कैलाली २ मे कडा टक्कर

पहुरा समाचारदाता
धनगढी, १५ फागुन । मतदानके दिन लच्क्यइटी जाइबर कैलाली क्षेत्र नम्बर २ के उम्मेदवारबिच कडा टक्कर डेखगैल बा । उहाँहुक्रन बिच प्रतिस्पर्धा तथा कडा टक्कर बह्रलपाछे उम्मेदवारहुक्रे चुनावी रणनीतिसमेत फेरबदल करले बटै ।

हालसम घरदैलोमे जोड डेहल उहाँहुक्रे इ बेला संगठन संरचना रहल आपन पार्टी समर्थकके मत बचैना कसरतमे केन्द्रित हुइल बटै । औरे ओर पहिलचो चुनावी मैदानमे उम्मेदवार खडा करल दल पुरान पार्टी समर्थित मत जटरासेक्ना आपन ओर टन्ना रणनीतिमे केन्द्रित हुइल बटै । इ निर्वाचन क्षेत्रमे एमाले, कांग्रेस, नेपाली कम्युनिस्ट पार्टी संगठन संरचना रहल पुरान पार्टी हुइट । इ पार्टीहे पहिलचो उम्मेदवार उठाइल लावा दल रास्वपा ओ नागरिक उन्मुक्ति पार्टी (नाउपा) नेपालले चुनौती डेटी रहल बटै ।
उहे कारण इ निर्वाचन क्षेत्रके सक्कु उम्मेदवार अपने जिट्ना बाह्य दाबी करटी रलेसे फेन आन्तरिक रूपमे भर कोइ फेन ढुक्क डेखल नैहुइट ।

पाँच दलके उम्मेदवार आपन मुख्य प्रतिस्पर्धा कौनो एकसँग किल नैहोके सक्कु जनहनसे चुनौतीपूर्ण प्रतिस्पर्धाके अवस्था रहल बटैले बटै । एमालेसे सूर्यबहादुर थापा, कांग्रेससे विजय स्वाँर, नेपाली कम्युनिस्ट पार्टीसे नन्दबहादुर साउँद, राष्ट्रिय स्वतन्त्र पार्टीसे केपी खनाल, नागरिक उन्मुक्ति पार्टी (नाउपा) नेपालसे पतिराम चौधरी मैदानमे रहल बटै । ‘मोर प्रतिस्पर्धा कौनो एक दलसँग किल आकारमे डेखल नैहो,’ कांग्रेस उम्मेदवार स्वाँर कहलै, ‘अन्य सक्कु उम्मेदवारके अवस्थाहे मध्यनजर कैटी आघे बह्रल बटी ।’

संगठन संरचनाके दृष्टिसे कांग्रेस, एमाले ओ नेकपा स्थापित दल हो । मने संगठन नै निर्माण नैरहल लावा दल रास्वपा ओ नाउपा नेपालके उम्मेदवारहे चुनौतीके रूपमे लेहल बटै । इ क्षेत्र थारु मतदाताके बाहुल्य रहल क्षेत्र हो । मने कांग्रेस, एमालेके उम्मेदवार भर पार्टी संगठन समर्थित मत किल बचाके फेन जित हुइना आकलन करटी रहल बटै । ‘हमार सक्कु ध्यान पार्टी समर्थित मत डग्मगाइ नैडेनामे रहल बा,’ कांग्रेस उम्मेदवार स्वाँर कहलै, ‘सुरुके दिनमे कांग्रेसभिट्टर कुछ समस्या डेखगैल रलेसे फेन इ बेला सक्कु नेता एकढिक्का हुइल बटै । आब हमार मत बचाके कुछ थपे सेकब कलेसे जीत पक्का बा ।’ उहाँ विगतमे इ क्षेत्रमे कायम रहल भेगीय जातीय पक्षधरता टुरके विकासके सवालमे साझा मत निर्माण हुइटी गैल दाबी फेन करलै ।

