निर्वाचन मतदाता शिक्षा कार्यक्रम सम्पन्न

पहुरा समाचारदाता
धनगढी, १५ फागुन । कैलालीके गोदावरी नगरपालिकाके अत्तरिया ओ वडा नम्बर ८ स्याउलेमे निर्वाचन मतदाता शिक्षा कार्यक्रम सम्पन्न हुइल बा ।

मानव अधिकारका लागि महिला एकल महिला समुह सुदूरपश्चिम प्रदेशसे कुर्वे विष्ट्रोके सहयोगमे यिहे फागुन २१ गते हुइना प्रतिनिधि सभा सदस्य निर्वाचनमे बदर हुइना मतहे सदर बनाइक लाग निर्वाचन मतदाता शिक्षा कार्यक्रम कैगिल हो ।

गोदावरी नगरपालिकाके अत्तरीयामे समुहके जिल्ला उपाध्यक्ष तथा गोदावरी नगर समितिके अध्यक्ष धना पाठकके अध्यक्षतामे हुइल कार्यक्रममे एकल, द्वन्दपीडित ओ सीमान्तकृत समुदायके महिलाहुकनहे मतदान कैना तरिकाबारे जानकारी डेगिल रहे । कार्यक्रममे निर्वाचन मतदाता शिक्षा स्वय सेवक तिर्थकुमारी चौधरी मतदाता शिक्षा ओ मतदान प्रक्रियाबारे जानकारी डेहल रहिट ।
ओस्टेक करके कार्यक्रममे पत्रकार प्रेम चौधरी मताधिकार, मतदाता शिक्षाके महत्व, प्रत्यक्ष तथा सामनुपातिक उम्मेदवारहे मत दर्ना तरिकाबारे जानकारी डेहल रहिट ।

कार्यक्रममे मानव अधिकारका लागि महिला एकल महिला समुह सुदूरपश्चिम प्रदेशसे संचालित शान्ति परियोजनाके प्रदेश अधिकृत वेद अवस्थी निर्वाचनमे मतदान करेबेर केक्रो डर, धम्की वा लोभ लालचमे नैपरके सक्कु जानेक माग मुद्दा उठैना, विकास करेसेक्ना सक्षम उम्मेदवारहे स्वच्छासे मतदान कैना आग्रह करल रहिट । कार्यक्रममे समुहके प्रदेश कोषाध्यक्ष मिना भण्डारी स्वागत मन्तव्य राखल रहिट ।

ओस्टेक करके शुकके रोज गोदावरी नगरपालिका–८ स्यालेमेफे निर्वाचन मतदाता शिक्षा कार्यक्रम कैगिल बा । उ कार्यक्रममे मतदाता शिक्षा स्वयं सेवक दुर्गाकुमारी उपाध्यक्ष ओझा मतदान कैना तरिकाबारे प्रशिक्षण डेहल रहिट । कार्यक्रममे सहजीकरण मानव अधिकारका लागि महिला एकल महिला समुह सुदूरपश्चिम प्रदेशसे संचालित शान्ति परियोजनाके प्रदेश अधिकृत वेद अवस्थी करल रहिट ।