एचआइभी रोकथाम कार्यक्रम
पहुरा समाचारदाता
धनगढी, ४ चैत । कैलाली जिल्लाके कैलारी गाउँपालिकामे बुधके रोज एचआइभी संक्रमण रोकथामबारे छलफल कैगिल बा ।
नेपाल राष्ट्रिय समाज कल्याण संघ ओ यूएनडिपी नेपाल÷ग्लोवल फन्सके साझेदारीमे सञ्चालित एचआइभी कार्यक्रम अन्र्तगत ओभिपी माइग्रेन्टस परियोजनासे कैटी रहल गतिविधिबारे छलफल कैगिल हो ।
कैलारी गाउँपालिका वडा नम्बर ३ के अध्यक्ष तथा सामाजिक विकास समिति संयोजक सन्तराम चौधरीके अध्यक्षतामे हुइल कार्यक्रममे नेपाल राष्ट्रिय समाज कल्याण संघसे सञ्चालित ओभिपी माइग्रेन्टस परियोजनाके परियोजना संयोजक पदमराज जोशी कैलारी गाउँपालिकामे एचआइभी, क्षयरोग ओ मलेरियासम्बन्धी कैटी रहल गतिविधिबारे जानकारी डेहल रहिट ।
परियोजनाके लक्षित समुह आप्रवासी (विशेष करके भारत जैना) साथे ओइनके दम्पतिहे समेटना करल उहाँ जनैलै । सन २०२५ फेब्रुअरी १ से २०२७ जुन ३१ सम संचालन हुइना यी परियोजनासे व्यवहार परिवर्तन शिक्षा तथा भेटघाटमे घर भेट कार्यक्रम करटी रहल उहाँ जनैलै । उ अन्र्तगत एचआइभी, यौन शिक्षा, कण्डम वितरण, टिभी स्क्रिनिङ, आइइसी सामाग्री वितरण, कोभिड रोकथामबारे जानकारी डेटी रहल जनैलै ।
ओस्टेक करके एचआइभी परिक्षण अन्र्तगत घरभेट, घुम्टी शिविर संचालन कैगिल बा । कैलाली जिल्लामे सन २०२६ के फेब्रुअरीसम ६६ हजार १११ सय विसिसि, ६६ हजार १०७ जानेक टिभी स्क्रिनिङ, ६० हजार २२७ एचआइभी स्क्रिनिङ करलमे १९ जाने नयाँ एचआइभी फेला परल बटै ।
ओस्टेक करके कैलारी गाउँपालिका एक जाने नयाँ एचआइभी संक्रमित फेला परल परियोजना संयोजक जोशी बटैलै । कैलारी गाउँपालिका स्वास्थ्य शाखाके एचआइभी हेरुइया फोकल पर्सन बलबहादुर धानुक कैलारी गाउँपालिकासे १७/१८ जाने जिल्लामे उपचार तथा औषधी लेहे जाइक लाग यातायात भत्ता लेटी रहल बटैलै । कैलारी गाउँपालिकाके स्वास्थ्य शाखा संयोजक नरेश चौधरी एचआइभी संक्रमित व्यक्तिहुक्रे उपचारके लाग धनगढीमे जउइयाहे एक हजार रुप्या यातायातके व्यवस्था करल बटैलै । उहाँ कहलै, नियमित रुपमे औषधी उपचारके लाग धनगढी जउइयाहे यातायातके व्यवस्था कैगिल बा । एचआईभी संक्रमित औरफे हुई सेक्ना मने कोइ कोई लाजके मारे नैआइसेक्ठै ।
छलफल कार्यक्रममे वडा नम्बर ४ वडा अध्यक्ष ठागुराम चौधरी, वडा नम्बर ५ के कार्यवाहक वडा अध्यक्ष अनारकली चौधरी, वडा नम्बर ७ के वडा अध्यक्ष सुन्दरीदेवी चौधरी, कैलारी गाउँपालिका निमित्त प्रमुख प्रशासकीय अधिकृत गणेश प्रसाद मिश्र, सामाजिक विकास शाखाके प्रमुख यगम कलेल, महिला स्वास्थ्य स्वयं सेविका माया चौधरी, नेपाल राष्ट्रिय समाज कल्याण संघके सामाजिक परिचालक रेणुका चौधरीलगायतके सहभागिता रहे ।
