कैलारी गाउँपालिकासे थारु सांस्कृति तथा पर्यटकीय प्रवद्र्धन ऐन २०८२ जारी
पहुरा समाचारदाता
धनगढी, १६ चैत । थारु समुदायके बाहुल्यता रहल कैलाली जिल्लाके कैलारी गाउँपालिकासे थारु सांस्कृतिक तथा पर्यटकीय प्रवद्र्धन ऐन २०८२ जारी करले बा ।
गाउँपालिका अध्यक्ष राजसमझ चौधरीके अध्यक्षतामे हुइल सोम्मारके रोज हुइल कैलारी गाउँपालिकाके आर्थिक बर्ष २०८२÷०८३ के गाउँसभा (हिउँदे अधिवेशन)के दुसरा सभा अधिवेशन बैठकसे कैलारी गाउँपालिका थारु सांस्कृतिक तथा पर्यटकीय प्रवद्र्धन ऐन २०८२ जारी करले हो ।
ओस्टेक करके गाउँसभासे स्थानीय स्वायत्त ऐन, २०५५ ओ नियमावली, २०५६ अनुसार सेवा प्रवेश करल कर्मचारीहुकनहे सेवा अवकासपाछे डेना सेवा सुविधा सम्बन्धी कार्यविधि, २०८२ जारी कैगिल बा ।
सभासे कैलारी–३ दक्षिण भडरी चोकसे यौङ व्याइज क्लवके खेल मैदानसम पतिराम चौधरी डगर नामाकरण कैगिल बा ।
ओस्टेक गाउँसभा बैठकसे भदौ २३ ओ २४ गतेक जेनजी आन्दोलनके क्रममे गाउँपालिकाके कार्यालय, वडा कार्यालयमे हुइल आगजानीके कारण जरके नष्ट हुइल फर्निचर, फिक्चर मेसिनरी, विद्युतिय उपकरण, श्रोता तथा सवारी साधानके लगत कट्टा कैना निर्णयफे हुइल बा ।
गाउँसभा बैठकमे गाउँपालिका उपाध्यक्ष भगवतीकुमारी चौधरी अव्वेसम बनल ऐन कार्यान्वयनके लाग ध्यान डेना ओ यकर लाग सक्कु जानेक समन्वय जरुरी रहल बटैली । बैठकमे वडा नम्बर २ के वडा अध्यक्ष विकास चौधरी, वडा नम्बर ४ के वडा अध्यक्ष ठागुराम चौधरी, वडा नम्बर ५ के वडा अध्यक्ष विष्णु प्रसाद चौधरी, वडा नम्बर ६ के वडा अध्यक्ष प्रेमबहादुर चौधरी, कार्यपालिका सदस्य लालबहादुर विक, वडा सदस्य तुल्सीराम चौधरीलगायत मन्तव्य राखल रहिट ।
बैठकमे गाउँसभाके सदस्यहुक्रे प्रमुख प्रशासकीय अधिकृत खगेन्द्रराज जोशी, सामाजिक विकास शाखा प्रमुख यगम कलेललगायत टमान शाखाके प्रमुख तथा वडा सचिवहुकनके सहभागिता रहे ।
