क्षमताके आधारमे प्रतिनिधित्व आवश्यक

पहुरा समाचारदाता
धनगढी, १६ चैत । राज्यके निकायमे थारुहुकनके प्रतिनिधित्व सवालमे सोम्मारके रोज धनगढीमे अन्तरक्रिया÷छलफल कार्यक्रम कैगिल बा ।

धनगढी उपमहानगरपालिका नगर भल्मन्सा समितिके आयोजना ओ थारु नागरिक समाज कैलालीके सहआयोजनामे छलफल कैगिल हो । कार्यक्रममे बरका पहुना रहल थारु कल्याणकारिणी सभाके केन्द्रीय उपाध्यक्ष प्रभातकुमार चौधरी थारु समुदायके बडघर प्रथाहे कानूनी मान्यता नैडेहटसम थारु समुदाय अधिकारसे बञ्चित रना बटैलै ।

थारु बाहुल स्थानीय तहमे बरघर÷भल्मन्सा ऐन बनैलक मने कार्यान्वयन नैहुइल हो, उहाँ कहलै, ‘प्रदेश सरकारफे ऐन ल्यन्ना केल्ह कहल मने, दर्ता हुके प्रक्रिया आघे नैसेकल हो । यी पहिचान ओ अधिकारके लाग हम्रे आवाज उठैटी आइल बटी मने कार्यान्वयन नैहुइल हो । थारु समुदायम डेखा परलक सिकलसेल पैत्रिक रोग रहल ओरसे अब्बे एक लाख रुप्यामे उपचार सेवा डेटी आइल बा । उ चाही अपुग रहल कहटी उहीहे बह्राके पाँच लाख रुप्या वा आवश्यकता अनुसार उपचार डेहेपर्ना उहाँ बटैलै ।

टमान आयोगमे थारु समुदायके प्रतिनिधित्व न्यून रहल ओरसे क्षमता रहल व्यक्तीहे प्रतिनिधित्व कराई पर्नाफे उहाँ बटैलै । सुदूरपश्चिम प्रदेशमे थारु समुदायमे थारु भाषाहे दुसरा भाषाके रुपमे मान्यता डेना कहल मने कार्यान्वयन नैहुइल बटैलै ।

विशिष्ट पहुना रलक धनगढी उपमहानगरपालिका वडा नम्बर ८ क वडा अध्यक्ष जुगराम चौधरी थारु समुदाय भुमिपुत्र रलक कहटी राज्यके हरेक निकायम प्रतिनिधित्व हुइना जरुरी रलक बटैल । पहिल यी क्षेत्रम मलेरियाक डरले थारु समुदाय बाहेक कुई नि बैठ रुचाइल रह । थारु समुदाय मलेरिया पचाक, बञ्जर जग्गाहन बैस्ना योग्य बनाइलपाछ पहाडसे झरल समुदाय उ जग्गा हरपना करल बटै । कलेसे थारु समुदाय आपन ठाँटठालोमे सुकुम्बासी भुमिहिन बनपर्ना अवस्था अइलक उहाँ बटैले ।

नगर भल्मन्सा समितिके अध्यक्ष रोहित चौधरीके अध्यक्षतामे हुइलक कार्यक्रममे राज्यके निकायमे थारु समुदायके प्रतिनिधित्व न्यून रहल कहटी हमार आवाज उठे नैसेकल बटैलै । समाज कल्याण परिषदमे थारु समु्दायके प्रतिनिधि हुईपर्ना रहे मने हुई नैसेकल हो ।

थारु समुदाय एक दुसरहे सम्मान करेनैसेकल बटैलै । यी बरस धनगढी उपमहानरपालिकामे भल्मन्सा ऐन बनाइक दवाव डेना बटैलै ।

कार्यक्रममे थारु समुदायके अगुवा बुद्धिजिवीहुँक्रे थारु समुदायके भल्मन्सा प्रथाहे कानूनी मान्यतामे जोर डेटी एकता हुईपर्ना बाटमे बत्वाइल रहिट । सञ्चालन थारु नागरिक समाज कैलालीके संयोजक दिलबहादुर चौधरी करल रहिट ।