टमान व्यक्तिहुकन सम्मान तथा रक्तदान कार्यक्रम
पहुरा समाचारदाता
धनगढी, २४ चैत । कैलाली जिल्लाके धनगढी उपमहानगरपालिका वडा नम्बर ७ मे रहल बातचित घरसे अपन टिसरा वार्षिकोत्सवके अवसरमे टमान कार्यक्रम करके मनैले बा ।
मंगरके रोज वार्षिकोत्सवके अवसरमे वृहत रक्तदान तथा सम्मान कार्यक्रम आयोजना करके मनागिल बा । समाज रुपान्तरण कैना उद्देश्यसे स्थापना हुइल बातचित घरसे वार्षिकोत्सवके अवसरमे रक्तदान कार्यक्रमसहित समाजमे टमान क्षेत्रमे योगदान पुगाइल व्यक्तित्वहे सम्मान समेत करले बा ।
महिलाहुकनके हकअधिकारके क्षेत्रमे विगत नम्मा समयसे क्रियाशिल रहल थारु महिला सभा कैलालीके संस्थापक अध्यक्ष दुर्गा कुश्मी, निर्माण व्यवसायी छेदुलाल चौधरी ओ शिक्षा क्षेत्रमे योगदान पुगाइल बाफत राजकुमार महतोहे प्रमाणपत्र सहित सम्मान करल बा ।
साथे उहे अवसरमे रक्तदान कार्यक्रमहे संयोजन तथा सहयोग करल वाफत कैलारी गाउँपालिकाके स्वास्थ्य शाखा प्रमुख नरेश चौधरी ओ थाकस कैलाली सदस्य अनिता चौधरीहेफे सम्मान करल बातचित घरके बरघर ठाकुर प्रसाद करियाप्रधान जानकारी डेलै ।
रक्तदान सम्मान कार्यक्रममे सुदूरपश्चिम प्रदेश विधि विज्ञान प्रयोगशालाके प्रमुख विरेन्द्र चौधरी बाचचित घरसे थारु समुदायके हरेक मुद्दा उठान करटी आइल बटैलै । शिक्षक राजकुमार महतो, थारु महिला सभाके अध्यक्ष दुर्गा कुश्मीफे बाचचित घरसे थारु समुदायहे परिवर्तनके लाग पुगाइल योगदान अतुलनिया रहल बटैलै । ओस्टेक सुदूरपश्चिम प्रदेश सर्वाधिक रक्तदान करुइया रक्तदान दिपक उपाध्याय स्वास्थ्य व्यक्तिहुकनहे रक्तदान कैना आग्रह करलै । रक्तदान कार्यक्रममे १८ जाने रगत दान करल रहिट ।
बातचित घरके बरघर ठाकुर प्रसाद करियाप्रधानके अध्यक्षतामे हुइल कार्यक्रममे उहाँ रक्तादानसे थारु समुदायमे डेखा परना सिकलसेल रोगके विरामीके आवश्यकता पुरा हुई सेक्ना बटैलै । उहाँ बातचित घरसे विगत तीन बर्षसे थारु भाषामे भिट्टे पात्रो प्रकाशन करटी आइल बटैलै । उ पात्रमे थारु समुदायके टरटिहुवार समेटल बा । उहाँ थारु समुदायमे डेखा परल समसमायिक विषयबस्तुहे समेटके बातचितफे करटी आइल बरघर करियाप्रधान बटैलै ।
कार्यक्रममे सहजीकरण विषयबस्तु/खानपिन संयोजक सानु चौधरी करल रहिट । कार्यक्रममे बातचित घरके किसन्वा माधव चौधरी, अन्नधन संयोजक बसन्ती चौधरी, कला सीप संयोजक मंगल प्रसाद चौधरी, धिरेन्द्र चौधरीलगायतके टमान थारु बुद्धिजिवी, थारु महिला अगुवाहुकनके सहभागिता रहे ।