एमाले उम्मेदवार थापा फेन कांग्रेस उम्मेदवार स्वाँरके रणनीतिमे रहल बटै । ‘हमार पार्टीके मत परली बा, बचाके पुगजाइ,’ उहाँ कहलै, ‘हम्रे मतदाताहे विश्वास कैना प्रस्ट आधार डेके मत मग्टी रहल बटी ।’ नेकपाके उम्मेदवार नन्दबहादुर साउँद समर्थक नेता–कार्यकर्ता भर बाहिरी हल्लासे फेन भित्री रूपमे मजबुत मत निर्माण करटी रहल दाबी करठै । रास्वपा उम्मेदवार खनाल रास्वपाप्रतिके लहरसे आपन जित निश्चित रहल दाबी करटी रहल बटै । ‘मतदाताहे प्रभावित कैके मत बह्रैना ओहकान शैली प्रभावकारी डेखल बा,’ खनालसँगे प्रतिस्पर्धामे रहल एक उम्मेदवार कहलै ।

नाउपा नेपालके उम्मेदवार चौधरी आपन समुदायके मत बचाइ सेक्लेसे किल फेन जिटे सेक्ना आकलनमे रहल बटै । इ निर्वाचन क्षेत्रमे करिब २६ हजार थारु मतदाता रहलमे करिब १४ हजार समुदायके मत अइना चौधरीके आकलन रहल बा । अन्य समुदायके मत गाउँबाहर रलेसे फेन थारु समुदायके मत भर तुलनात्मक रूपमे गाउँमे रहल उहाँके बुझाइ रहल बा । मने कांग्रेस, एमाले, नेकपा, रास्वपाके उम्मेदवार भर गत निर्वाचनमे थारु समुदायसे प्राप्त विश्वास नाउपासे गुमाके छिन्नभिन्न होसेकल ओरसे रेशम चौधरी संरक्षक रहल नवगठित नाउपा नेपालके उम्मेदवार सोचल जस्टे थारु समुदायके मत एकढिक्का राखे नैसेक्ना बुझाइमे रहल बावै । उ अवस्थामे थारु समुदायके मत जटरा सेक्ना टन्ना प्रयासमे अन्य दलके उम्मेदवार रहल बटै ।

एमाले उम्मेदवार थापा कृषि ओ पर्यटन विकासके माध्यमसे पाँच हजार जनशक्तिहे रोजगारी सिर्जना कैना वाचा करल बटै । उहाँ कहलै, ‘पर्यटन ओ कृषिके नेटवर्क चेनमे एक घर एक युवाहे रोजगारीमे जोर्ना कर्रा नैहो ।’ कांग्रेस उम्मेदवार विजय स्वाँर इ क्षेत्रके मतदाता पूर्वाधार विकास निर्माणके माग अत्यधिक रूपमे रख्ना करल बटैटी अपने कृषि क्षेत्रके आधुनिकीकरणमे लैजैना प्रमुख आवश्यकता डेखल बटैलै ।

रास्वपा उम्मेदवार खनाल भ्रष्टाचार नियन्त्रण, सुशासन ओ युवा स्वरोजगारी आपन मुख्य उद्देश्य रहल बटैलै । नेकपाके उम्मेदवार साउँद सेती लोकमार्गहे राष्ट्रिय गौरवके आयोजनामे राखके काम कैना पहल कैना बटैठै । उहाँ पूर्वाधार विकासअन्तर्गत बौनिया–खिमडी सडक खण्ड स्तरोन्नति, चिसापानीसे महेन्द्रनगरसम चार लेन सडक निर्माण, थारु सांस्कृतिक संग्रहालय स्थापनामे जोडबल कैना बटैठै । नाउपा नेपालके उम्मेदवार पतिराम चौधरी युवा लक्षित स्वरोजगार कार्यक्रम लागू कैना दाबी करलै ।

इ क्षेत्रमे ०७९ के निर्वाचनमे समानुपातिक ओर साबिक नागरिक उन्मुक्ति पार्टी १९ हजार ५ सय ९७, एमाले १२ हजार ८ सय १८, कांग्रेस १० हजार १ सय ७९, माओवादी केन्द्र ७ हजार १ सय ६९, रास्वपा ४ हजार ५४ ओ राप्रपा २ हजार ५ सय ९६ मत पाइल रहे कलेसे नेकपा एकीकृत समाजवादी ६ सय ८९ मत लानल रहे । इ निर्वाचन क्षेत्रमे १६ राजनीतिक दलसे उम्मेदवारी डेले बटै । महोन्याल गाउँपालिका, लम्कीचुहा नगरपालिका, बर्दगोरिया गाउँपालिका ओ जानकी गाउँपालिका इ निर्वाचन क्षेत्रमे परठ् । यहाँ १ लाख ७ हजार ७ सय ५५ मतदाता रहल बटै ।