस्य निर्वाचनके तयारी ९५ प्रतिशत पूरा हुइल सुदूरपश्चिम प्रदेश निर्वाचन कार्यालय जानकारी डेले बा ।

निर्वाचन कार्यालयसे मंगरके रोज पत्रकारसँग अन्तरक्रिया कार्यक्रम कैटी निर्वाचनके तयारी बारे जानकारी डेहल हो । सुदूरपश्चिम प्रदेश निर्वाचन कार्यालयके प्रदेश निर्वाचन अधिकारी प्रेमराज भट्ट निर्वाचनके तयारी करिब अन्तिम चरणमे पुगल जानकारी डेलै ।

उहाँके अनुसार निर्वाचन कार्यालयसे सरकारसे सरकार (जीटुजी) प्रक्रिया अन्तर्गत ३७ प्रकारके ओ निर्वाचन आयोगसे प्राप्त १४ प्रकार सहित ५१ प्रकारके निर्वाचन सामग्रीके साथ कर्मचारीहे खटाइल बटैलै । मतदाता पहिचानके लाग रङ्गीन फोटोसहितके मतदाता नामावली मतदान केन्द्रमे पठाइल उहाँ जानकारी डेलै ।

निर्वाचन कराइक लाग खटल कर्मचारी फागुन १८ ओ १९ गते सर्वदलीय सर्वपक्षीय भेला कैना उहाँ जानकारी डेलै । अब्बे निर्वाचन कार्यालयसे प्रदेशके ७६४ वडामे मतदाता शिक्षा कार्यक्रम फेन जारी रख्ले बा । निर्वाचन कराइक लाग १५ हजार कर्मचारी खटल बटै । सुदूरपश्चिम प्रदेशमे दुई हजार १९९ मतदान केन्द्र ओ एक हजार १७६ मतदान स्थल रहल बा ।

१६ निर्वाचन क्षेत्रमे रहल इ प्रदेशमे २४ ठो राजनीतिक दलसे २०६ जाने उम्मेदवार रहल बटै । ओस्टके, २८ जाने स्वतन्त्र रुपमे चुनाव लर्टी रहल बटै । उहे बिच, निर्वाचन अधिकारी भट्ट आचारसंहिता सक्कु जननहे लागल ओरसे ओकर पालना कैना आग्रह करले बटै ।

उहे कार्यक्रमके बिच उहाँ निर्वाचनमे अशक्त, ज्येष्ठ नागरिक, छोट बच्चा रहल महिला लगायत अन्य समूहके व्यक्ति लाइन नैलागके सहज रुपमे मतदान करे पैना जानकारी डेलै ।

महिला ओ पुरुष भर लाइन लागके मतदान कैना व्यवस्था रहना उहाँ बटैटी फरक ओ अन्य समूहके व्यक्ति सहज रुपमे मतदान करे पैना जनैलै । फरक ओ अन्य समूहके मतदाता सहज रुपमे मतदान करे पैना व्यवस्था मिलाइक लाग सक्कु मतदान अधिकृत ओ सहायक मतदान अधिकृतहे निर्देशन डेहल प्रदेश निर्वाचन अधिकारी भट्ट बटैलै ।

मतदाताहुक्रे सुरुमे पहिल हुइना निर्वाचित हुइना मतपत्रमे मत सङ्केत कैके एक नम्बर लिखल मत पेटिकामे मतपत्र डर्ना उहाँ बटैलै । पहिल हुइना निर्वाचित हुइना मतपत्र उज्जर कागजमे लाल अक्षरके रहल बा । पहिल हुइना निर्वाचित हुइना मतपत्रमे छाप लगासेकलपाछे मतदाता समानुपातिक मतपत्रमे आपनहे मन पर्र्ना पार्टीमे मत सङ्केत कैके २ नम्बर लिखल मतपेटिकामे मतपत्र डर्ना जनाइल बा ।

समानुपातिक मतपत्रमे उज्जर कागजमे करिया अक्षरसे लिखल बा । पहिल हुइना निर्वाचित हुइना मतपत्रमे लगाइले छापसे उम्मेदवारहे ओ समानुपातिक मतपत्रमे लगाइल छापसे राजनीतिक दलहे भोट जैना बा ।