पबिना चौधरी उत्कृष्ट नतिजा ल्यन्टी सुदूरपश्चिममे टप

पहुरा समाचारदाता
धनगढी, ३ चैत । कैलाली बहुमुखी क्याम्पसके होटल म्यानेजमेन्ट संकायमे अध्ययनरत विद्यार्थी पबिना चौधरी उत्कृष्ट नतिजा हासिल करटी सुदूरपश्चिम विश्वविद्यालयमे टप हुइना सफल हुइल बटी ।

दुसरा सेमेस्टरके सत्रान्त परीक्षामे ३.८५ जिपीए हासिल करटी उहाँ विश्वविद्यालयमे पहिल स्थान हासिल कैना सफल हुइल हुइट । क्याम्पसके होटल म्यानेजमेन्ट संकायके विभागीय प्रमुख उपप्राध्यापक नरेन्द्र शाह पबिनाके यी उपलब्धी बहुट प्रेरणादायी हुइल बटैलै ।

उहाँक अनुसार विद्यार्थीहुकनके मेहनत ओ समर्पणसे यी मेरिक सफलता सम्भव हुइल हो । साथै, क्याम्पसके सक्कु प्राध्यापक ओ विद्यार्थीके निरन्तर मेहनत, समर्पणसे क्याम्पससे उत्कृष्ट नतिजा हासिल करटी आइल उल्लेख करटी, अइना दिनमेफे शैक्षिक गुणस्तर कायम रख्टी अभिन ढेर उपलब्धी हासिल हुइना उहाँ विश्वास व्यक्त करलै ।