कैलारीमे ११६औं अन्तर्राष्ट्रिय महिला दिवस मनागैल

पहुरा समाचारदाता
हसुलिया, २४ फागुन । कैलाली जिल्लाके कैलारी गाउँपालिकामे विविध कार्यक्रम कैटी भव्यताके साथ ११६औं अन्तर्राष्ट्रिय महिला दिवस मनागैल बा ।

वडा नम्बर १ हसुलियामे गाउँपालिका उपाध्यक्ष भगवतीकुमारी चौधरीके वरका पहुनामे अन्तर्राष्ट्रिय महिला दिवस मनागैल हो । कार्यक्रममे सम्बोधन करटी गाउँपालिका उपाध्यक्ष महिलाहुकनहे संविधानमे डेहल अधिकारहे केल्ह कार्यान्वयन करलेसे महिला आघे बह्रे पैना मौका मिल्ना बटैली ।

लैङिक विभेद अभिन कायम बा,’ गाउँपालिका उपाध्यक्ष कहली, ‘घरमे छावाछाईनहे डाईबाबासे विभेद कैना, छाई पटुहियाहे विभेद कैना चलन बा । महिलासे महिलाहे विभेद कैना चलन बा, महिलाहुकनहे जातीय, पितृसत्ता, वर्गीय, आर्थिक, सामाजिक कारणसे थप हिंसाके सामना करे परटी रहल बा ।’

उहाँ कहली, ‘डाई, छाई वा पटुहिया कोई हुइलेसेफे सक्कु जाने नारी हुइट । सम्मान चाहेक लाग सम्मान डेहे पर्ना उहाँ आग्रह करली ।’

उहाँ अभिनफे बाल विवाह व्याप्त रहल कारण महिलाहुक्रे हिंसाके शिकार बन्टी गैल बटैली । अब्बे भर्खर निर्वाचित हुइल सक्कु प्रतिनिधि सदस्यहुकनहे बधाई तथा शुभकामना डेटी आजसम ढेर कानून बनल मने कागतके पानामे सिमित रहल कहटी कानून कार्यान्वयन तथा संशोधन कैटी कृषि, स्वास्थ्य, शिक्षामे विशेष ध्यान डेना आग्रह कैटी स्थानीय सरकार हातेमालो करके आघे बह्रना बटैली ।

महिलाहुक्रेफे देशके लाग भारी भारी योगदान डेहल कहटी अब्बे प्रधानमन्त्री सुशिला कार्की प्रतिनिधि सभा निर्वाचन कराके इतिहास रचल बटैली ।

कैलारी गाउँपालिका वडा नम्बर १ मे पारदर्शि महिला विकास बहुउद्देश्यीय सहकारी संस्था लिमिटेडके आयोजनामे हुइल कार्यक्रम संस्थाके अध्यक्ष गीता चौधरीके अध्यक्षतामे हुइल रहे । वडा नम्बर १ के कार्यालय, सामुदायिक विकास अध्ययन केन्द्र, सहास नेपाल, वडा नम्बर १ वडास्तरीय महिला संजाललगायत जनप्रतिनिधि सामाजिक क्षेत्रमे क्रियाशिल सहकारी, गैरसरकारी सस्थाके प्रतिनिधिहुकनके सहभागिता रहे ।

ओस्टेक कैलारी गाउँपालिका वडा नम्बर ८ मे नारी दिवस कार्यक्रम श्रमशिल सहकारीके सदस्य रजरानी चौधरीके अध्यक्षतामे हुइल कार्यक्रममे वरका पहुना कैलारी गाउँपालिका उपाध्यक्ष भगवतीकुमारी चौधरी वरका पहुना रहल रहिट ।

कार्यक्रममे विशिष्ट पहुना वडा सदस्य लक्ष्मी चौधरी, भुमा परियारलगायत बुद्धिजिवी, भल्मन्साहुकनके सहभागिता रहे ।
११६औं अन्तर्राष्ट्रिय महिला दिवसके अवसरमे हुइल कार्यक्रममे थारु गैरथारु समुदायके टमान मेरिक सास्कृतिक प्रस्तुती हुुइल रहे । कार्यक्रम वडा नम्बर ८ के कार्यालयके सहयोगमे संचालन कैगिल बा ।