ओम आशा अस्पतालसे सांसद डा. चन्दहे बधाई ज्ञापन

पहुरा समाचारदाता
बाजुरा, २७ फागुन । ओम आशा अस्पताल प्रालिसे नवनिर्वाचित प्रतिनिधि सभा सदस्य डा. आनन्दबहादुर चन्दहे सम्मान तथा बधाई ज्ञापन कार्यक्रम करले बा ।

कैलाली क्षेत्र नम्बर ५ से निर्वाचित डा. चन्दहे बुधके रोज उ अस्पतालसे सम्मान तथा बधाई कार्यक्रम कैगिल हो । उ अस्पतालके अध्यक्ष जगतराम चौधरी नवनिर्वाचित डा. चन्दहे खादा ओढाके बधाई डेहल रहिट । उहे अवसरमे नवनिर्वाचित प्रतिनिधि सभा सदस्य चन्द थारु समुदायमे सिकलसेल एनिमियाके समस्या जटिल रहल कहटी एक चो थारु समुदायके सक्कु जनहनके चेकचाँचके लाग अपने पहल कैना बटैलै ।

उहाँ थारु समुदायके ढेर माया पाइल ओ सम्बन्धफे लग्गे रहल कहटी थारु समुदायके उत्थानके लाग अपने विशेष जोर डेना बटैलै ।

थारु समुदायके सक्कु भल्मन्साहुकनके नेतृत्व विकासके लाग तालिमफे व्यवस्था कैना बटैलै । प्रालिके अध्यक्ष जगतराम चौधरी स्वास्थ्य समस्याके बारेमेफे बाट राखल रहिट ।