दुसर बैठक आघे गोहुँक मोल तोक्ना सांसद करिष्मा कठरियासे आग्रह

पहुरा समाचारदाता
काठमाण्डौ, २५ चैत । राष्ट्रिय स्वतन्त्र पार्टीके सांसद करिष्मा कठरियासे प्रतिनिधिसभाके बैठकमे कठरिया थारु भाषामे सम्बोधन करले बटी ।

संघीय संसदके मंगरके रोज हुइल बैठक उहाँ कठरियाथारु भाषामे सम्बोधन करटी कहली, करिब डेढ लाख कठरियाथारु ओ सक्कु थारु समुदायके प्रतिनिधि करटी यहाँसम यी गरिमामय सदनमे उपस्थित हुइल बटु । कठरिया कहना थर यी संसद नैचिन्हट रहे । महीहे यहाँसम पुगुइया सक्कु मतदाता ओ पार्टीके नेतृत्वप्रति हार्दिक अभार व्यक्त करटु ।

प्रतिनिधि सभाके बैठकमे आपन बाट रख्टी सांसद करिष्मा कठरिया संसद्के दुसर बैठक बैठना आघे गोहुँके मुल्य तोकल सुने पाईपर्ना बटैले बटी । ‘यी सरकारसे सेकेण्डके हिसाबसे काम कैना कहल बाट मै स्मरण कराई चाहटु । का उ बाट किसानके समस्या समाधान कैना दिशामेफे जाटिक लागू हुई टे ?’ उहाँ प्रतिनिधिसभाके बैठकमे बोल्टी कहली ।

नेपालमे अभिनसम ठगल ओ हेपल वर्ग किसान रहल उल्लेख करटी उहाँ कहली, ‘तत्काल गोहुँके समर्थन मुल्य तोके परल ओ किसानसे उत्पादन करल गोहुँ खरिद कैना व्यवस्था करेपरल । दुसर बैठकमे आइटसम यी बाट हुइल सुने सुने मिले ।’

लाल आयोगके प्रतिवेदन सार्वजनिक कैनाफे उहाँ माग करले बटी । आब फेरसे कटरा समय अशरा लग्ना थारु समुदायहे हाली न्याय प्रदान करेपरल । यी गरिमामय सदनसे मै सक्कु थारु समुदायसे अभिनसम राज्यसे करल विभेद ओ अन्यायके लाग माफी मागे चाहटु ।

किसान नैपैलै गोहुँके उचित मूल्य

कैलालीके किसान यी वर्ष गोहुँके उचित मोल पैले नैहुइट । गैल वर्ष प्रतिक्विन्टल चार हजार रुप्यामे गोहुँ बेचल किसान यी वर्ष करिब दुई सय रुप्या कम मूल्यमे बिक्री कैना बाध्य हुइल बटै । हाल गोहुँ प्रतिक्विन्टल तीन हजार ८०० रुप्याके हाराहारीमे बिक्री हुइटी रहल बा । यिहे बीच कुछ दिनआघे परल वर्षा ओ हुरीबताससे उत्पादनमे समेत क्षति पुगल बा ।

किसान रुपलाल चौधरी ढेर मेहनत करके खेती करलेसेफे उत्पादनके उचित मोल नैपाके मर्का परm बटैलै । ‘गैल वर्षसे कम मोलमे गोहुँ बिक्री करेपरल बा, कम हुइलेसेफे ढेर मोल पाईपर्ना रहे, समयमे मल ओ बीया नैपैना, दुःख करके खेती करेबेरफे उचित मोल नैपैना समस्या बा,’ उहाँ कहलै ।

गैल वर्ष सरकारसे गोहुँके न्यूनतम समर्थन मूल्य प्रतिक्विन्टल तीन हजार ८६७ रुप्या ३८ पैसा निर्धारण करल रहे । विगतमे हरेक वर्ष वृद्धि करटी आइल समर्थन मोल यी वर्ष नैतोकेबेर किसानसे उचित मोल पाई नैसेकल गुनासो करले बटै । कृषि मन्त्रालयसे समर्थन मोल निर्धारणके लाग अध्ययन करके प्रस्ताव उद्योग, वाणिज्य तथा आपूर्ति मन्त्रालयमे पठासेकल जनैले बा ।